وسى ورايدا «ادىلدىك ىزدەپ ءجۇرمىز» دەگەن ازاماتتار رەداكتسيامىزعا بىرنەشە رەت حابارلاستى. ايتۋلارىنشا, وقيعاعا قاتىستى قاماۋعا الىنىپ, ارتىنشا اقتالعان ازاماتتار ماتەريالدىق, مورالدىق شىعىنداردى وندىرە الماي ءجۇر. سولاردىڭ ءبىرى – شىعىس قازاقستان وبلىسىنىڭ تۇرعىنى سايلاۋ تىلەۋجان. ول: «2022 جىلى 7 اقپاندا ۇستالىپ, ەكى اي قاماۋدا بولدىم. زاڭسىز ارەكەتتەردىڭ ءتۇر-ءتۇرىن كوردىم. كىنام جوق بولعان سوڭ 2022 جىلدىڭ 26 جەلتوقسانىندا ءىسىمىز سوتقا جەتپەي توقتادى. سودان ماتەريالدىق, مورالدىق شىعىنداردى ءوندىرىپ الۋ ءۇشىن زاڭ ورگاندارىنا ارىزدانا باستادىم. سەبەبى زاقىم كەلگەن كوزىمدى تۇركيادا ەمدەتپەكپىن. ول جاقتىڭ دارىگەرلەرى اقىلى تۇردە 70 پايىز قالپىنا كەلتىرەمىز دەدى. بىراق سوت تالاپ-ارىزىمنىڭ بارىنەن باس تارتتى. سوت ءۇش ايعا سوزىلدى. باستاپقىدا «5 ميلليون تەڭگە بەرىلسىن» دەپ شەشىم شىعارعان. ەكى اي وتكەن سوڭ «ول شەشىمگە اپەللياتسيالىق شاعىم ءتۇستى» دەدى. ال زاڭ بويىنشا سوت شەشىمى ءبىر ايدا كۇشىنە ەنۋى كەرەك ەدى. كەلەسى سوتتا وتەماقىنى تولەمەۋ تۋرالى ەشكىم شاعىم تۇسىرمەگەنى انىقتالدى. ءبىر قىزىعى سوت وكىلى: «سەن مۇعالىم بولعاندىقتان, ەكى ايدىڭ جالاقىسىن بەرمەيمىز. سەبەبى جۇمىستا بولماعانىڭ تۋرالى قاعازىڭ جوق» دەدى. سول كەزدە ادۆوكات ەكى اي جۇمىستان شەتتەتىلگەنىم تۋرالى قۇجاتتى كورسەتتى. اقىرى سوت تولەيتىن بولىپ شەشتى دە, بەس مينۋتتان سوڭ: «ماتەريالدىق شىعىندى تولەۋدەن باس تارتتىق» دەدى. سونىمەن التى اي ساندالدىق. ماتەريالدىق شىعىندى تولەتۋدىڭ ۋاقىتى ءوتتى. قازىر نە بولىپ جاتقانى بەلگىسىز. ءۇش ادۆوكاتقا تولەگەن شىعىنىمدى سۇراپ ەدىم, ونى دا بەرمەي وتىر. وبلىستىق سوتقا جازايىق دەسەك, ەسىل اۋداندىق سوتى پروتسەستى سوزعان, ەندى قابىلداماي جاتىر», دەيدى.
وسىنداي ماسەلەمەن حابارلاسقان ازاماتتىڭ تاعى ءبىرى – ەرقانات جەڭىس ۇلى. ءوزىنىڭ ايتۋىنشا, ول وقيعا تۇسىندا الاڭعا كەزدەيسوق بارىپ, دۇربەلەڭ ۇستىندە كوزىنە وق ءتيىپ, اۋرۋحاناعا تۇسكەن. وسىدان بىرنەشە كۇن وتكەندە قاماۋعا الىنىپ, قۇقىق قورعاۋ ورگاندارى تاراپىنان كوپ قىسىم مەن ءجابىر كورگەنىن ايتادى. تالاي سارساڭعا ءتۇسىپ, كەيىنىرەك اقتالىپ, بوستاندىققا شىققاننان كەيىن ول دا سوتقا ارىزدانىپ, دەنساۋلىعىنا كەلگەن نۇقسان مەن مورالدىق ءجابىر-جاپانىڭ شىعىنىن سۇراعان. ايتۋىنشا, تالاپ ەتكەن شىعىن تولىق بەرىلمەسە دە, وتەمدى جارىم-جارتىلاي العان ەكەن. بىراق بىرنەشە اي ادىلدىك جولىندا سارساڭعا تۇسكەنىن ايتادى.
ازاماتتاردىڭ كەيبىرەۋى مورالدىق, ماتەريالدىق شىعىندى قايتارىپ العانىمەن, ءبىرازى قۇقىق قورعاۋ ورگاندارىنىڭ تابالدىرىعىن توزدىرىپ ءالى ءجۇر. «كىناسى دالەلدەنبەگەن ازاماتتارعا وتەماقى قاشان تولىق تولەنىپ بولادى؟» دەگەن العا تارتىپ, شىعىس قازاقستان وبلىستىق پروكۋراتۋراسىنا سۇراۋ سالدىق. ءباسپاسوز قىزمەتى وكىلدەرىنىڭ ايتۋىنشا, 25 ازاماتقا 3 ملن تەڭگە كولەمىندە مەملەكەت تاراپىنان وتەماقى تولەنەتىن كورىنەدى. ال سايلاۋ تىلەۋجاننىڭ ءىسى قاراۋسىز قالعان. شىعىس قازاقستان وبلىستىق سوتىنىڭ ءباسپاسوز قىزمەتكەرلەرى ۇسىنعان مالىمەتكە سۇيەنسەك, ءىس وسكەمەن قالالىق سوتىنا 2023 جىلى 1 ناۋرىزدا تۇسكەن ەكەن. تالاپكەر ارىزىنىڭ نەگىزىندە 2023 جىلدىڭ 29 ناۋرىزىندا ءىس قاراۋسىز قالدىرىلىپتى. سوت وكىلدەرى ءار ازاماتتىڭ ارىزىنا قاتىستى ماسەلە تۋىندايتىن بولسا, جاۋاپ بەرۋگە ءازىر ەكەندەرىن ايتادى.
شىعىس قازاقستان وبلىسى
