ءىس-شاراعا قازاقستان مەن ازەربايجاننىڭ مەملەكەت جانە قوعام قايراتكەرلەرى, تۇركىتىلدەس ەلدەردىڭ ديپلوماتيالىق وكىلدىكتەرى مەن حالىقارالىق ۇيىمدارىنىڭ باسشىلارى, عالىمدار, جازۋشىلار, ەلىمىزدىڭ جەتەكشى جوعارى وقۋ ورىندارىنىڭ ستۋدەنتتەرى قاتىستى.
باسىلىمدا ۇلى ويشىلدىڭ تۋىندىلارى, ونىڭ ءومىرى مەن شىعارماشىلىعى تۋرالى ماقالالار ۇسىنىلعان. سونداي-اق جيناقتا اباي ەسكەرتكىشتەرى مەن مۇسىندەرى تۋرالى اقپارات بەرىلگەن. باسىلىمنىڭ تارالىمى 500 دانا. سونىمەن قاتار جيناقتىڭ ەلەكتروندى نۇسقاسى دا جاپپاي وقىرمان ءۇشىن قولجەتىمدى.
قازاقستان رەسپۋبليكاسى پرەزيدەنتتىك ورتالىعى ديرەكتورىنىڭ ورىنباسارى بوتاگوز قايىپوۆا اباي قۇنانباي ۇلىنىڭ ەسىمى قازاق حالقىنىڭ عانا ەمەس, بۇكىل تۇركى الەمىنىڭ مادەني مۇراسىنا التىن ارىپتەرمەن جازىلعانىن جەتكىزدى.
حالىقارالىق تۇركى مادەنيەتى مەن مۇراسى قورىنىڭ پرەزيدەنتى گيۋناي ەفەنديەۆانىڭ ايتۋىنشا, قوردىڭ كەزەكتى باسپا جوباسى سانالاتىن بۇل جيناعىندا ازەربايجانداعى اباي شىعارماشىلىعىنا دەگەن تەرەڭ سۇيىسپەنشىلىك پەن قۇرمەت كورىنىس تاپتى.
ءوز كەزەگىندە حالىقارالىق تۇركى اكادەمياسىنىڭ پرەزيدەنتى شاھين مەدجيد وگلى مۇستافاەۆ ۇلى فيلوسوف, اعارتۋشى اباي شىعارمالارى وسى كۇنگە دەيىن وزەكتىلىگىن جوعالتپاعانىن ەرەكشە اتاپ كەتتى. كەرىسىنشە, ونىڭ مۇراسى ودان دا مۇقيات جانە تەرەڭ زەرتتەۋدى قاجەت ەتەدى, ويتكەنى وندا تۇركى حالىقتارىنىڭ عاسىرلىق دانالىعى تۇنىپ تۇر.
ازەربايجاننىڭ قازاقستانداعى توتەنشە جانە وكىلەتتى ەلشىسى اگالار راگيم وگلى اتاموگلانوۆ ۇلى اقىننىڭ شىعارماشىلىعىنداعى قازىرگى قوعامدا وتە وزەكتى سانالاتىن گۋمانيزم جانە ادامگەرشىلىك يدەيالارىنا توقتالدى.
ءىس-شارا سوڭىندا قازاقستان رەسپۋبليكاسىنىڭ پرەزيدەنتتىك ورتالىعى مەن حالىقارالىق تۇركى مادەنيەتى مەن مۇراسى قورى اراسىندا مەموراندۋمعا قول قويىلدى. بۇل قۇجاتقا قول قويۋداعى باستى ماقسات – تۇركى مادەنيەتىنىڭ دامۋ تاريحىن زەردەلەۋ بويىنشا بىرلەسكەن مادەني-ءبىلىم بەرۋ جانە عىلىمي-زەرتتەۋ جوبالارىن ىسكە اسىرۋدا تىعىز ىنتىماقتاستىق ورناتۋ.
