– جەڭىسكە جەتكەنىمە وتە قۋانىشتىمىن. ەڭ ءبىرىنشى ماقسات فينالعا ىلىگۋ, مەدال الۋ بولدى, – دەپ باستادى اسەم اڭگىمەسىن.
– بۇگىن ەكى مەدال بۇيىردى. كوماندالىق سايىستا – التىن, جەكەلەي سىندا قولا مەدال جەڭىپ الدىم. ەندى قولدان كەلگەننىڭ بارلىعىن جاسادىق. كوماندالىق جارىستىڭ فينالى وتە تارتىستى ءوتتى. سوڭعى مۇمكىندىككە دەيىن قىتاي قۇراماسىنان ۇتىلىپ كەلە جاتقانبىز. بىراق سوڭعى سەرياعا دەيىن بار كۇشىمىزدى سالدىق. سونىڭ ناتيجەسىندە جەڭىسكە جەتتىك. قىتاي مەرگەندەرى وتە مىقتى, مويىنداۋ كەرەك. ولار تەك ازيادا عانا ەمەس, الەم بويىنشا مىقتى قۇرامالاردىڭ ءبىرى سانالادى. قىتايعا كەلىپ التىن الۋ دەگەن, – ءبىز ءۇشىن كەرەمەت ناتيجە.
بۇگىندە حانچجوۋدا كۇن ىستىق, اۋا رايى ىلعالدى بولىپ تۇر. ءبىزدىڭ سپورتشىلاردىڭ ناتيجەسىنە بۇل فاكتور دا اسەر ەتكەن سىڭايلى.
– جالپى وڭاي بولعان جوق. كۇن ىستىق. سول جاعى كەدەرگى كەلتىردى. سوعان قاراماستان بارىنشا تىرىستىق. التىن العاننان كەيىن ۇستىمىزدەن جۇك تۇسكەندەي بولدى. فينال وڭاي بولمايتىنىن ءبىلدىم. قىتاي قۇراماسىنىڭ قولداۋى, جانكۇيەرلەرى وتە مىقتى ەكەنىن وزدەرىڭىز دە كورىپ جۇرسىزدەر عوي. بارعا قاناعات ەتۋشى حالىقپىز, جەكەلەي سايىستا قولا مەدالعا دا شۇكىر ەتەمىن. ەڭ باستىسى, كوماندالىق سايىستا التىن الدىق. ماڭىزدىسى دا سول, – دەيدى اسەم.
ءبىر قىزىعى, اسەمنىڭ چەمپيون بولعانىن اناسى ءاليا مەتەرباەۆا ساباق ۇستىندە ەستىپتى. ول اۋىلىنا حابارلاسىپ, ءبىرىنشى كەزەكتە اناسىن قۇتتىقتاعانىن ايتتى.
– اكەمنىڭ اتى-ءجونى – مارات مەتەرباەۆ. ول كىسى جۇرگىزۋشى. انامنىڭ ەسىمى – ءاليا, الماتى وبلىسى ىلە اۋدانى ىنتىماق اۋىلىنىڭ ءال-فارابي اتىنداعى №46 مەكتەبىنىڭ اعىلشىن ءتىلى ءپانىنىڭ مۇعالىمى. 35 جىلدىق ەڭبەك ءوتىلى بار. كەلەر جىلى زەينەتكە شىعادى. ءوزىم دە سول مەكتەپتە ءبىلىم الدىم. اۋىلىمىزدا ەكى مەكتەپ بار. الماتىنىڭ ىرگەسىندە تۇرعاندىقتان, مۇندا شامامەن 5 مىڭداي حالىق تۇرادى. مەن الدىمەن, اناما حابارلاسىپ, قۇتتىقتادىم. سويتسەم, انام ءبىزدىڭ چەمپيون بولعانىمىزدى ساباق ۇستىندە مۇعالىمدەر مەن وقۋشىلار قۇتتىقتاپ كەلگەندە ەستىپتى. اۋىلعا كوپ بارا بەرمەيمىن. ۇنەمى جاتتىعۋ جيىندارىندا, جارىستا جۇرەمىن. جىلىنا انامدى وتىز كۇن كورەمىن بە, جوق پا, بىلمەيمىن. الايدا سول ەڭبەگىم زايا كەتپەي, جۇلدە العانىما ريزامىن, – دەدى ول.
كەيىپكەرىمىز بۇل جەڭىس قاجىرلى ەڭبەكتىڭ ارقاسىندا كەلگەنىن ايتىپ, الداعى ۋاقىتتاعى جوسپارىمەن ءبولىستى.
– بۇل جەڭىس بىزگە وڭاي كەلمەدى. تالاي جىلعى ەڭبەكتىڭ اقتالعانىنا شۇكىرلىك ەتەمىن. وسى جەڭىستىڭ بارلىعى ەڭبەك پەن جاۋاپكەرشىلىكتىڭ جەمىسى. مەن ادىلدىكتى, جاۋاپكەرشىلىكتى جاقسى كورەمىن. مۇمكىن بولعان جاعدايدا تۋىستارىما, دوستارىما كوڭىل ءبولىپ قولىمنان كەلگەنشە كومەكتەسەمىن. ستەند اتۋعا قىزىعۋشىلىعىم 8-سىنىپتا باستالدى. العاشىندا باپكەرلەر مەنىڭ تىم كەش كەلگەنىمدى ايتىپ, ۇيىرمەگە العىسى كەلمەدى. بىراق مەن ءوزىمنىڭ ەپتىلىگىمدى كورسەتىپ, تەز ۇيرەنىپ الدىم. مىنە, سودان كەيىن ۇلتتىق قۇراماعا ىلىگىپ, ەلىمىزدىڭ نامىسىن قورعاپ ءجۇرمىن. بيىل الەم كۋبوگىندە توپ جاردىم. ازيا ويىندارىنان ەكى جۇلدە ەنشىلەدىم, – دەدى چەمپيون.
اسەم ەگىزدىڭ سىڭارى ەكەن. سونداي-اق ول تۇرمىس قۇرماعانىن, بيىلدان قالماي تۇرمىسقا شىعاتىنىن ايتتى.
– ۇيدە ءۇش بالامىز. مەن – ەگىزدىڭ سىڭارىمىن. اسەت ەسىمدى سىڭارىم مەن ۇلكەن اعام بار. ولاردىڭ ارقايسىسى ءوز شارۋاسىمەن جۇرگەن جاندار. تۇرمىس قۇرماعانمىن. اللا ءناسىپ ەتسە, بيىلدان قالماي كۇيەۋگە شىعامىن. بولاشاق جارىمدى تانيسىزدار, بىراق ەسىمىن ايتپايمىن. كەيىن بىلە جاتارسىزدار, – دەدى ازيا ويىندارىنىڭ جەڭىمپازى.
