«قازاقستان ەۋرازيالىق ەكونوميكالىق وداق اياسىنداعى ىنتىماقتاستىقتى ودان ءارى دامىتۋعا نيەتتى. بۇل وداق وتە پەرسپەكتيۆتى ينتەگراتسيالىق ۇيىم دەپ سانايمىز. وداقتىڭ ەكونوميكالىق الەۋەتىنىڭ مۇمكىندىكتەرى زور. قازاقستان ەاەو-عا مۇشە مەملەكەتتەردىڭ ءبارى وسى جەردە 2015 جىلى قول قويىلعان شارتتى قاتاڭ ساقتاپ, تەك ەكونوميكالىق ينتەگراتسيا, ساۋدا-ساتتىقتى دامىتۋ, ءوزارا تاۋار الماسۋ باعىتىندا عانا ەلدەرىمىزدىڭ نارىعىن اشۋ ماسەلەلەرىمەن اينالىسۋعا ءتيىس», دەدى قاسىم-جومارت توقاەۆ.
مەملەكەت باسشىسى ساۋدا-ەكونوميكالىق كووپەراتسيانىڭ تيىمدىلىگى كولىك-ترانزيت الەۋەتىن اشۋمەن تىكەلەي بايلانىستى, سوندىقتان كولىك قاتىناستارىنىڭ مۇمكىندىكتەرىن دايەكتى تۇردە دامىتۋ كەرەك دەپ سانايدى.
پرەزيدەنت يرانعا, پارسى شىعاناعىنا جانە ۇندىستانعا شىعۋعا مۇمكىندىك بەرەتىن سولتۇستىك – وڭتۇستىك ترانزيت ءدالىزىنىڭ, قازاقستان – تۇرىكمەنستان – يران تەمىرجولىنىڭ, باتىس ەۋروپا – باتىس قىتاي باعىتىنىڭ مۇمكىندىكتەرى جونىندە ايتتى. سونىمەن قاتار ترانسكاسپي حالىقارالىق كولىك ءدالىزىنىڭ الەۋەتىنە باسا ءمان بەردى.
كەزدەسۋ بارىسىندا مەملەكەت باسشىسى ەۋرازيالىق ەكونوميكالىق وداققا مۇشە ەلدەردىڭ ونەركاسىپ سالاسىنداعى ىقپالداستىعىن دامىتۋ ماڭىزدى ەكەنىنە توقتالدى.
سونداي-اق بيىل مامىر ايىندا وتكەن جوعارى ەۋرازيالىق ەكونوميكالىق كەڭەس وتىرىسىندا ونەركاسىپ جوبالارىن جۇزەگە اسىرۋ كەزىندە كووپەراتسياعا قارجىلاي كومەك كورسەتۋ تۋرالى قۇجاتقا قول قويىلعانىن ەسكە سالدى. پرەزيدەنتتىڭ ايتۋىنشا, بۇل مەحانيزم بىرلەسكەن جاڭا ءوندىرىس ورىندارىن اشۋعا تىڭ سەرپىن بەرەدى.
كەزدەسۋ سوڭىندا قاسىم-جومارت توقاەۆ كورمەنى ۇيىمداستىرۋعا بەلسەندى اتسالىسقانى ءۇشىن ۇكىمەتتەر باسشىلارىنا العىس ايتتى. سونداي-اق ولاردىڭ جۇمىسىنا تابىس, ال ەلدەردىڭ يگىلىگىنە قىزمەت ەتەتىن جاڭا بىرلەسكەن جوبالاردىڭ كوبەيۋىنە تىلەكتەستىك ءبىلدىردى.
