بەلگرادتا بوزكىلەمگە شىققان قازاقستاننىڭ گرەك-ريم كۇرەسى شەبەرلەرى تەگىستەي جەڭىلگەننەن كەيىن بارشا جانكۇيەر 32 جاستاعى نۇرسۇلتان تۇرسىنوۆتىڭ جولىنا ۇمىتپەن قارادى. 87 كيلو سالماق دارەجەسىندە بەلدەسكەن قانداسىمىز العاشقى اينالىمداردا يتاليالىق ميركو مينگۋتستسي مەن وڭتۇستىككورەيالىق سانحەن پاركتان باسىم ءتۇسىپ, شيرەك فينالدا ازيانىڭ ءۇش دۇركىن چەمپيونى يراندىق ناسەر اليزادەنى قاپى قالدىردى. سول كەزدە قازاق جانكۇيەرلەرى ءبىر سەرپىلىپ قالدى. جارتىلاي فينالدا ول بيىلعى ەۋروپا چەمپيوناتىنىڭ كۇمىس جۇلدەگەرى تۇركيالىق ءالي شىڭعىستى ءبىراز ۇپاي ايىرماشىلىعىمەن جەڭىپ جاتقان ەدى. سول باسىمدىقتى ۇستاپ قالۋدىڭ ورنىنا نۇرسۇلتان ءاليدى كوتەرىپ الىپ, قوس جاۋىرىنىمەن جەرگە قاداۋعا ارەكەتتەندى. اسىعىس جاسالعان ءادىس وپىق جەگىزدى. ءوزى قارسىلاسىنىڭ استىنا ءتۇسىپ قالدى. شىڭعىس ءوز مۇمكىندىگىن قالت جىبەرمەدى.
نۇرسۇلتان قولا مەدالدى يەلەنۋ ءۇشىن ءوزىنىڭ قۇرداسى ريو وليمپياداسىنىڭ كۇمىس جۇلدەگەرى, توكيو وليمپياداسىنىڭ جەڭىمپازى, الەمنىڭ ەكى جانە ەۋروپانىڭ ءۇش دۇركىن چەمپيونى جان بەلەنيۋكپەن ايقاستى. ۋكراينانىڭ داڭقتى بالۋانى ءبىزدىڭ جىگىتكە ادىم اشتىرمادى. تۇرسىنوۆ تورتتاعانعا تۇسكەندە بەلەنيۋك ونى بوزكىلەمدە ءارى دە, بەرى دە شىر اينالدىرىپ, بىردەن جەتى ۇپايعا يەلىك ەتتى. ەكىنشى كەزەڭدە جەرلەسىمىزگە دە سونداي مۇمكىندىك بەرىلدى. بىراق ول جاندى ورنىنان قوزعالتا المادى. ناتيجەسىندە, جەڭىس 7:1 ەسەبىمەن ۋكراينالىق سپورتشىنىڭ پايداسىنا شەشىلدى.
جۇلدەدەن ايىرىلعاننان كەيىن نۇرسۇلتان تۇرسىنوۆ وليمپيا ويىندارىنىڭ ەڭ سوڭعى ليتسەنزياسى ءۇشىن تالاستى. قانداسىمىز ەۋروپا ويىندارىنىڭ كۇمىس جۇلدەگەرى, قۇرلىق چەمپيوناتىندا ءۇش رەت جەڭىس تۇعىرىنا كوتەرىلگەن ازەربايجاننىڭ مىقتىسى يسلام ابباسوۆتى ءبىرىنشى كەزەڭدە 8:0 ەسەبىمەن ويسىراتا ۇتىپ, پاريجگە باراتىن بالۋانداردىڭ تىزىمىنە 90-شى بولىپ قوسىلدى. ءسويتىپ, «كلاسسيكتەرىمىز» جالعىز جولداماعا قول جەتكىزدى. ال كۇرەستىڭ وسى ءتۇرىن سەرىك ەتكەن وزگە جىگىتتەرىمىزدەن ەش قايىر بولمادى.
گرەك-ريم كۇرەسىنەن وتكەن جارىستىڭ سوڭعى جۇلدەلەرىن مىنا بالۋاندار يەلەندى: 63 كيلو: 1. لەري ابۋلادزە (گرۋزيا), 2. مۇراد ماممادوۆ (ازەربايجان), 3. ەنەس باشار (تۇركيا) مەن گەورگي تيبيلوۆ (سەربيا). 67 كيلو: 1. لۋيس البەرتو ورتا سانچەس (كۋبا), 2. حاسرات جافاروۆ (ازەربايجان), 3. ماتە نەمەش (سەربيا) پەن موحامماد رەزا گەراەي (يران). 87 كيلو: 1. ءالي شىڭعىس (تۇركيا), 2. دەۆيد لوسونتسي (ماجارستان), 3. جان بەلەنيۋك (ۋكراينا) پەن سەمەن نوۆيكوۆ (بولگاريا).
جالپىكوماندالىق ەسەپتە ازەربايجاننىڭ ۇلتتىق قۇراماسى وزدى. قاپ تاۋىنىڭ بەس قىرانى فينالدا كۇرەستى. سولاردىڭ ەكەۋى التىن جانە ۇشەۋى كۇمىس مەدال ولجالادى. ەكىنشى ورىندا – كۋبانىڭ قابىلاندارى (2+0+1). ءۇشىنشى ساتىعا قىرعىزستاننىڭ ءور مىنەزدى ورەندەرى (2+0+0) جايعاستى. ءتورتىنشى جانە بەسىنشى ورىنداردى يران (1+1+3) مەن تۇركيا قۇرامالارى (1+1+2) يەلەندى. التىنشى جانە جەتىنشى ساتىلارعا گرۋزيا (1+1+0) مەن فرانتسيا (1+0+0) تۇراقتادى. سونداي-اق جۇلدەگە قول جەتكىزگەندەر قاتارىندا ماجارستان (0+2+0), جاپونيا مەن ارمەنيا (0+1+1), سەربيا (0+0+3), ۋكراينا مەن وزبەكستان (0+0+2), قىتاي, رەسەي, چەحيا, مىسىر جانە بولگاريا (0+0+1) وكىلدەرى
بار.
