بۇل سۋرەت ۇلت-ازاتتىق قوزعالىستىڭ 20 جىلدىعىنا وراي 1936 جىلى لاتىن گرافيكاسىمەن جارىق كورگەن «امانكەلدى يمانوۆ» اتتى شاعىن جيناقتا جاريالانىپتى. كىتاپتىڭ اۆتورى – س.براينين, جاۋاپتى رەداكتورى – ۋتەميسوۆ دەلىنىپتى.
شىندىعىندا, بۇل كىتاپ اۋەلى «امانگەلدى يمانوۆ» دەگەن اتپەن ورىس تىلىندە «كازكرايوگيز» باسپاسىنان جارىق كورىپ, جەدەل تۇردە قازاقشاعا اۋدارىلعان كورىنەدى. ويتكەنى كىتاپ اۆتورى سولومون حايموۆيچ براينين – ورىسشا جازاتىن ادام. بۇل كىسىنى قازىرگى الاشتانۋشىلار 1935 جىلى جارىق كورگەن (ش.شافيرامەن بىرىگىپ جازعان) «وچەركي پو يستوري الاشوردى» اتتى ەڭبەگى ارقىلى بىلەدى.
بۇل سۋرەتتى ءابىلحان قاستەەۆ قالاي سالدى دەگەنگە توقتالساق, كەڭەس بيلىگىنىڭ العاشقى جىلدارى كسرو باسشىسى ي.ستالين ارنايى تاپسىرما بەرىپ حالىقتى پاتريوتتىق رۋحقا تاربيەلەيتىن قاھارماندار ءتىزىمىن جاساتقان. بۇل تىزىمدە قازاق حالقى اتىنان امانگەلدى يمانوۆ بولعان. وسى تۇلعالاردى دارىپتەۋ بۇقارالىق سيپات العان. ءسويتىپ, حالىق باتىرى امانگەلدىنىڭ پورترەتىن جاساۋ جاس سۋرەتشى ءابىلحان قاستەەۆكە جۇكتەلەدى. سۋرەتشى جۇمىستى ويداعىداي اتقارىپ شىعۋ ءۇشىن كوپ ىزدەنەدى.
ءا.قاستەەۆ 1936 جىلى سالعان العاشقى سۋرەتتەن باستاپ باتىردىڭ بەينەسىن 1950 جىلعا دەيىن ارقيلى كەيىپتە ءتورت دۇركىن سالىپ شىعادى. سۋرەتشى 1960 جىلى جارىق كورگەن ء«بىلىم جانە ەڭبەك» جۋرنالىنداعى ماقالاسىندا: «مەن باتىردىڭ بەينەسىن ىزدەگەندە ەكى ءتۇرلى تاريحي ماتەريالدارعا سۇيەندىم. ونىڭ ءبىرىنشىسى – دوكۋمەنتتىك (ارحيۆتىك) ماتەريالدار. وندا امانگەلدىنىڭ سۋرەتتەرى بولماعانىمەن, ءوزى قۇرعان وتريادى, جۇرگىزگەن جۇمىستارى تۋرالى دەرەكتەر جازىلعان. سونداي دەرەكتەر جۇمىسىمدى تولىق ءتۇسىنىپ الۋعا قاجەت بولدى. ەكىنشىسى – باتىر تۋرالى حالىق اۋزىنداعى اڭىز-اڭگىمەلەر. ولار امانگەلدىگە بايلانىستى وقيعالاردى, ونىڭ ءتۇر-سيپاتىن, كەلبەتىن, ءىس-ارەكەتىن, مىنەز-قۇلقىن قولمەن قويعانداي ەتىپ ايتاتىن. وسىنداي ماتەريالداردى مول زەرتتەي كەلىپ, دۇرىس تۇيىندەگەندە ىزدەگەن بەينەڭ ويداعىداي شىعاتىنىن بايقادىم», دەپ جازىپتى.
