قازاق بي ونەرىندەگى جەكە ورىنداۋدى ناسيحاتتاۋ, ۇلتارالىق مادەني-شىعارماشىلىق بايلانىستاردى نىعايتۋ, حورەوگرافيا ونەرى سالاسىندا كاسىبي تاجىريبە الماسۋ, دارىندى بيشىلەردى, حورەوگرافتاردى, بالەتمەيستەرلەردى انىقتاۋدى ماقسات ەتكەن ونەر مەرەكەسى اتىراۋ وبلىسى اكىمدىگى مادەنيەت, تىلدەردى دامىتۋ جانە ارحيۆ ءىسى باسقارماسى مەن وبلىستىق حالىق شىعارماشىلىعى جانە مادەني دەمالىستى ۇيىمداستىرۋ عىلىمي-ادىستەمەلىك ورتالىعىنىڭ قولداۋىمەن ۇيىمداستىرىلدى.
التاي مەن اتىراۋ اراسىن جالعاعان اۋقىمدى شاراعا ەلىمىزدىڭ تۇكپىر-تۇكپىرىنەن بارلىعى 22 ورىنداۋشى قاتىستى. بايقاۋ شارتى بويىنشا بيشىلەر ءى كەزەڭدە الەم حالىقتارى ءبيىنىڭ حورەوگرافيالىق كومپوزيتسيالارىن ۇسىنسا, ءىى كەزەڭدە مىندەتتى باعدارلاما – ە.برۋسيلوۆسكيدىڭ مۋزىكاسىنا حالىق ءبيى «التىنايدى» بيلەدى.
ەكى كۇنگە سوزىلعان فەستيۆالدا بيشىلەردىڭ ورىنداۋشىلىق شەبەرلىگىن قازىلار القاسىنىڭ توراعاسى – قازكسر ەڭبەك سىڭىرگەن ءارتىسى, قازاقستاننىڭ حالىق ءارتىسى گۇلجان تالپاقوۆا, مۇشەلەرى – قازاقستان مادەنيەتىنىڭ قايراتكەرى, پەداگوگيكا عىلىمدارىنىڭ دوكتورى, ونەرتانۋ عىلىمدارىنىڭ پروفەسسورى, قازاق ۇلتتىق حورەوگرافيا اكادەمياسىنىڭ پروفەسسورى ايگۇل كۇلبەكوۆا, قازكسر ەڭبەك سىڭىرگەن ءارتىسى, ونەرتانۋ عىلىمدارىنىڭ پروفەسسورى, تويعان ءىزىم, «ەرەن ەڭبەگى ءۇشىن» مەدالىنىڭ يەگەرى, تۇڭعىش پرەزيدەنت قورى سىيلىعىنىڭ لاۋرەاتى, «قازاقستاننىڭ 100 جاڭا ەسىمى» جوباسىنىڭ جەڭىمپازى, «روزا باعلانوۆا اتىنداعى قازاقكونتسەرت» مەملەكەتتىك كونتسەرتتىك ۇيىمى «گۇلدەر» ءانسامبلىنىڭ باس بالەتمەيستەرى انۆارا سادىقوۆا, قازاقستاننىڭ ەڭبەك سىڭىرگەن مادەنيەت قايراتكەرى, پەداگوگيكا عىلىمدارىنىڭ كانديداتى, «قازىنا» حالىق بي ءانسامبلىنىڭ باس بالەتمەيستەرى جانە كوركەمدىك جەتەكشىسى زاۋرە اجىبەكوۆا باستاعان بي ونەرىنىڭ ناعىز مايتالمان ماماندارى باعالادى.
گۇلجان تالپاقوۆا – قازاقتىڭ كورنەكتى ءبيشىسى. جوعارى ورىنداۋ تەحنيكاسىمەن جانە بەينەنى مانەرلى جەتكىزۋىمەن ەرەكشەلەنەتىن دارا دارىن الەمنىڭ 52 مەملەكەتىندە ونەر كورسەتىپ, ۇلتتىق بي ونەرىن جاھانعا تانىتتى. ءبيشى رەپەرتۋارىنداعى «ايجان قىز», «قوس القا», «الماس قىرعاۋىل», وزبەكتىڭ «حورەزم ءبيى» جانە ۇيعىر, كورەي, ۆەتنام, موڭعول, ءۇندى, مىسىر, مالاي حالىقتارىنىڭ بيلەرى كورەرمەنىن ءبىر ءسات تە بەيجاي قالدىرىپ كورگەن ەمەس. گاسترولدىك ساپارمەن اقش, گەرمانيا, موڭعوليا, وڭتۇستىك-شىعىس ازيا ەلدەرىندە (بيرما, مالايزيا, سينگاپۋر, شري- لانكا), ءۇندىستان, جاپونيا, يران, تايلاند, فينليانديا سىندى ەلدەردى ارالاپ, ونەرىمەن جۇرتشىلىقتى ءتانتى ەتتى. ال بولگاريا استاناسى سوفيا قالاسىندا جاستار مەن ستۋدەنتتەردىڭ بۇكىلدۇنيەجۇزىلىك ءىح فەستيۆالىنە قاتىسىپ, «ايجان قىز» بيىمەن ايتۋلى فەستيۆالدىڭ لاۋرەاتى اتانىپ, كۇمىس جۇلدەنى قانجىعاسىنا بايلادى. امەريكانىڭ توعىز شتاتىندا بولىپ, تەڭدەسسىز تالانتىمەن شارتاراپتى مويىنداتتى. ءدال وسى ساپارىنان كەيىن مەملەكەت جانە قوعام قايراتكەرى دىنمۇحاممەد قوناەۆ ارنايى قابىلداپ, «حالىق ءارتىسى» اتاعىمەن ماراپاتتادى.
ال بۇل بايقاۋ ءبيشىنىڭ ونەر جولىندا جيناعان سول مول تاجىريبەسىن وسكەلەڭ ۇرپاققا پاش ەتۋدى مۇرات تۇتادى. ياعني قازاقستاننىڭ حالىق ءارتىسى گۇلجان تالپاقوۆانىڭ الەم حالىقتارىنىڭ ءىىى رەسپۋبليكالىق بايقاۋىن ۇلتتىق مادەنيەتتىڭ حورەوگرافيالىق كەڭىستىگىندەگى بىرەگەي وقيعا دەسەك تە بولادى. شارانىڭ باستى ەرەكشەلىگى سول – مۇندا جەكە ورىنداۋشىلاردىڭ شەبەرلىگى سىنعا تۇسەدى. وسى ارقىلى حالىق بيلەرىن جەكە ورىنداۋدا ناسيحاتتاۋ كوزدەلگەن. بايقاۋدىڭ شارتى دا ەرەكشە. ەكىنشى كەزەڭىندە گۇلجان تالپاقوۆانىڭ رەپەرتۋارىنان بي ۇسىنىلادى. بۇعان دەيىنگى بايقاۋلاردا «ەركە بالا», «قوس القا» بيلەرى كورەرمەن كوزايىمىنا اينالسا, بيىل «التىناي» ءبيىن سان ءتۇرلى ساراپتاۋدا تاماشالاۋعا مۇمكىندىك تۋدى. تاڭداۋدىڭ ءدال وسى تۋىندىعا ءتۇسۋىنىڭ سەبەبى – ە.برۋسيلوۆسكيدىڭ مۋزىكاسى ىزدەنۋشىسىن حورەوگرافيالىق كومپوزيتسياعا باعىتتايدى. وندا ورىنداۋشى جوعارى تەحنيكانى, ديناميكانى, قازاق قىزىنىڭ جارقىن بەينەسىن, تۇتاستاي العاندا ءوزىنىڭ شىعارماشىلىق الەۋەتىن كورسەتۋى قاجەت.
– ءبيشى بولۋ ۇلكەن قاجىردى تالاپ ەتەدى. اسىرەسە بالەت ونەرىنىڭ جۇگى اۋىر. سوندىقتان دا ەكىنىڭ ءبىرى بۇل سالانى تاڭداي بەرمەيدى. بي – ناعىز فانتتاردىڭ, ءوز ءىسىن شىن سۇيەتىن جانكەشتىلەردىڭ جۇمىسى. دايىندىق ۋاقىتىندا قانشا قينالساڭ, سول ازاپتىڭ بارلىعى ساحناعا شىعىپ بيلەپ, كورەرمەننىڭ شەكسىز قوشەمەتىن سەزىنگەن بىرنەشە مينۋتتىڭ ىشىندە ۇمىتىلىپ كەتەدى. ونەر ادامىنىڭ باقىتى وسى عوي! ياعني بي دەگەنىمىز – ەڭبەك. كورەرمەن ىقىلاسىنا لايىق بولا ءبىلۋ ۇلكەن باقىت. جاس بۋىن وسىنى سەزىنسە, بىلسە ەكەن دەيمىن. قازىر جاس كەلدى, انە-مىنە دەگەنشە جەتپىس بەستىڭ دە بەلەسىنە كەلىپ قالىپپىز. جاستاردىڭ بيلەگەنىن كورىپ ەرەكشە شابىتتانامىن. كەيدە ساحنادا جۇرگەن جىلدارىمدى ساعىنىپ جىلاپ تا الامىن. قازىر جاستاردا مۇمكىندىك كوپ. جالپى, جاستاردى قولدايتىن وسىنداي بايقاۋلاردىڭ وتكىزىلىپ تۇرعانى ەرەكشە قۋانتادى. جاقسى باستامالارعا قولداۋ ءبىلدىرىپ, ۇنەمى يگى ىستەردىڭ قاسىنان تابىلاتىن جاناشىر ازاماتتارعا العىسىم شەكسىز, – دەدى ايتۋلى بي فەستيۆالىنىڭ يەسى گۇلجان تالپاقوۆا.
بايقاۋ قورىتىندىسى بويىنشا قازىلار القاسىنىڭ شەشىمىمەن ءىىى ورىندى زەردە تاڭنۇرقىزى (الماتى) مەن اسەم اسحاتوۆا (ماڭعىستاۋ وبلىسى) تەڭدەي بولىسسە, ءىى ورىندى ىڭكار ايدارحانقىزى (استانا. قازاق ۇلتتىق حورەوگرافيا اكادەمياسى) الدى. ءى ورىن استانالىق ايسۇلۋ مۇراتقاليەۆاعا بۇيىردى. ال باس جۇلدەگە استانا قالاسى قازاق ۇلتتىق حورەوگرافيا اكادەمياسىنىڭ ستۋدەنتى عازيزا مولداحمەت لايىق دەپ تانىلدى. گۇلجان تالپاقوۆانىڭ ارنايى جۇلدەسى مۇرات قاراكوزگە (اتىراۋ) بەرىلدى. سونىمەن قاتار «التىناي» ۇزدىك حورەوگرافيالىق قويىلىمى ءۇشىن ا.كۇلبەكوۆا, ا.شامشيەۆ جانە د.ورازىمبەتوۆ, «ۇزدىك كوستيۋم» اتالىمى بويىنشا ا.لۇكپانوۆا, «ۇزدىك سۋرەتشى» اتالىمىندا ا.ەرمۇحان ماراپاتتالدى. بايقاۋدىڭ بارلىق قاتىسۋشىلارىنا العىسحاتتار مەن ىنتالاندىرۋ سىيلىقتارى تابىستالدى.
سونداي-اق ساحنانى سۇلۋلىققا تولتىرعان بي مەرەكەسى اياسىندا حالىقارالىق جانە رەسپۋبليكالىق كونكۋرستاردىڭ لاۋرەاتى, ونەرتانۋ كانديداتى انۆارا سادىقوۆانىڭ «گۇلجان تالپاقوۆانىڭ ونەربايان ورنەگى» كىتابىنىڭ تۇساۋكەسەرى ءوتتى. فوتوالبوم-كىتاپ ءبيشىنىڭ 75 جىلدىق مەرەيتويىنا ارنالعان. 1970-1980 جىلدارى حالىق بيلەرىنىڭ بىرەگەي ورىنداۋشىسى الەمنىڭ ەلۋدەن استام ەلىندە ءوزىنىڭ شىعارماشىلىعى مەن قازاق ونەرىن ابىرويمەن تانىستىردى. ونىڭ ءستيلى, مانەرى, تەحنيكاسى مەن ەستەتيكاسى كوبىنەسە وتاندىق ونەرگە ءتان ءبيدىڭ جەكە ورىنداۋشىلارىنىڭ دامۋ جولىن انىقتادى. قازاق جانە ورىس تىلدەرىندە جارىق كورگەن ەڭبەك گۇلجان تالپاقوۆانىڭ ءومىرى مەن شىعارماشىلىعىنىڭ قىر-سىرىن بەينەلەيتىن بىرەگەي ارحيۆتىك فوتوسۋرەتتەردەن تۇرادى.
