عاسىر جاساعان گازەتتىڭ مەرەيتويى اتالىپ ءوتىپ, بۇرىنعى عيماراتىنا, ومىردەن وتكەن قىزمەتكەرلەرى تۇرعان ۇيلەرگە ەسكەرتكىش تاقتا ورناتىلدى. بىرنەشە قىزمەتكەردىڭ ەسىمى كوشەگە بەرىلدى. وڭىردەگى باسىلىمداردى بىرىكتىرىپ وتىرعان «اتىراۋ-اقپارات» جشس عيماراتىندا گازەت مەرەيتويىنا ارنالعان كورمە ۇيىمداستىرىلدى. كورمەگە باسىلىمنىڭ ءبىر عاسىرلىق بەلەسىنەن سىر شەرتەتىن جادىگەرلەر توپتاستىرىلدى. ال «قالام ۇشىنداعى عاسىر» اتتى سالتاناتتى كەشتە 100 جىلدىق تاريحي شەجىرە تەاترلاندىرىلعان كورىنىسپەن ارلەندى.
ء«بىر عاسىر بۇرىن «ەرىك» اتاۋىمەن جارىققا شىعىپ, قوعامدىق دامۋدىڭ ءار كەزەڭىنە ساي وقىرمانىنا تۇششىمدى ماقالالار, ءوڭىردىڭ ماسەلەسى مەن جەتىستىگىن جاريا ەتكەن گازەتتىڭ تاريحى ءالى جالعاسادى. بۇل گازەتتە تەك جەرگىلىكتى قالامگەرلەر ەمەس, ۇلت ادەبيەتىنە مول مۇرا قالدىرعان اسقار توقماعامبەتوۆ, زەينوللا قابدولوۆ, فاريزا وڭعارسىنوۆا, ءابىش كەكىلباەۆ سەكىلدى جازۋشىلاردىڭ قولتاڭباسى بار. وسى كەزەڭدە بىرنەشە بۋىن الماستى. گازەت ۇجىمى ۇدايى وبلىس تۇرعىندارىنىڭ مۇڭ-مۇقتاجىن جوقتاپ, ار-نامىسىن قورعادى. تۇرعىنداردىڭ الەۋمەتتىك ماسەلەسىن باتىل كوتەرىپ كەلەدى», دەدى وبلىس اكىمى سەرىك شاپكەنوۆ.
گازەت ۇجىمىن مەرەيتويىمەن قۇتتىقتاۋشىلار لەگى از بولمادى. مەملەكەتتىك كەڭەسشى مەن پرەمەر-مينيستر قۇتتىقتاۋ حات جولدادى. اسىرەسە استانا مەن الماتىدان, قىزىلوردا مەن اقتاۋدان ارنايى قۇتتىقتاۋعا كەلگەن ارىپتەستەردىڭ ورنى بولەك. بۇرىن «اتىراۋ-اقپارات» مەدياحولدينگىنە جەتەكشىلىك ەتكەن, قازىر «قازاق گازەتتەرى» جشس باس ديرەكتورىنىڭ ورىنباسارى ەربولات قامەن مەن «ايقىن-ليتەر» جشس ديرەكتورى ىسقاق ەگەمبەرديەۆتىڭ جۇرەكجاردى قۇتتىقتاۋى باسىلىم قىزمەتكەرلەرىنە سەرپىن بەردى. سونداي-اق «الاتاۋ اقپارات» جشس باس ديرەكتورى ەرجان قالىمباي ۇلى, «سىر-مەديا» جشس امانجول وڭعارباەۆ, «ماڭعىستاۋ مەديا» جشس ديرەكتورى گۇلميرا ابىشەۆا قۇتتىقتادى.
بۇل كۇنى گازەت قىزمەتكەرلەرى ماراپاتقا يە بولدى. ءبىر توبى «اقپارات سالاسىنىڭ ۇزدىگى» توسبەلگىسىمەن, ەندى ءبىر شوعىرى سەنات پەن ءماجىلىس توراعالارىنىڭ العىس حاتىمەن ماراپاتتالدى. ءبىر توپ تىلشىگە وبلىس اكىمىنىڭ العىس حاتى بەرىلدى.
اتىراۋ وبلىسى
