فەستيۆالدە 6 شەتەلدىك جانە 8 قىرعىز تەاترى باق سىنادى. «ارت وردو – 2023» حالىقارالىق تەاتر فەستيۆالىنە ءار ەلدەن تەاتر قايراتكەرلەرى مەن تەاتر زەرتتەۋشىلەرى شاقىرىلدى. حالىقارالىق قازىلار القاسىن قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, جاستار تەاترىنىڭ كوركەمدىك جەتەكشىسى, پروفەسسور نۇرقانات جاقىپباي باسقاردى. سونىمەن قاتار قازىلار القاسىنىڭ قۇرامىندا وزبەكستاننىڭ حالىق ءارتىسى, وزبەكستاننىڭ ۇلتتىق اكادەميالىق دراما تەاترىنىڭ اكتريساسى گاۋحار زاكيروۆا, قىرعىز رەسپۋبليكاسىنىڭ حالىق ءارتىسى, قازاقستاننىڭ ەڭبەك سىڭىرگەن ءارتىسى, اكتريسا گۇلسارا اجىبەكوۆا, ازەربايجاننىڭ حالىق ءارتىسى, ازەربايجاننىڭ ەڭبەك سىڭىرگەن مادەنيەت قايراتكەرى, تەاتر جانە كينو اكتەرى, رەجيسسەر دجاحانگير مۋتالليب وگلى نوۆرۋزوۆ, قىرعىزستان تەاتر قايراتكەرلەرى وداعىنىڭ پرەزيدەنتى, ونەرتانۋ كانديداتى جانىش قۇلمامبەتوۆ, تەاتر سىنشىسى, ونەرتانۋ كانديداتى ايسۇلۋ ساعيتوۆا (باشقۇرتستان, رەسەي), تەاتر سىنشىسى جانە رەجيسسەرى يسمايل ديكيليتاش (تۇركيا) بولدى.
حالىقارالىق قازىلار القاسى «ۇزدىك قويىلىم» – باس جۇلدە, «ۇزدىك رەجيسسەر», «ۇزدىك ستسەنوگرافيا», «ۇزدىك ەر ادام ءرولى», «ۇزدىك ايەل ادام ءرولى», «ەكىنشى پلانداعى ەر ادام ءرولى», «ەكىنشى پلانداعى ايەل ادام ءرولى», «سىنشىلار كوزايىمى» اتالىمدارى بويىنشا جۇلدەگەرلەردى انىقتادى.
قىرعىزستان كورەرمەنى قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ سپەكتاكلىن زور ىقىلاسپەن قابىلدادى. ساحنادا اكتەرلەردەن باسقا, وركەستر دە ونەر كورسەتتى. بۇل درامالىق شىعارمانىڭ اسەرىن ارتتىرا ءتۇستى. حالىق اسپاپتار وركەسترى بارلىق مۋزىكالىق پارتيالاردى جاندى مانەردە ورىنداپ, سپەكتاكلگە وزگەشە سيپات بەردى. ساحنادا ەسكى زامان حيكاياسى زاماناۋي اۋەنمەن ءوربىپ وتىردى. ءتىپتى مايكل دجەكسوننىڭ اندەرىنەن دە ءۇزىندى ورىندالدى. وسىلايشا, اۆتور كلاسسيكالىق قۇر بايانداۋدان باس تارتىپ, قوزى كورپەش پەن بايان سۇلۋدىڭ ماحاببات حيكاياسىن زاماناۋي تاسىلدە جەتكىزە بىلگەنى ءۇشىن قاللەكي تەاترىنىڭ ۇجىمى ع.مۇسىرەپوۆتىڭ «قوزى كورپەش – بايان سۇلۋ» سپەكتاكلى ءۇشىن گران-پري جۇلدەسىمەن جانە تۇركسوي حالىقارالىق تۇركى مادەنيەتى ۇيىمىنىڭ ارنايى سىيلىعىمەن ماراپاتتالدى.
قويۋشى رەجيسسەر – گۇلناز بالپەيىسوۆا, ديريجەر – مارالجان مىرزاقۇلوۆا, قويۋشى سۋرەتشى – قانات ماقسۇتوۆ, كيىم سۋرەتشىسى – الما سىرباەۆا, حورەوگراف – يلميرا يمانعازينا, كومپوزيتور – ولەگ سينكين.
سپەكتاكلدە قازاقستاننىڭ ەڭبەك سىڭىرگەن قايراتكەرى ا.نوگەربەك, «دارىن» مەملەكەتتىك جاستار سىيلىعىنىڭ لاۋرەاتى ج.ەربولات, «سەرپەر» سىيلىعىنىڭ لاۋرەاتتارى – ش.ورداباەۆ, و.جاقىپبەك, اكتريسا ا.جەتپىسباەۆا, اكتەر ن.ەسەن, م.نامەنوۆ, ب.شالقار, س.انۆاروۆا, ب.قاليلا, ا.مامىر, ءا.بەكتاس, م.ماكيباەۆا جانە حالىق اسپاپتار ءانسامبلى ونەر كورسەتتى.
