تروپيكالىق ايماق كليماتىنا بەيىمدەلگەن جەمىستەردى قازاقستاننىڭ توپىراعىنا جەرسىندىرۋمەن اينالىساتىن 63 جاستاعى تۇرسىن تاسقوجانىڭ 12 سوتىق تاجىريبە الاڭىندا بانان مەن پاپايادان بولەك, قۇلپىنايدىڭ جاڭا تۇقىمى, كيۆي, ءزايتۇن, ليمون مەن ماندارين اعاشى جايقالىپ تۇر. ال جىلىجاي توپىراعى ەش قوسپاسىز تابيعي دارۋمەندەرمەن تىڭايتىلادى. وسىنداي ەرەكشە كۇتىمنىڭ ارقاسىندا بانان اعاشى ءبىر جىلدا تامىر بايلاپ, 4 مەترگە دەيىن بويلاعان. قازىر ءار 1,5 ايدا 25 كەلىدەن اسا ءونىم بەرەدى ەكەن.
تسيترۋستىق جەمىستەر مەن جيدەكتەرگە نارىقتا سۇرانىس جوعارى ەكەنى بەلگىلى. سوندىقتان اگرونومدار تروپيكالىق بەلدەۋدە وسەتىن وسكىندەردى كوبەيتىپ, قۇلپىنايدىڭ جاڭا تۇقىمىن جاپپاي ەگىستىككە ازىرلەپ جاتىر. باستى ماقسات - يمپورتتى ىسىرىپ, ساۋدا سورەلەرىن وتاندىق تابيعي تازا ونىممەن قامتۋ. ول ءۇشىن شارۋا كوشەتتەردى كوبەيتىپ, وزگە شارۋاشىلىقتارمەن دە بولىسۋگە دايىن ەكەن.
باعبانداردىڭ سوزىنشە, ەلىمىزگە جىل سايىن وزگە مەملەكەتتەردەن 150 مىڭ توننادان استام تسيترۋس جەمىستەرى جەتكىزىلەدى, اتالعان وبلىستىڭ اگرارلى ايماعىندا ەگىستىكتى ءارتاراپتاندىرىپ, تاۋەلدىلىكتى ازايتۋعا بولادى ەكەن, ول ءۇشىن اۋدانداعى 760 گەكتار جىلىجاي كەشەنىن دامىتۋعا ەكپىن بەرىپ, مەملەكەتتىك قولداۋ شارالارىن كۇشەيتۋ قاجەت.
