كۇنى كەشە عانا مەرەيتوي اياسىندا مادەنيەت جانە اقپارات مينيسترلىگىنىڭ قولداۋىمەن ۇلتتىق مۋزەيدە «جاسىن عۇمىر جازۋشى» اتتى ادەبي كەش ءوتتى.
القالى جيىنعا جازۋشىنىڭ قارىنداسى عاليا بوكەيقىزى, استانا قالاسى اكىمدىگى ادىستەمەلىك ورتالىعىنىڭ قىزمەتكەرلەرى, № 55, 69, 72, 73 مەكتەپتەردىڭ وقۋشىلارى مەن ۇستازدارى قاتىستى.
ادەبي كەش جازۋشىنىڭ ءومىرى مەن شىعارماشىلىعىنا ارنالعان دەرەكتى فيلمنەن ءۇزىندى كورسەتۋدەن باستالدى. ۇزىندىدە ءجۇرسىن ەرمان, ءابىش كەكىلباەۆ, دۋلات يسابەكوۆ, كادىربەك سەگىزباەۆ, اشىربەك سىعاي سىندى اقىن-جازۋشىلار, قوعام جانە ونەر قايراتكەرلەرى ورالحان بوكەي تۋرالى وي-پىكىرلەرىمەن بولىسەدى.
ادەبي كەشكە ارنايى شاقىرىلعان قوناق, جازۋشىنىڭ قارىنداسى عاليا بوكەيقىزى: «ۇلكەن تۇلعالار قايدان شىعادى؟ بالا كەزىنەن قالىپتاسادى. ال بالانى تاربيەلەيتىن كىم؟ ءبىرىنشى – اتا-انا, ەكىنشى – ۇستاز. سول سەبەپتى جينالىپ وتىرعان ۇستازدارعا, وسىنداي ءىس-شارا ۇيىمداستىرىپ وتىرعان ۇلتتىق مۋزەي ۇجىمىنا العىس بىلدىرەمىن», دەدى. عاليا بوكەيقىزى قالامگەر باۋىرىنىڭ ءوزىنىڭ تۋعان جەرىنە دەگەن ماحابباتى, ساباق ۋاقىتىندا ادەبي كىتاپتاردى وقىپ وتىراتىن ادەتى, ونىڭ سۇيىكتى اۆتورلارى, كىشكەنتاي كەزىندەگى جازۋشى بولامىن دەگەن ارمانى, ەرەكشە ەستە ساقتاۋ قابىلەتى مەن اعاسى ەكەۋىنىڭ اراسىنداعى قارىم-قاتىناسى تۋرالى ايتىپ بەردى.
كەلەسى كەزەكتە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «توپجارعان» كلۋبىنىڭ مۇشەلەرى وزدەرى جازعان ولەڭ, تەرمە, مونولوگتەرىن وقىپ, ورتاعا ونەرلەرىن سالدى.
استانا قالاسى №72 جانە №73 مەكتەپ-ليتسەيلەرى قازاق ءتىلى مەن ادەبيەتى ءپانىنىڭ مۇعالىمدەرى جازۋشىنىڭ شىعارمالارى تۋرالى ويلارىمەن ءبولىسىپ, وسكەلەڭ ۇرپاقتى ادەبي شىعارمالاردى ءجيى وقۋعا شاقىردى.
ءىس-شارا بارىسىندا مۋزەيدەگى «كەسكىندەمە جانە گرافيكا» ۇيىرمە ساباعىنا قاتىسۋشى وقۋشىلار ورالحان بوكەي ەڭبەكتەرىنىڭ سيۋجەتىنە نەگىز- دەلگەن سۋرەتتەر سالدى.
كەلگەن قوناقتارعا العىس- حاتتار تابىستالدى.
