ماۋلەن اشىمباەۆ شەتەلدىك ارىپتەستەرىنە ءىلتيپات ءبىلدىرىپ, بۇگىندە قازاقستان مەن ۆەتنام اراسىندا جوعارى دەڭگەيدە سىندارلى جانە ءوزارا سەنىمگە نەگىزدەلگەن ديالوگ ورناعانىن اتاپ ءوتتى. الداعى ۋاقىتتا ەكى ەلدىڭ مەملەكەت باسشىلارى بەلگىلەپ بەرگەن ءوزارا ءىس-قيمىلدىڭ وسى قارقىنىن ءارى قاراي جالعاستىرۋدىڭ ماڭىزى زور.
«قازاقستان پرەزيدەنتى قاسىم-جومارت توقاەۆتىڭ ۆەتنامعا رەسمي ساپارى ەكىجاقتى بايلانىستى دامىتۋعا تىڭ سەرپىن بەردى. ساپار اياسىندا ىنتىماقتاستىقتىڭ ءتۇرلى سالاسى بويىنشا ماڭىزدى قۇجاتتارعا قول قويىلدى. پارلامەنتارالىق ىنتىماقتاستىق ەكىجاقتى قارىم-قاتىناستاردىڭ ماڭىزدى بولىگى ەكەنى ءسوزسىز. بۇگىنگى كەزدەسۋ اتالعان ساپار بارىسىندا قول جەتكىزىلگەن ۋاعدالاستىقتاردىڭ ناتيجەسى ەكەنىن دە اتاپ وتكەن ءجون. الداعى ۋاقىتتا سالالىق كوميتەتتەر مەن «قازاقستان – ۆەتنام» دوستىق توپتارىنىڭ دەپۋتاتتارى اراسىندا ءتيىمدى بايلانىس ورناتۋ زاڭنامالىق باعىتتا تاجىريبە الماسۋ جولىنداعى ناقتى قادام بولارى انىق», دەدى م.اشىمباەۆ.
سەنات سپيكەرى وڭىرارالىق دامۋ اياسىندا قازاقستاننىڭ وبلىستارى مەن ۆەتنامنىڭ پروۆينتسيالارى اراسىنداعى ىنتىماقتاستىقتى نىعايتۋعا قاتىستى ۇسىنىس ايتتى.
سونىمەن قاتار كەزدەسۋ بارىسىندا تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ الەۋەتىنە نازار اۋداردى. سەنات توراعاسى مەملەكەت باسشىسى قازاقستان حالقىنا جولداۋىندا ايتقان ەكونوميكالىق رەفورمالارعا دا توقتالىپ ءوتتى. ماۋلەن اشىمباەۆ كەشەندى رەفورمالاردى ىسكە اسىرۋدىڭ ناتيجەسىندە شەتەلدىك ينۆەستورلار ءۇشىن ءتۇرلى سالادا جاڭا مۇمكىندىكتەر پايدا بولىپ جاتقانىن اتاپ ءوتتى.
ءوز كەزەگىندە ۆەتنام ۇلتتىق جينالىسى توراعاسىنىڭ ورىنباسارى نگۋەن حاك دين ەلىمىزدە جۇرگىزىلىپ جاتقان الەۋمەتتىك-ەكونوميكالىق جانە ساياسي رەفورمالاردى جوعارى باعالاپ, كوپجاقتى ىنتىماقتاستىقتى ودان ءارى كەڭەيتۋگە مۇددەلى ەكەنىن ءبىلدىردى.
