اۆتوبۋستىڭ توقتاعانى سول ەدى, ايالدامادا تۇرعاندار قازاق, ورىس تىلدەرىندە «تۋعان كۇنىڭمەن, ۆيتيا!» دەپ, دابىرلاپ قۇتتىقتاي جونەلگەندە ءوز كوزىنە ءوزى سەنبەي قالدى. ارالارىندا كەنت اكىمدىگىنىڭ باس مامانى سەرىك ەسەنعاليەۆ, كەنتتىڭ قادىرمەندى اقساقالى تىلەگەن راحىمبەكوۆ, اۋداندىق ءماسليحاتتىڭ دەپۋتاتى ازامات سماعۇلوۆ تا بار ەكەن. سول جەردە تۇرعانداردىڭ ءبارى قۇشاقتاپ, بەتىنەن ءسۇيىپ, باۋىرىنا قىسىپ جاتىر. ءۆيتاليدىڭ كوڭىلى تولقىپ كەتتى, نە بولعانىن تۇسىنە دە المادى.
سەرىك ەسەنعاليەۆ وعان كەنت جۇرتشىلىعى اتىنان العىسحات جانە حالىقتىڭ ءوز ەركىمەن جيناعان قارجىلاي سىيلىعى مەن ارنايى پىسىرىلگەن ءتاتتى تورتتى تابىستادى. حالقى توبەسىنە تورەدەي كوتەرگەن بۇل ازامات ەلگە نەسىمەن سىيلى بولدى ەكەن؟ بىلاي قاراساڭ, بار-جوعى اۆتوبۋس جۇرگىزۋشىسى عانا عوي. ءبىزدى وسى سۇراق قىزىقتىردى.
ەلۋدىڭ بەل ورتاسىنا جاقىنداپ قالعان ول ەڭبەك جولىن مەكتەپ بىتىرگەن بويدا جەزقازعان كەنتىندەگى اۆتوكولىك كاسىپورنىندا سلەسار بولۋدان باستاعان ەكەن. كەيىن اسكەر قاتارىندا ازاماتتىق بورىشىن وتەگەن سوڭ سول كاسىپورىنعا قايتا ورالىپ, جۇرگىزۋشى بولىپ ورنالاسىپتى.
– 1991 جىلدان بەرى كولىكتىڭ ءرۋلىن ۇستاپ كەلەمىن. 2017 جىلدان باستاپ «قوجاحمەتوۆ» جەكە كاسىپورنىنا قاراستى اۆتوبۋس جۇرگىزۋشىسىمىن. سوڭعى ءتورت-بەس جىل كولەمىندە ساتباەۆ – جەزدى ارالىعىنداعى جولاۋشىلار اۆتوبۋسىندامىن, دەگەن ۆيتالي جەزدى جۇرتشىلىعىنىڭ وزىنە كورسەتكەن قۇرمەتى كەرەمەت توسىنسىي بولعانىن ايتىپ, تاڭدانىسىن جاسىرمادى.
جولاۋشىلار وعان قالتقىسىز قىزمەتى ءۇشىن ءدان ريزا كورىنەدى. ادەتتە, قالاارالىق اۆتوبۋستاردىڭ نەگىزگى ءبىر ايالداماسى بولادى. جولاۋشىلار سول جەرگە كەلىپ اۆتوبۋسقا وتىرادى, سول جەردەن ءتۇسىپ قالادى. ال ۆيتالي جولاۋشىلاردى كەنتتىڭ باستى-باستى كوشەلەرىن ارالاپ ءجۇرىپ مىنگىزىپ, ءتۇسىرىپ وتىرادى ەكەن. اسىرەسە بۇل قارتاڭ كىسىلەرگە, سونداي-اق قول جۇگى اۋىرلاۋ ادامدارعا وتە ىڭعايلى عوي.
جەزدى كەنتىنىڭ قارساقبايعا قاراي شىعابەرىس جاعىنداعى اباي, يمانجان, وڭ جاعالاۋ, اقمولدا, كەنشىلەر كوشەلەرىنىڭ كەنت ورتالىعىنداعى №6 مەكتەپتىڭ تۇسكى ۋاقىتتا وقيتىن بالالارى مەكتەپكە ءۆيتاليدىڭ اۆتوبۋسىمەن تەگىن قاتىنايتىن كورىنەدى. ول جولاۋشىلاردىڭ جاعدايىنا قاراي قىزمەت ەتۋدى باستى مىندەتى سانايدى ەكەن.
– بۇل ۆيتيا دەگەن ناعىز مىڭبولعىر بالا عوي. كەيدە ۇلكەن قالالاردا قالتاسىندا تيىن-تەبەنى بولماي قالعان بالانى دا, ۇلكەندى دە مارشرۋتتان ءتۇسىرىپ كەتىپ جاتقان جاعدايلاردى كورىپ جاتامىز عوي. مەن ۆيتيانىڭ بالالاردان اقشا العانىن كورگەن ەمەسپىن. ءبىزدىڭ ءوزىمىز كەيدە «اقشا بولماي قالدى, پەنسياعا دەيىن كۇتە تۇراسىڭ با؟» دەسەك بولدى, ول قاباعىن شىتپايدى, «مىنە بەرىڭىز» دەيدى. مۇنداي ازاماتتان اينالىپ-اق كەتپەيسىڭ بە؟, – دەيدى كوپبالالى بيكەن اپا.
– بۇل كىسىنىڭ ەشقاشان داۋىس كوتەرگەنىن, بىرەۋمەن سوزگە كەلگەنىن كورگەن ەمەسپىز. ۇنەمى ريزا بولىپ وتىرامىز. «سىيعا – سىي» دەمەكشى, وعان ءوز ريزاشىلىعىمىزدى قالاي جەتكىزۋدى ويلاپ, تۋعان كۇنىندە ەرەكشە قۇتتىقتاۋ جاساۋدى ءجون سانادىق. ۇيالى تەلەفوندا ارنايى چات اشتىق, سول ارقىلى جينالدىق. ەستىمەي, بىلمەي قالعان كىسىلەر كەيىن بىزگە وكپەلەپ تە جاتىر. ۆيتيا سونداي ريزا بولدى. جاقسىنىڭ جاقسىلىعىن دارىپتەي ءبىلۋىمىز كەرەك. ءبىز ونىڭ باسقا جاققا كەتىپ قالعانىن قالامايمىز. ويتكەنى ۆيتالي سەكىلدى ادام تابىلمايدى, دەيدى ونىڭ تۋعان كۇنىنە توسىنسىي جاساۋعا باستاماشى بولعان, كەنت تۇرعىندارىنىڭ ءبىرى, مۇعالىم اسەم قۇلاجانوۆا.
ۆيتالي – ونەگەلى وتباسىنىڭ يەسى, شاتتىقتى شاڭىراقتىڭ وتاعاسى. ول ايەلى اناستاسيا ەكەۋى ۆيكتور, كيريلل جانە ۆيوللا ەسىمدى ءۇش بالا تاربيەلەپ, ءوسىرىپ وتىر.
قاراپايىم ەڭبەك ادامى بيلىك تاراپىنان كوبىنە ەلەنە بەرمەيدى. بىراق حالىق كىمنىڭ كىم ەكەنىن جاقسى بىلەدى. تۋعان كۇنىن ەل بولىپ تويلاپ جاتسا, بۇدان ارتىق ماقتاۋ, ماراپات بولا ما؟ ۆيتالي حالىق تاراپىنان سونداي ەرەكشە ماراپاتقا بولەندى. ەلدىڭ ىستىق ىقىلاسىن سەزىندى, قۇرمەتىن كوردى.
ۇلىتاۋ وبلىسى,
جەزدى كەنتى
