ۇلتتىق مۋزىكا – ەلدىڭ مادەنيەتىمەن تانىسۋدىڭ تاماشا ءتاسىلى. وسىنى ەسكەرگەن باعدارلاما اۆتورى, قازاقستاننىڭ ەڭبەك سىڭىرگەن قايراتكەرى ابزال مۇحيتدين وتاندىق كومپوزيتورلاردىڭ تۋىندىلارىنا ايرىقشا كوڭىل ءبولدى. العاش رەت «استانا وپەرا» سيمفونيالىق وركەسترى مەن حورىنىڭ سۇيەمەلدەۋىمەن وپەرا ترۋپپاسىنىڭ ورىنداۋىندا م.تولەباەۆتىڭ ء«بىرجان – سارا» وپەراسىنان ۇزىندىلەر, ت.قاجىعاليەۆتىڭ «دالا اڭىزى» سيۋيتاسىنان «قىز قۋ» سيمفونيالىق سكەرتسوسى, ابايدىڭ «ايتتىم سالەم, قالامقاس» ءانى, س.مۇحامەدجانوۆتىڭ «ايسۇلۋ» وپەراسىنان سەركە كاۆاتيناسى تبيليسيدە شىرقالدى.
تەاتر ۇجىمى ۇلتتىق مۋزىكامەن قاتار, الەمدىك كلاسسيكادان – دج.ءپۋچچينيدىڭ «توسكا» جانە «تۋراندوت», ج.بيزەنىڭ «كارمەن», دج.ءروسسينيدىڭ «جىبەك ساتى», ج.وففەنباحتىڭ «گوفمان ەرتەگىلەرى», گ.دونيتسەتتيدىڭ «دون پاسكۋالە» وپەرالارىنان جانە تاعى باسقالارىنان تانىمال ءارى كوپشىلىك ۇناتاتىن اريالار مەن دۋەتتەر ۇسىندى. قازاقستاندىق ارتىستەر مەن مۋزىكانتتاردىڭ گرۋزين ۇلتتىق كلاسسيكاسى سانالاتىن ۆ.دوليدزەنىڭ «كەتو مەن كوتە» وپەراسىنان ءبيدى جانە ز.ءپالياشۆيليدىڭ «دايسي» وپەراسىنان دۋەتتى ورىنداۋى تبيليسيلىك تىڭدارماندار ءۇشىن كەرەمەت توسىن سىي بولدى.
كورەرمەندەر «استانا وپەرانىڭ» جەتەكشى سوليستەرى, قازاقستاننىڭ ەڭبەك سىڭىرگەن قايراتكەرلەرى سالتانات احمەتوۆا, ايگۇل نيازوۆا, جانات شىبىقباەۆ, مەدەت شوتاباەۆ, مەيىر باينەشكە, سونداي-اق حالىقارالىق جانە ۇلتتىق بايقاۋلاردىڭ لاۋرەاتتارى گۇلجانات ساپاقوۆا, تاتيانا ۆيتسينسكايا, ەۆگەني چاينيكوۆ, ەرجان سايپوۆ, ارتۋر گابديەۆكە قوشەمەت كورسەتتى. ە.حاسانعاليەۆتىڭ «اتامەكەن» رۋحتى ءانىن بارلىق ءارتىستىڭ ورىنداۋى كەشتىڭ جارقىن قورىتىندىسى بولدى. مادەنيەت جانە اقپارات مينيسترلىگى مەن گرۋزياداعى قازاقستان ەلشىلىگىنىڭ قولداۋىمەن وتكەن كونتسەرتتىڭ رەجيسسەرى رەتىندە ەرەنباق تويكەنوۆ تەر توكتى.
– بۇگىنگى كەرەمەت كەشتەن العان اسەرىم دە, تاڭدانىسىم دا ەرەك. ويتكەنى مەن بۇگىن قازاق مۋزىكاسىمەن تانىستىم. ساحنالىق كوستيۋمدەردىڭ كوپشىلىگى گرۋزيالىق سۋرەتشىنىڭ قولىنان شىققانى دا مارقايتىپ تاستادى. جالپى, ترۋپپانىڭ اسىرەسە گرۋزين اندەرىن اسقان شەبەرلىكپەن شىرقاعان تالانتىنا ءتانتى بولدىم. وسى مۋزىكالىق كەشتەن كەيىن ولار مەندەي جالىنداعان كورەرمەنگە يە بولدى. سىزدەر ءبىزدىڭ جاققا ءجيى كەلەدى دەگەن سەنىمدەمىن. ويتكەنى مۇنداي تاماشا ونەر كورسەتۋدى جالعىز مەن عانا ەمەس, كەلەسى جولى وتباسى, دوستارىم دا كورسە, تىڭداسا ەكەن دەيمىن. قاي جەردە ونەر كورسەتسە دە, «استانا وپەرا» تەاترىنىڭ جانكۇيەرىمىن, – دەدى گرۋزين تەلەۆيزياسىنىڭ ءجۋرناليسى نينو راميشۆيلي.
قازاقستاندىق ۇجىمنىڭ كورسەتكەن ونەرى تالعامپاز كورەرمەننىڭ دە كوڭىلىنە زور سەرپىلىس سىيلادى. ونى كونتسەرتتەن شىققاننان كەيىنگى تىڭدارماندار تاڭدانىسى قۋاتتادى:
– جۇرەگىمە جىلۋ بەرگەن وسىناۋ تاماشا كونتسەرت ءومىر بويى جادىمدا جاتتالارى ءسوزسىز. اسىرەسە دومبىرانىڭ جاندى داۋىسى ەرەكشە اسەر ەتتى. زالدا وتىرعانداردىڭ كوپشىلىگى وسى اسپاپتىڭ داۋىسىن العاش رەت ەستىپ وتىر. ارتىستەردىڭ كاسىبي بىلىكتىلىگى كوڭىلگە قۇرمەت ورنىقتىرادى. بارەكەلدى! – دەدى كونتسەرتتەن كەيىن ءوز اسەرىمەن بولىسكەن داۆيد بيسەيشۆيلي.
ش.رۋستاۆەلي اتىنداعى ۇلتتىق مەملەكەتتىك اكادەميالىق تەاترىنىڭ تاريحي ساحناسىنداعى «تبيليسيدەگى دالا ءۇنى» كونتسەرتى «استانا وپەرانىڭ» XI تەاتر ماۋسىمىنداعى العاشقى گاسترولدىك ونەر كورسەتۋى بولدى. تەاتر باسشىلىعى اتاپ وتكەندەي, گرۋزيالىق كورەرمەندەر قوشەمەتىنە بولەنىپ, ەلگە تابىستى ورالعان «استانا وپەرانىڭ» ارتىستەرى مەن مۋزىكانتتارىن الدا وتاندىق جانە شەتەلدىك كلاسسيكالىق ونەر جانكۇيەرلەرىمەن تاعى دا كوپتەگەن جارقىن جۇزدەسۋ مەن كەرەمەت كەزدەسۋ كۇتەدى.
