فوتو: sports.kz
قازاق ەلىنىڭ ماقتانىشى قامشىبەك قوڭقاباەۆ وزبەكستان بوكسىنىڭ قارا نارى سانالاتىن باحودير جالولوۆقا قارسى ايقاسادى. بۇگىنگى ايقاس ولاردىڭ ونىنشى رەت رينگتە توقايلاسۋى بولىپ وتىر. بۇعان دەيىن توعىز رەت جەكپە-جەككە ءتۇستى. سونىڭ ۇشەۋىندە عانا قامشىبەك ءباحوديردى ۇتتى.
2019 جىلعا دەيىن جالولوۆتىڭ جالىن جىعۋعا قامشىبەكتىڭ قايرات كۇشى جەتەتىن ەدى. ودان كەيىن التى جەكپە-جەكتىڭ بارلىعىندا دا ءباحوديردىڭ مەيماناسى تاسىپ وتىردى. ويتكەنى وزبەكتىڭ الىبى «وياندى». 2021 جىلى توكيودا وتكەن جازعى وليمپيادادا دا جەڭىسكە جەتتى. الەم چەمپيوناتىندا ەكى مارتە التىن مەدال ولجالادى. ازيا قۇرلىعىنىڭ چەمپيوناتىندا ءتورت رەت جەڭىسكە جەتتى. كەزىندە جالولوۆتى ءبىزدىڭ يۆان دىچكو دا دىڭكەلەتىپ ساباعان تالاي.
قامشىبەكتىڭ جىگەرىن جانىپ, نامىسىن قامشىلايتىن شاعى قازىر, ويتكەنى يىعىندا قازاق ەلىنىڭ ءۇمىتى تۇر. بوكسشىلارىمىز 2018 جىلى يندونەزيادا وتكەن جازعى ازيا ويىندارىنان دا التىن مەدالسىز قايتقان ەدى. بۇل جولى سول ولقىلىقتىڭ ورنىن بۇتىندەۋ اسا اۋىر سالماقتاعى الىبىمىزعا جۇكتەلىپ وتىر.
