شىنى كەرەك, 10-ورىن – ءبىز كوزدەگەن مەجە ەمەس ەدى. وتاندىق تاتامي شەبەرلەرىنىڭ بۇل كورسەتكىشىنە وسى سالانىڭ باسى-قاسىندا جۇرگەن باسشىلار مەن مامانداردىڭ عانا ەمەس, قاتارداعى قاراپايىم كورەرمەندەردىڭ دە كوڭىلى تولمادى.
قىتايدا 14 بالۋانىمىز باق سىنادى. سولاردىڭ اراسىنان ەڭ ۇزدىك ناتيجەگە 48 كگ سالماقتاعى ءابيبا ابۋجاقىنوۆا قول جەتكىزدى. بارلىق قارسىلاسىن قاپى قالدىرىپ, اقتىق سىنعا دەيىن القىنباي جەتكەن قازاق قىزى فينالدا جاپونيانىڭ مىقتىسى, ءۇش دۇركىن الەم چەمپيونى, ازيا ويىندارىنىڭ جەڭىمپازى ماتسۋمي تسۋنودادان ايلاسىن اسىرا المادى. ءدال سول جارىستىڭ العاشقى كۇنى ماعجان شامشادين قولا مەدال يەلەندى. قازاق بالۋانىنىڭ الەم چەمپيوناتى, ازيادا مەن قۇرلىق بىرىنشىلىگىنىڭ قولا جۇلدەگەرى لي حاريمگە عانا ءالى جەتپەدى. ءۇشىنشى ورىن ءۇشىن تارتىستا ماعجان تاجىكستاندىق مەحزود سۋفيەۆتى سان سوقتىردى.
كەلەسى كۇنى 63 كگ ەسميگۇل كۋيۋلوۆا مەن 81 كگ ابىلايحان جۇبانازار جەڭىس تۇعىرىنا كوتەرىلدى. ەكەۋىنە دە قولا مەدال بۇيىردى. بۇل – ەسميگۇلدىڭ اسا ءىرى دودالارداعى تىرناقالدى تابىسى. ءۇشىنشى كۇنى 100 كگ سالماقتاعى نۇرلىحان شارحاننىڭ وجەتتىگى مەن تاباندىلىعىنا, قايسارلىعى مەن جانكەشتىلىگىنە سۇيسىندىك. تۇساۋكەسەر كەزدەسۋىندە باحرەيننىڭ تۋى استىندا ونەر كورسەتەتىن شەشەن جىگىت زەليمحان باشاەۆتان باسىم تۇسكەن ول, ىلە-شالا جاپونيانىڭ جۇلدىزى, توكيو وليمپياداسىنىڭ جەڭىمپازى, 2017 جىلعى الەم چەمپيوناتىندا التىن جانە 2019 جىلعى جارىستا قولا مەدال العان اارون ءۆولفتىڭ اياعىن كوكتەن كەلتىردى. بۇل – شارحاننىڭ سپورتتىق مانسابىنداعى ەڭ جارقىن جەڭىس. جارتىلاي فينالدا قانداسىمىز بىلتىر الەم چەمپيونى, بيىل تەك ۇزدىكتەر عانا باس قوسقان ماستەرس تۋرنيرىندە توپ جارعان وزبەكستاندىق مۇزاففاربەك توروبوەۆتان ۇتىلدى. قولا مەدال ءۇشىن باسەكەدە نۇرلىحان كورەيا بالۋانى ۆون چون حۋندى يپپونمەن جەڭدى.
قىتايدا قۇرلىق چەمپيونى دانيار شامشاەۆ (73 كگ) پەن ازيا ويىندارىنىڭ جەڭىمپازى ديدار حامزاعا (81 كگ) زور سەنىم ارتقان ەدىك. بىراق حانچجوۋدا ەكەۋى دە وتە سىلبىر كۇرەستى. ەش ناتيجە بەرمەيتىن ءادىس-ءتاسىلدى قايتا-قايتا ورىنداپ, بوسقا ارامتەر بولدى. تانىمال بالۋانداردىڭ بويىنان جەڭىسكە دەگەن قۇلشىنىستى بايقامادىق. كوزدەرىندە وت جوق. كۇش-قۋاتتارى كەم. تاتاميدە جايباراقات ءجۇرىپ, سونىڭ سالدارىنان جەڭىلىستىڭ كەرمەك ءدامىن تاتتى. ءىرى دۇرمەكتەردە ابدەن ىسىلعان عۇسمان قىرعىزباەۆ (66 كگ) پەن عالىمجان قىرىقبايدان دا (+100 كگ) قايىر بولمادى. سول سەكىلدى عاليا تىنباەۆا (52 كگ), سەۆارا نىشانباەۆا (57 كگ), اناستاسيا ماياكوۆا (70 كگ), ارۋنا جانگەلدينا (78 كگ) جانە كاميلا بەرلىقاش تا (+78 كگ) سەنىم ۇدەسىنەن شىعا المادى.
حانچجوۋدا ءبىر التىن الماعاننىڭ سالدارىنان جالپى ەسەپتە 10-ورىندا قالىپ قويدىق. بۇعان دەيىنگى ازيا ويىندارىنىڭ بىردە-بىرەۋىندە ءدال وسىلاي تومەندەمەگەن ەدىك. الىسقا بارماي-اق, سوڭعى ءۇش جارىستى الايىق. 2010 جىلى گۋانچجوۋدا جاپونيا (7 التىن+5 كۇمىس+3 قولا), كورەيا (6+3+5), قىتاي (2+1+4), وزبەكستان (1+3+3) جانە موڭعولياعا (0+1+5) جول بەرىپ, التىنشى ورىنعا تابان تىرەدىك. 2014 جىلى ينچحوندا ۇزدىك تورتتىكتىڭ قاتارىنان كورىندىك. اتالعان جارىستا جەرلەستەرىمىزگە 6 (1+2+3) جۇلدە بۇيىردى. الدىمىزدا – جاپونيا (6+4+5), كورەيا (5+2+8) جانە موڭعوليا (3+3+3) قۇرامالارى. 2018 جىلى دجاكارتادا 5 رەت (1+1+3) جەڭىس تۇعىرىنا كوتەرىلىپ, ءۇشىنشى ساتىعا جايعاستىق. يندونەزيا استاناسىندا جاپونيا (9+3+1) مەن كورەيانىڭ (4+6+3) دزيۋدوشىلارى الدىمىزدى ورادى.
بيىلعى ازيادادا ادەتتەگىدەي جاپونياعا (5+3+2) تەڭ كەلەر كوماندا تابىلمادى. كۇنشىعىس ەلىنىڭ وكىلدەرى حانچجوۋدا ارالاس قۇرامدا ونەر كورسەتكەنىمەن, ولاردى ەشكىم تۇعىردان تايدىرا المادى. وزبەكستاننىڭ دا (3+2+4) قارقىنى وتە كۇشتى بولدى. قۇرامىندا وليمپيا ويىندارى مەن الەم چەمپيوناتتارىندا جۇلدە العان بەدەلدى بالۋاندارى بار كوماندا ەكىنشى ورىندى يەلەندى. تايپەي (2+0+0) ۇزدىك ۇشتىكتى تۇيىندەسە, ءتورتىنشى جانە بەسىنشى ساتىلارعا كورەيا (1+2+6) مەن قىتاي (1+2+3) تۇراقتادى.
جارايدى, جاپونيا مەن كورەيادا كۇرەستىڭ بۇل تۇرىندە جەڭىسپەن ورىلگەن باي ءداستۇر بار دەيىك. سول سەبەپتى دە الپاۋىتتاردان قالىپ قويعانىمىزعا اسا كۇيىنە قويمادىق. قىتايدىڭ دا جايى بەلگىلى. وزبەكستان مەن تايپەيدەن چەمپيوندار جىلدا شىعادى. ولار دزيۋدوعا مىقتاپ دەن قويعان. ال وسىدان بىرەر جىل بۇرىن عانا قالىڭ توپتىڭ اراسىندا جۇرگەن ءباا (1+1+3), تاجىكستان (1+1+1) جانە قىرعىزستان (1+0+0) قۇرامالارىنان قالىپ قويعانىمىز, ءتىپتى, ۇيات جاعداي بولدى.
ءباا ءوز كوماداسىن كىلەڭ لەگيونەرلەردەن جاساقتادى. سولاردىڭ اراسىنان سۋىرىلىپ شىققاندارى دا بار. داعىستاندىق ماگومەدامار ماگومەدوماروۆ (+100 كگ) باس جۇلدەنى ولجالادى. موڭعوليالىق بيشرەلتين حورلوودوي (52 كگ) كۇمىسپەن كۇپتەلسە, نارمانداح بايانمۇڭح (66 كگ) قولاعا قول سوزدى. ماسكەۋدە تۋىپ-وسكەن ارميان ۇلتىنىڭ وكىلى ارام گريگوريان (90 كگ) مەن ينگۋش جافار كوستوەۆ (100 كگ) ءۇشىنشى ساتىعا تابان تىرەدى.
تاجىكستاندا 81 كگ سالماق دارەجەسىندە كۇرەسەتىن سومون ماحمادبەكوۆ ەسىمدى قارۋلى جىگىت بار. جاسى 24-تە. پامير تاۋىنىڭ ەتەگىندە ازامات سوعىسىنىڭ وتى ورشىگەن تۇستا ماحامادبەكوۆتەر وتباسى تاۋلى باداحشان ايماعىنان سوناۋ سىبىرگە كوشىپ بارىپ, يركۋتسك قالاسىنان پانا تاپتى. سول جەردە سومون جارىق دۇنيەنىڭ ەسىگىن اشتى. بالا كەزىنەن دزيۋدومەن شۇعىلدانعان ول ۋاقىت وزا ەلەۋلى تابىستارعا قول جەتكىزدى. تاجىكستان قۇراماسى ساپىندا ماحامادبەكوۆ 2021 جىلى بىشكەكتەگى ازيا چەمپيوناتىندا قولا مەدالدى موينىنا ىلسە, 2022 جىلى استانادا كۇمىسكە قول سوزدى. مىنە, ەندى ازيا ويىندارىندا باس جۇلدەنى ولجالادى.
كەيىنگى جەتى-سەگىز جىلدا قىرعىزستاندا گرەك-ريم جانە ايەلدەر كۇرەسى كەرەمەت قارقىنمەن دامىپ كەلەدى. ءالى ەسىمىزدە عاسىرلار توعىسىندا سيدنەيدە الاۋى تۇتانعان وليمپيا ويىندارىندا قىرعىز ەلىنىڭ تۋى استىندا ونەر كورسەتكەن قازاقتىڭ ۇلى ايدىن سماعۇلوۆ قولا مەدال يەلەنىپ, الاتاۋدىڭ ارعى بەتىندەگى كورشىلەرىمىزدى قۋانىش پەن شاتتىققا بولەدى. سودان بەرى اتالعان مەملەكەتتەن ءدال سونداي بيىككە كوتەرىلگەن بىردە-ءبىر تاتامي شەبەرى شىقپادى. دەسەك تە, سوڭعى كەزدەرى ىلگەرىلەۋ بايقالدى. حانچجوۋدا 90 كگ سالماقتا كۇش سىناسقان 25 جاستاعى ەرلان شەروۆ باس جۇلدەنى قانجىعاسىنا بايلادى. جارتىلاي فينالدا ول توكيو وليمپياداسىنىڭ قولا جۇلدەگەرى, الەم جانە ازيا چەمپيونى, وزبەكستاندىق داۆلات بابونوۆتان باسىم ءتۇستى. ەر مىنەزدى ەرلاننىڭ جالعىز جۇلدەسىنىڭ ارقاسىندا قىرعىزدار جالپىكوماندالىق ەسەپتە قازاقتاردان وزدى. بۇل – قىرعىزستان دزيۋدوشىلارىنىڭ ازياداداعى العاشقى التىنى. سونداي-اق بۇل جارىستا جەرلەستەرىمىز موڭعوليادان دا (0+2+4) قالىپ قويدى.
مىنە, وسىلاي تىزبەكتەي بەرسەك, ەل سپورتىنىڭ ولقى سوعىپ تۇرعان تۇستارى از ەمەس ەكەنىنەن انىق اڭعارامىز. ەندى بىرەر كۇننەن كەيىن ەركىن, ايەلدەر جانە گرەك-ريم كۇرەسىنىڭ شەبەرلەرى بوزكىلەمگە شىعادى. بۇل جارىستاردا دا باسەكەلەستىك وتە كۇشتى بولماق. ءار جەكپە-جەكتە جەڭىسكە جەتىپ, جەڭىس تۇعىرىنا كوتەرىلۋ ءۇشىن ايانباي ايقاسۋ قاجەت. ويتكەنى سارى قۇرلىقتىڭ ەڭ بەلدى بالۋاندارى باس قوساتىن جارىستا ۇزدىكتەردىڭ قاتارىنا قوسىلۋ وڭاي شارۋا ەمەس. ازيادادا التىن الۋ – تەك مىقتىلاردىڭ مىقتىسىنىڭ عانا قولىنان كەلەتىن ءىس. سول «شايقاسقا» قازاق ەلىنىڭ ورەندەرى دايار ما؟ ونى حانچجوۋدىڭ بوزكىلەمى كورسەتەدى!
