Silkroad Innovation Hub ايماقتاعى IT كاسىپقويلار, كاسىپكەرلەر جانە يننوۆاتورلار اراسىندا جەلىلىك, ءبىلىم الماسۋ جانە سەرىكتەستىكتەردى دامىتۋدىڭ باستى پلاتفورماسى رەتىندە قىزمەت ەتەدى. ورتالىق ەۋرازيا ەلدەرىنىڭ رەسمي تۇلعالارى مەن ديپلوماتتارى قاتىسقان حابتىڭ اشىلۋ راسىمىندە باعدات مۋسين حاب ورتالىق ازيادان جاڭا ستارتاپ جوبالاردى تارتۋ نۇكتەسىنە اينالاتىنىن جانە تۇركى ەلدەرىنىڭ تسيفرلىق شەشىمدەردى قولدانۋ ايماعىن كەڭەيتۋگە باعىتتالعان كۇش-جىگەرىن بىرىكتىرەتىنىن اتاپ ءوتتى.
– ەل پرەزيدەنتى قاسىم-جومارت توقاەۆ جۋىردا دۋشانبەدە سويلەگەن سوزىندە قازاقستان تسيفرلاندىرۋ سىندى ستراتەگيالىق ماڭىزدى سالادا ءوزىنىڭ جاقىن كورشىلەرىمەن ىنتىماقتاستىعىن بارىنشا نىعايتۋدى قولدايتىنىن اتاپ ءوتتى. ال بۇگىنگى ءىس-شارا ءسوزسىز وسى باعىتتاعى ماڭىزدى قادامداردىڭ ءبىرى بولىپ وتىر. Silkroad Innovation Hub جەكە برەندكە اينالاتىنىنا جانە كرەمني القابىندا ءوزىنىڭ لايىقتى ورنىن يەلەنەتىنىنە سەنىمدىمىن, – دەدى مينيستر.
سونىمەن قاتار IT يندۋسترياعا قولداۋ كورسەتۋ اياسىندا ەلىمىزدىڭ تسيفرلىق دامۋ مينيسترلىگى Astana Hub جانە Silkroad innovation Hub-پەن بىرلەسىپ, ورتالىق ازيانىڭ ستارتاپ-جوبالارىنىڭ TechCrunc الەمدىك كورمەسىنە قاتىسۋىن ۇيىمداستىردى. مۇنداي جوعارى دەڭگەيدەگى فورۋمدا العاش رەت ورتالىق ازيانىڭ IT يندۋسترياسىن دامىتۋ بويىنشا پانەلدىك سەسسيا ءوتتى.
كرەمني القابىنداعى Silkroad Innovation Hub جوباسىن ۇيىمداستىرۋشىلار ورتالىق ەۋرازيا ستارتاپتارىن يننوۆاتسيالىق قوعامداستىققا قوسىلۋعا جانە پەرسپەكتيۆالى تەحنولوگيالىق جوبالاردى قۇرۋ جانە دامىتۋ ءۇشىن ۇسىنىلعان مۇمكىندىكتەردى پايدالانۋعا شاقىرادى. ولار ءوز كۇش-جىگەرىن بىرىكتىرە وتىرىپ, الداعى 5-7 جىلدا جاقسى ناتيجەلەرگە قول جەتكىزبەك. اتاپ ايتقاندا, ستارتاپتارعا 300 ملن دوللار ينۆەستيتسيا, وڭىردەن IT قىزمەت ەكسپورتىنا 1,5 ملرد دوللار تارتۋ جوسپارلانعان.
جالپى, ەڭ اۋقىمدى TechCrunch Disrupt 2023 حالىقارالىق كونفەرەنتسياسى ارقىلى ورتالىق ەۋرازيا ستارتاپتارى ءۇشىن, ونىڭ ىشىندە قازاقستان, قىرعىزستان, وزبەكستان, تاجىكستان, موڭعوليا دا بار, تاريحتىڭ جاڭا پاراعى اشىلدى. TechCrunch Disrupt الاڭىندا Silkroad Innovation Hub يننوۆاتسيالىق ورتالىعى كرەمني القابىنداعى ينۆەستورلارعا ەكسكليۋزيۆتى پاۆيلون ۇسىندى. وندا ورتالىق ەۋرازيادان كەلگەن 14 ستارتاپ وزدەرىن جاھاندىق ارەنادا تانىتۋعا مۇمكىندىك الدى. بۇلاردىڭ ىشىندە 6-ى – وتاندىق ستارتاپ. ولار – Citix, Cyborgbase, TengriLights, Falcon.ai, Kscooter, Rhinotales جوبالارى. سونداي-اق TechCrunch Disrupt 2023 اياسىندا ءينسۋلتتى اۆتوماتتاندىرىلعان دياگنوستيكالاۋ ءۇشىن جاساندى ينتەللەكت جانە نەيروراديولوگيا سالاسىندا ماماندانعان CerebraAI وتاندىق ستارتاپى الەمدەگى ەڭ اۋقىمدى Startup battlefield 200 ستارتاپ كونكۋرسىنا قاتىستى.
ايتپاقشى, موڭعوليا, قىرعىزستان, تاجىكستان, وزبەكستان مەملەكەتتەرىنەن كەلگەن ستارتاپتاردىڭ باسىم بولىگى Astana Hub-تىڭ اكسەلەراتسيالىق باعدارلامالارىنىڭ تۇلەكتەرى ەكەنىن اتاپ وتكەن ءجون. قازىرگى تاڭدا ولار الەمدىك نارىقتا ءوز جوبالارىنىڭ اياسىن كەڭەيتىپ جاتىر.
