وبلىس اكىمى نۇرلىبەك نالىباەۆ ايماقتىڭ 85 جىلدىق مەرەيتويى مەن قالا كۇنى اياسىندا ەسىگىن ايقارا اشقان جاڭا عيمارات الدىندا جاس جۇبايلاردى قۇتتىقتاپ, مەرەكە كۇندەرى قالادا اسەم عيماراتتار مەن كوز تارتار كوركەم اللەيالار تارتۋ ەتىلگەنىن اتاپ ءوتتى.
– ءبىز ءۇشىن بۇل ورتالىقتىڭ ماڭىزى وتە زور. جىل سايىن وڭىرىمىزدە شاڭىراق قۇندىلىعىن قادىر تۇتقان ۇيەلمەندەر سانى ارتىپ كەلەدى. بيىل وتباسى كۇنى قارساڭىندا استانا تورىندە 10-شى رەت وتكەن «مەرەيلى وتباسى» ۇلتتىق بايقاۋىندا جەرلەسىمىز, عاسىر جاساعان مايدانگەر قاباق سماعۇل اۋلەتى لاۋرەات اتاندى. ءبىز وسىنداي ونەگەلى اۋلەتتەردى ماقتان تۇتىپ, جاستارعا ۇلگى ەتەمىز. جاڭا ءومىردىڭ جارقىن باسپالداعىنا اينالار سارايدا رۋحاني كەمەلدەنگەن جاڭا بۋىن قالىپتاستىرۋعا جاعداي جاسالادى, – دەدى ايماق باسشىسى.
جيىندا جاڭا نىساندى ساپالى سالىپ, مەرزىمىندە تاپسىرعان «اۆانگارد» جشس وكىلدەرىنە قۇرمەت كورسەتىلدى. وتباسىلىق ومىرگە جاڭا قادام باسقان جاس جۇبايلار لەبىزىن ءبىلدىرىپ, «مەرەيلى وتباسى» ۇلتتىق بايقاۋىنىڭ لاۋرەاتى, عاسىر جاساعان ابىز اقساقال قاباق سماعۇلوۆ باتا بەردى.
جاڭا نىساندا نەكە قيۋدان بولەك جاستار دەنساۋلىعى, «اناعا تاعزىم» ورتالىقتارى, وتباسى بانكى, «باقىتتى وتباسى» جۇمىسپەن قامتۋ ورتالىعى قىزمەت كورسەتىپ, جاستاردىڭ جۇبايلىق ومىرگە بەيىمدەلۋىنە, دەنساۋلىعىن ساقتاۋىنا, جۇمىسپەن قامتىلۋىنا, تۇرعىن ۇيگە كەزەككە تۇرۋىنا, ۇلتتىق سالت-ءداستۇرلى قۇندىلىقتارىنا قانىعۋىنا قولداۋ تانىتادى.
ايماق مەرەيتويى اياسىندا وسى كۇنى «اناعا تاعزىم» ورتالىعى ەل يگىلىگىنە تابىستالدى. ۇلتتىق قۇندىلىقتارىمىزدى قادىرلەپ, ءداستۇرىمىز دارىپتەلەتىن ورتالىق بەلگىلى كاسىپكەر مارات دۇيسەنباەۆتىڭ دەمەۋشىلىگىمەن بوي كوتەرىپ وتىر. ءوڭىر باسشىسى 1,7 ملرد تەڭگە جۇمساپ, وسىنداي عاجاپ عيمارات تارتۋ ەتكەن مەتسەناتقا سىر جۇرتشىلىعى اتىنان العىس ايتىپ, قىزىلوردا وبلىسىنىڭ قۇرمەت گراموتاسىن تابىستادى. ەڭبەك ارداگەرلەرى دايراباي ىسقاقوۆ, الما باقتياروۆا, ءازيا قىستاۋباەۆا جەرلەستەرىن جاڭا ورتالىقتىڭ اشىلۋىمەن قۇتتىقتاپ, ت.جۇرگەنوۆ قورىنىڭ توراعاسى ساپەن اڭسات باتا بەردى.
مەملەكەت باسشىسى قاسىم-جومارت توقاەۆ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا ەكونوميكانى وركەندەتۋگە جانە حالىقتى جۇمىسپەن قامتۋعا ىقپال ەتەتىن تاعى ءبىر باعىت – كرەاتيۆتى يندۋستريانى جان-جاقتى دامىتۋدى جۇكتەگەنى بەلگىلى. وسىعان بايلانىستى «اناعا تاعزىم» ورتالىعى عيماراتىنان «ايەلدەردىڭ كرەاتيۆتى يندۋستريا ورتالىعى» جۇمىسىن باستايدى. مۇندا جاڭاشا ۇلتتىق برەندتەر قالىپتاستىرىپ, ەكسپورتتى دامىتۋعا ۇلەس قوساتىندار شوعىرلانىپ, جاڭا جۇمىس ورىندارىنىڭ اشىلۋىنا جاعداي جاسالماق. جاڭا عيماراتتا «ميراس» اجەلەر كلۋبى, «ۇلت جاقۇتى» مۋزەي زالى, «بويتۇمار» قىزدار كلۋبى, «سىرعالىم» سىرلاسۋ كلۋبى, جاس وتباسىلاردىڭ «جاس وتاۋ» مەكتەبى, «انا ءتىلى» دەبات كلۋبتارى دا قۇرىلىپ وتىر.
قىزىلوردا
