سوڭعى ەكى ماۋسىمدا ول قازاقستان چەمپيوناتىنىڭ ۇزدىك سۇرمەرگەنى اتانعان ول وسى جەتىستىگى جايلى: «وزىمە دەگەن سەنىمدىلىگىمنىڭ ارقاسىندا ءۇشىنشى جىلىمدى ويداعىداي اياقتادىم. ماعان بەرىلگەن باستى تاپسىرما – گول سوعۋ. الاڭدا جۇرگەنىمدە تەك وسى جاعىن عانا ويلايمىن. كوڭىلىمدەگى كىربىڭدى جويۋ ءۇشىن قارسى قاقپاعا گول سوعۋىم كەرەك. جانكۇيەرلەردىڭ ارتقان سەنىمى ماعان ەرەكشە كۇش بەرەدى», – دەدى ول.
جاسىنداي جارقىلداپ جۇرگەن ويىنشى ايگىلى كلۋبتاردىڭ كوزىنە تۇسپەۋى مۇمكىن ەمەس. بىراق ول «قايراتتان» كەتەر مە ەكەن؟
«راس, ماعان بىرنەشە كلۋب قىزىعۋشىلىعىن ءبىلدىردى. بىراق قازىرگى كومانداممەن كەلىسىمشارتىم ءالى ءبىر جىلعا دەيىن جارامدى. ناقتىراق ايتار بولسام, ارابتاردان, قىتايدان, سونداي-اق ەۋروپادان بىرنەشە ۇسىنىس كەلىپ تۇسكەن. ازىرگە «قايراتتار» كەتەر ويىم جوق», – دەدى جەرار.
كەي فۋتبولشىلار بىرنەشە كوماندا اۋىستىرعانمەن, ءوزىنىڭ ستيلىنە كەلەتىن كلۋبتى ارەڭ جولىقتىرىپ جاتادى.
«26-28 جاستا ويىنشىلارعا ەرەكشە كۇش ءبىتىپ, فۋتبولدىڭ نە ەكەنىن شىنايى تۇردە سەزىنىپ جاتادى. مەن دە ءدال قازىر سول جاستامىن. ءوزىمدى دامىتۋ ءۇشىن كۇن سايىن ەڭبەكتەنەمىن. ال «قايرات» ماعان ءبارىن بەرگەن كوماندا. ءبىر كەزدەرى رەسەيدىڭ «كراسنودارىندا» ازداپ دوپ تەۋىپ ۇلگەردىم. ۇزدىكتەردىڭ ءبىرى ەكەنىمدى دالەلدەۋىم ءۇشىن الاڭعا ءجيى شىعۋىم كەرەك. بىراق ىلعي دا شەت قالىپ جاتتىم. كوماندام جەڭىسكە جەتىپ جاتقاننىڭ وزىندە كوڭىلىمدەگى مۇڭ سەيىلە قويمادى. ەگەر مۇمكىندىگىم كوپ بولعاندا ناتيجەلى فورۆاردتىڭ ءبىرى بولار ەدىم», – دەپ ەسكە الدى.
سۇحباتتارىنىڭ بىرىندە ول اندرەي ارشاۆين مەن اناتولي تيموششۋكتى بۇعان دەيىنگى ارىپتەستەرىنىڭ ىشىندەگى ەڭ ۇزدىگى دەپ اتاعان بولاتىن. نەلىكتەن؟
«تيموششۋك بۋندەسليگاداعى ايگىلى «باۆاريا» كومانداسىندا, ال ارشاۆين «ارسەنال» مەن رەسەي قۇراماسىندا كوشباسشى ويىنشىلاردىڭ ءبىرى بولدى. الەمدىك دەڭگەيدەگى قوس جىگىت بىزگە كەلىپ, كاسىبي دەڭگەيگە كوتەرىلۋىمىزگە سەپتىگىن تيگىزدى. «قايرات» ماعان دەيىن دە وزىندىك ورنىن قالىپتاستىرىپ قويعان, ال تاڭداۋلى لەگيونەرلەر كەلگەننەن كەيىن جاقسارا ءتۇستى. قايرات بورانباەۆ (كلۋب باسشىسى) كوماندانى دامىتۋ ءۇشىن ۇلكەن ىستەر اتقارىپ ءجۇر», – دەدى يۆۋار ويىنشىسى.
مانسابىن اياقتاعان اناتولي جاتتىقتىرۋشى بولۋى مۇمكىن ەكەندىگى جونىندە اقپارات بىرنەشە رەت تاراعان. فۋتبولدا ادام جاقسى ويىنشى بولعانمەن, باپكەر رەتىندە ءوزىن وڭ قىرىنان كورسەتە المايتىندار جەتەدى. ماسەلەن, ايگىلى مارادونانى الايىق. ارگەنتينانى الەم چەمپيوندىعىنا سۇيرەگەنمەن, باپكەرلىك جولدا گەرمانيادان ويسىراي ۇتىلىپ, ورنىنان قۋىلعانى بار. ال تيموششۋكتىڭ جولى قانداي بولماق؟
«ول الاڭدا بىزگە ءجون سىلتەيتىن جانداردىڭ ءبىرى بولاتىن. فۋتبولدىڭ قىر-سىرىن جەتىك بىلەدى. بۇل ىستە دە ۇلكەن جەتىستىكتەرگە جەتەتىنىنە سەنىم ارتامىن. الەمدىك فۋتبولدا ۇلكەن بەلەستەردى باعىندىرۋىنا تىلەكتەسپىن!» – دەدى.
جاقىندا ول قازاقستان ۇلتتىق قۇراماسىنىڭ نامىسىن قورعاعىسى كەلەتىنىن مالىمدەگەن بولاتىن. «مەن ۇلى دالا ەلىنە كوشىپ كەلگەنىمە ەكى جىلدان استى. جۋرناليستەر دە, جانكۇيەرلەر دە وسى سۇراقتى ءجيى قويادى. مەن ارينە, دايىنمىن. بىراق بۇل ءىس جۇزەگە اسۋى ءۇشىن ءبىرىنشى مەنىڭ تولقۇجاتىم بولۋى كەرەك ءارى فەدەراتسيادان ۇسىنىس ءتۇسۋى كەرەك», – دەپ اعىنان جارىلدى ول.
الماتىنىڭ كومانداسى وتكەن ماۋسىمدا چەمپيوندىقتان كەزەكتى مارتە قۇر قالىپ, ەل كۋبوگىنىڭ فينالىندا «استاناعا» جول بەرگەن.
«ءبىر جاعىنان الىپ قارايتىن بولساق, ماۋسىمدى جاقسى اياقتادىق دەپ ايتۋعا بولادى. «قايراتتى» قازاقستاننىڭ ۇزدىك كلۋبى دەپ سەنىمدى تۇردە ايتا الامىن. «استانامەن» ءتورت مارتە كەزدەسىپ, ۇشەۋىندە جەڭىسكە جەتتىك. ال فينالدا اۋا رايىنىڭ قولايسىزدىعىنا بايلانىستى ەسە جىبەردىك. كوبىنە كومبيناتسيالى فۋتبولعا ۇيرەنگەندىكتەن, تولاسسىز جاۋعان قاردىڭ سالدارىنان بۇل جوسپارىمىزدى جۇزەگە اسىرا المادىق», – دەدى گوۋ.
يۆۋار ويىنشىسى بۇعان دەيىن ارىپتەستەرىنىڭ ازىلگە جاقىن ەكەندىگىن مالىمدەگەن.
«بىزدە ەشكىمگە كورسەتۋگە بولمايتىن ءبىر ۆيدەو بار. بىراق ونى الەۋمەتتىك جەلىلەرگە شىعارمايمىن, جۋرناليستەرگە كورسەتپەيمىن. بىردە يسلامبەك قۋات كيىم سالاتىن سومكەمە ويىنشىق ورمەكشىنى سالىپ قويىپ, بۇكىل كوماندا بولىپ, وسىنى ءتۇسىرۋ ءۇشىن تىعىلىپ كۇتىپ وتىرعان ەكەن. بولمەگە كىرىپ كەلىپ, سومكەمدى اشا بەرگەنىم سول ەدى الگى ويىنشىق كوز الدىما ءتىرى جاندىك سياقتى ەلەستەپ, شوشىپ كەتتىم. بۇل جايتتى ەشقاشان ۇمىتپاسپىن», – دەپ ەسكە الدى.
بولاشاعىنان زور ءۇمىت كۇتتىرەتىن باۋىرجان يسلامحان 23 جاسىندا كاپيتان بولىپ ۇلگەردى. پرەمەر-ليگانىڭ بىرنەشە رەت ۇزدىك ويىنشىسى اتاندى.
«ول جوعارى دەڭگەيلى چەمپيوناتتاردا ويناۋعا قابىلەتتى. جاس بولسا دا بىزگە باس بولىپ ءجۇر. وسى قالپىندا توقتاپ قالماي, شىڭدالىپ, ءبىراز بەلەستەردى باعىندىرادى دەپ ۇمىتتەنەمىن», – دەدى ارىپتەسى جايلى.
«استانا» مەن «شاحتەر» چەمپيوندار ليگاسى مەن ەۋروپا ليگاسىنىڭ توپتىق كەزەڭىندە ويناپ ۇلگەردى. ەندىگى قازاق جانكۇيەرلەرى تاريحى تەرەڭ «قايراتتان» دا وسى ناتيجەنى كۇتىپ جۇرگەنى بەلگىلى.
«قازاقستان كوماندالارىنىڭ مۇنداي چەمپيوناتتاردا وزدەرىن كورسەتكەنىنە ىشتەي قۋانامىن. قازاق فۋتبولىنىڭ دامۋى ءۇشىن مۇنىڭ ۇلكەن سەپتىگى تيەدى. ال ءبىز كەلەسى ماۋسىمدا وسى ناتيجەگە قول جەتكىزەمىز دەپ ۇمىتتەنەمىن. كوماندامىز ءۇشىن دە, جىگىتتەر ءۇشىن دە بۇل جاقسى بولار ەدى. ءار ماۋسىم سايىن وسىعان جەتسەك ەكەن دەپ ارماندايمىز. بىراق بولماشى ءبىر قاتەلىكتىڭ سالدارىنان جولىمىز بولماي كەتەدى. ماسەلەن, «ماككابيگە» قارسى ءبىرىنشى ويىننىڭ سوڭعى سەكۋندتارىندا گول جىبەرىپ قويساق, 2015 جىلى «بوردوعا» قارسى ماتچ تا ءدال وسىلاي ءوربىدى. ىرىكتەۋ كەزەڭىندە وزگەلەرگە قاراعاندا جولىمىز ۇزاق, ءتورت ۇجىممەن كەزدەسەمىز. دەگەنمەن, توپتىق كەزەڭگە ءتۇسۋ ءۇشىن بارىمىزدى سالامىز», – دەدى گوۋ.
