فوتو: ەلوردا اكىمدىگى
1992 جىلدان باستاپ, قازان ايىنىڭ ەكىنشى جەكسەنبىسى مۇگەدەكتەر كۇنى رەتىندە اتاپ وتىلەدى. وسى اتاۋلى كۇنگە وراي ەلىمىزدە مۇگەدەك جانداردىڭ سپورتپەن اينالىسۋىنا ىقپال ەتكەن, 2002-2015 جىلدار ارالىعىندا «قايسار» سپورت كلۋبىندا جاتتىقتىرۋشى بولعان قانات قۇسايىنوۆتى ەسكە الۋعا ارنالعان تۋرنير ءوتتى. جارىس بيىل ءبىرىنشى رەت وتكىزىلىپ وتىر.
«بۇگىن ارباداعى جاندارعا پارا ۇستەل تەننيسىمەن شۇعىلدانۋىنا مۇمكىندىك بەرگەن باپكەر قانات قۇسايىنوۆتى ەسكە الۋ تۋرنيرىنە تەك استانا عانا ەمەس, سونىمەن قاتار قاراعاندى, كوكشەتاۋ قالاسىنان دا سپورتشىلارىمىز ارنايى كەلىپ وتىر. بيىل قىتايدا وتەتىن ليتسەنزيالىق پارا ازيا ويىندارىنا ەلىمىزدەن 14 ادام قاتىسسا, سونىڭ تورتەۋى استانا قالاسى اتىنان بارعالى وتىر. وسى ناتيجەگە ءبىز بىرنەشە جىل بويى ۇزدىكسىز جاتتىعۋدىڭ ارقاسىندا جەتىپ وتىرمىز. سپورت بولعان جەردە جەڭىس تە, جەڭىلىس تە قاتار جۇرەدى. سوندىقتان اتالعان جارىستا بارلىعىڭىزعا ساتتىلىك تىلەيمىن!», دەدى جارىستىڭ اشىلۋىنا قاتىسقان استانا قالاسىنىڭ دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەركەعالي كوربوزوۆ.
جارىسقا 30-عا جۋىق قاتىسۋشى قاتىسىپ, ەرلەر جانە ايەلدەر 3 ءتۇرلى كلاسس بويىنشا جەڭىمپازداردى انىقتادى.
سالتاناتتى ءىس-شارا بارىسىندا الىشەر تالعاتوۆ سۋردو جۇزۋدەن قر حالىقارالىق دارەجەدەگى سپورت شەبەرى, سايات دوسالي پارا جۇزۋدەن قر سپورت شەبەرىنە ۇمىتكەر, رينات گيلفانوۆ پارا ۇستەل تەننيسىنەن قر سپورت شەبەرىنە ۇمىتكەر, جاننا اليەۆا پارا ۇستەل تەننيسىنەن قر سپورت شەبەرىنە ۇمىتكەر اتاعىمەن ماراپاتتالدى.
جارىس جۇلدەگەرلەرى رەتىندە تومەندەگى سپورتشىلاردىڭ ەسىمدەرى اتالدى:
ايەلدەر. س-3 سانات.
1-ورىن. كۋريۋكوۆا ن.
2-ورىن. اليەۆا ج.
3-ورىن. سەرگەەۆا س.
ەرلەر. س-4 سانات.
1-ورىن. دوستاحين ح.
2-ورىن. ابۋوۆ ك.
3-ورىن. اۋشاموۆ س.
س-5 سانات.
1-ورىن. گيلفاموۆ ر.
2-ورىن. ستارىگين ف.
3-ورىن. جارماعانبەتوۆ ب.
جارىس جەڭىمپازدارى كۋبوك, مەدال جانە ارنايى سىيلىقتارمەن ماراپاتتالدى.
