ۇلتتىق اسكەري-پاتريوتتىق ورتالىقتا ۇيىمداستىرىلعان مەملەكەتتىك ءتىل بىلگىرلەرىنىڭ سايىسى قارۋلى كۇشتەردىڭ قۇرىلىمدىق بولىمشەلەرى اراسىنداعى «قازاقستاننىڭ بولاشاعى – قازاق تىلىندە» اتتى ايلىقتىڭ شەشۋشى كەزەڭى بولدى. مەملەكەتتىك ءتىلدى ناسيحاتتاۋ جانە ونىڭ قولدانۋ اياسىن كەڭەيتۋ, اسكەري قىزمەتشىلەردى پاتريوتيزم رۋحىندا تاربيەلەۋ, جەكە قۇرام اراسىندا ءارتۇرلى ۇلت وكىلدەرىنىڭ دوستىعىن نىعايتۋ ماقساتىندا وتكەن بايقاۋعا قاتىسۋشىلار مەملەكەتتىك ءتىلدى ەركىن مەڭگەرگەندىكتەرىن كورسەتە ءبىلدى. شىعارماشىلىق سايىسقا قارۋلى كۇشتەر تۇرلەرى مەن قۇرىلىمدىق بولىمشەلەرىنەن بەس ادامنان تۇراتىن التى كوماندا قاتىستى. ولار – «ارىستان» (55765 اسكەري ءبولىمى), «جەرۇيىق» (قۇرلىق اسكەرلەرى), «اۋە قىراندارى» (اۋە قورعانىسى كۇشتەرى), ء«تارتىپ ساقشىلارى» (اسكەري پوليتسيا), «جالىن» (اسكەري كوللەدج) جانە «الاش» (دەسانتتىق-شابۋىلداۋ اسكەرلەرى).
بايقاۋدىڭ «ولەڭ – ءسوزدىڭ پاتشاسى» دەپ اتالاتىن ءبىرىنشى كەزەڭىندە بەلگىلى قازاق اقىندارىنىڭ شىعارمالارىنان التى شۋماق ولەڭدى جاتقا وقۋ كەرەك بولسا, كەلەسى كەزەكتە ء«ۇي تاپسىرماسى» تەكسەرىلدى. وندا كوماندالار كورەرمەن نازارىنا ساحنالىق كورىنىستەرىن ۇسىندى. ءۇشىنشى كەزەڭدە ونەرپازدار ءار ۇلتتىڭ كيىمدەرى مەن مادەنيەتىن كورسەتە وتىرىپ, ءان نەمەسە بي ورىندادى. كوماندالاردىڭ بولىنگەن ۋاقىتتى قاتاڭ ساقتاۋىنا, وزگە ۇلت وكىلدەرىنىڭ مەملەكەتتىك تىلدە ەركىن جانە تازا سويلەۋىنە, ولەڭدى مانەرلەپ وقۋىنا, ءماتىننىڭ كوركەم يدەيالارىن اشا بىلۋىنە, سونداي-اق ساحنا شەبەرلىگى مەن مادەنيەتىنە ەرەكشە نازار اۋدارىلدى.
سايىس قورىتىندىسى بويىنشا ء«تارتىپ ساقشىلارى» كومانداسى جەڭىمپاز اتاندى. ەكىنشى ورىندى «الاش» كومانداسى يەلەنسە, ءۇشىنشى ورىن «جەرۇيىق» كومانداسىنا بۇيىردى. باسقا كوماندالار دا نازاردان تىس قالماي, بارلىعى قورعانىس ءمينيسترىنىڭ العىسحاتىمەن جانە ەستەلىك كادەسىيلارمەن ماراپاتتالدى.
بايقاۋ جەڭىمپازدارى مەن قاتىسۋشىلاردى قۇتتىقتاعان قورعانىس مينيسترلىگى اپپاراتىنىڭ باسشىسى, پولكوۆنيك ەربول قۇماربەك ۇلى مەملەكەتتىك ءتىلدى مەڭگەرۋ ءاربىر ازاماتتىڭ مىندەتى ەكەنىن اتاپ ءوتتى. ول بۇل ءىس-شارا «قازاقستان رەسپۋبليكاسىندا ءتىل ساياساتىن ىسكە اسىرۋدىڭ 2020-2025 جىلدارعا ارنالعان مەملەكەتتىك باعدارلاماسىن» ورىنداۋعا باعىتتالعانىن دا اتاپ ءوتتى.
