– وزدەرىڭىز بىلەتىندەي, بيىل اڭىز اكتريسا, قازاقستاننىڭ حالىق ءارتىسى بيكەن ريموۆانىڭ 100 جىلدىق مەرەيتويىن تۇركسوي مادەني ۇيىمىمەن بىرلەسىپ حالىقارالىق دەڭگەيدە اتاپ ءوتۋ جوسپارلانعان. تەاترىمىز ۇلى اكتريسامىزدىڭ ەسىمىن عانا يەلەنىپ قويعان جوق, سونىمەن قاتار قازاق ونەرىنە وشپەس ءىز قالدىرعان دارا تۇلعانىڭ تاعىلىمدى ءومىرىن, ساحناداعى سىندارلى ەڭبەگىن ۇمىتپاي, سودان ۇلگى الىپ ءوسىپ كەلە جاتقان كەيىنگى بۋىن اكتەرلەرىمىزدىڭ ىزدەنىسىن, جالپى شىعارماشىلىق الەۋەتىن پاش ەتۋ ماقساتىندا ەلىمىزدىڭ جۇرەگى – باس شاھار تورىنە ارنايى ات باسىن بۇرىپ, گاسترولمەن كەلىپ وتىرمىز. كورەرمەنگە اكەلگەن تارتۋىمىز – البەتتە مازمۇندى سپەكتاكلدەر. بيكەن اپامىزدىڭ عاسىر تويىنا ورايلاستىرىپ ۇيىمداستىرىلعاندىقتان, گاسترولدىك ساپارىمىزدىڭ شىمىلدىعىن بەلگىلى رەجيسسەر قازاقستاننىڭ ەڭبەك سىڭىرگەن قايراتكەرى مۇرات احمانوۆتىڭ سۋرەتكەرلىك قولتاڭباسىندا قويىلعان اكتريسانىڭ «قوس مۇڭلىق» دراماسىمەن اشۋدى ءجون كوردىك, – دەپ تەاتر ديرەكتورى ەرلىك جۋاسبەك جالپى ونەر ساپارى بارىسى تۋرالى جان-جاقتى ماعلۇمات بەرىپ ءوتتى.
ساحنا ساڭلاعى بيكەن ريموۆا سەگىز قىرلى, ءبىر سىرلى تالانت يەسى بولعان. تاماشا اكتريسا عانا ەمەس, ءوز ورتاسىندا ورەلى دراماتۋرگ دەپ تە مويىندالعان ساحناگەردىڭ قالامىنان «اباي – ايگەرىم», «قوس مۇڭلىق» سىندى بىرنەشە پەسا تۋدى. ءوز كەزەگىندە ايتۋلى تۋىندىلار قازاق تەاترلارى ساحناسىنان لايىقتى ورنىن الدى دا. ءسوزىمىزدىڭ ايقىن ايعاعى بولسا كەرەك, تۇلعا ەسىمىن يەلەنگەن تەاتر دا اكتريسانىڭ قالامىنان تۋعان سونداي قۋاتتى تۋىندىلاردىڭ ءبىرى – «قوس مۇڭلىقتى» استانالىق كورەرمەن نازارىنا ۇسىندى. اتاۋى ايتىپ تۇرعانداي سپەكتاكلدە قوعامداعى قارتتار ماسەلەسى ءسوز بولادى. جالعىز ۇلىنىڭ شاڭىراعىنا سىيماي, قارتتار ءۇيىن پانالاعان كەيۋانانىڭ مۇڭلى تاعدىرى كورەرمەنىن ءبىر ءسات تە بەيجاي قالدىرمادى. قوعامعا, بالا-شاعاعا بويىنداعى بار كۇش-قايراتىن سارقىپ بەرگەن قارت كىسىلەر نەگە ءوز بالالارىنان قاعاجۋ كورەدى؟ جاستار اراسىندا ماسكۇنەمدىك, ناشاقورلىق ىندەتى اسقىنىپ, ولاردىڭ اتا-انا الدىنداعى پەرزەنتتىك پارىزىن ۇمىتىپ, تىم قاتىگەزدەنىپ كەتۋىنە نە سەبەپ؟ مىنە, قويىلىم قوعامنىڭ وسىنداي اششى سۇراقتارىنا جاۋاپ ىزدەيدى. تولعامى تەرەڭ, تاعىلىمى مول سپەكتاكلدە قازاقستاننىڭ حالىق ءارتىسى الماحان كەنجەبەكوۆا, ماكەن نۇرمۇحامبەتوۆا, مادەنيەت سالاسىنىڭ ۇزدىگى ساعىندىق ءجۇمادىل, ايزادا بايعابىل, قازاقستان جاستار وداعى «سەرپەر» سىيلىعىنىڭ لاۋرەاتى داۋلەت قانات باستاعان تالدىقورعان تەاترىنىڭ تالانتتى اكتەرلەرى ونەر كورسەتتى.
– زامانداستارىنىڭ بارلىعى كەلمەستىڭ كەمەسىنە ءمىنىپ, تۋعان پەرزەنتتەرى قاجەت ەتپەي جالعاندا جالعىز قالعان كەيۋانانىڭ اۋىر دا قاسىرەتتى تاعدىرى ءسوز بولاتىن بۇل قويىلىم كىم-كىمدى دە ويلانتپاي جىبەرمەيدى. تۋىندىنىڭ كورەرمەنىنە ايتار تاعىلىمى مول. جاستارىمىز اداسپاسا ەكەن. اتا-اناسىن الاقانىنا سالىپ ايالاسا ەكەن. مىنە, «قوس مۇڭلىق» قويىلىمىندا ءبىز وسىنى جەتكىزگىمىز كەلدى, – دەدى تەاتر ءارتىسى, مادەنيەت سالاسىنىڭ ۇزدىگى ساعىندىق ءجۇمادىل.
گاسترولدىك ساپاردىڭ ەكىنشى كۇنى تالدىقورعان تەاترى ۇجىمى استانا قالاسى تۇرعىندارى مەن قوناقتارىنىڭ نازارىنا جاس دراماتۋرگ قولقانات مۇراتتىڭ شىعارماسى نەگىزىندە رەجيسسەر دانيار بازارقۇلوۆ قويعان «مۇعالىم» سپەكتاكلىن ۇسىندى. قويىلىمدا كوتەرىلگەن تاقىرىپتىڭ اۋقىمى وتە كەڭ ءارى بۇگىنگى زامانمەن ۇندەس. مۇعالىمنىڭ قوعامداعى بەدەلى, اتا-انا مەن بالانىڭ, ۇستاز بەن وقۋشىنىڭ اراسىنداعى قارىم-قاتىناس جان-جاقتى كورسەتىلەتىن قويىلىم كورەرمەن كوڭىلىنە دە تەرەڭ ءىز قالدىردى. وعان سپەكتاكلگە ارنايى كەلگەن دارحان جۇبانىش ۇلى ەسىمدى كورەرمەننىڭ مىنا پىكىرى دالەل:
– «مۇعالىم» سپەكتاكلىن تاماشالاپ شىقتىم. اسەرىمدى سوزبەن ايتىپ جەتكىزۋ مۇمكىن ەمەس. قويىلىم قوعامداعى وزەكتى ماسەلەلەردى ءسوز ەتكەن ەكەن. ال ارتىستەردىڭ ءوز رولدەرىن اسا شەبەرلىكپەن الىپ شىققاندارى سونشالىق, ەكى ساعاتقا جۋىق ۋاقىتتىڭ قالاي وتە شىققانىن سەزبەي دە قالدىم. قازىرگى قوعامدا بولىپ جاتقان كوكەيكەستى ماسەلەلەردى قامتىعان وتكىر دە مازمۇندى قويىلىم بولىپتى. كورىپ ريزا بولدىم. بارلىق اتا-انالار مەن وقۋشىلارعا, جالپى جاستارعا كورۋگە كەڭەس بەرەر ەدىم, – دەدى سپەكتاكل اسەرىنەن ارىلا الماي تۇرعان جاس جىگىت.
سونىمەن قاتار ايتۋلى ونەر ساپارى اياسىندا تالدىقورعان تەاترى مۋزەي ءبولىمىنىڭ مەڭگەرۋشىسى زامزاگۇل نازاربەكقىزىنىڭ ۇيىمداستىرۋىمەن وتكىزىلگەن بيكەن ريموۆانىڭ 100 جىلدىعىنا ارنالعان شىعارماشىلىق كورمەنىڭ دە كورەرمەنىنە سىيلاعان اسەرى مەن رۋحاني ازىعى مول بولدى دەسەك, قاتەلەسپەيمىز. قويىلىمعا كەلگەن قوناقتار اتاقتى اكتريسانىڭ ءومىر مەن ونەر جولىنان مول ماعلۇمات الىپ, ءارتىستىڭ ءار جىلدارى تۇتىنعان جەكە زاتتارى مەن ساحنالىق كيىمدەرى, اشەكەي بۇيىمدارى مەن پورترەتتەرىن تاماشالاپ, جادىگەرلەر تاريحىمەن كەڭىنەن تانىستى.
– استانا جۇرتشىلىعىنا تاماشا تارتۋىمىزبەن كەلدىك. ول – تۇلعا ومىرىنەن سىر شەرتەتىن مىنا كورمە. بيكەن اپامىزدىڭ عاسىر تويى تۇركسوي مادەني ۇيىمىمەن بىرلەسە حالىقارالىق دەڭگەيدە ۇيىمداستىرىلىپ جاتقاندىقتان, الداعى ۋاقىتتا ساحنا ساڭلاعىنىڭ كورمەسىن انكارا قالاسىندا وتكىزۋدى جوسپارلاپ وتىرمىز. سونىمەن قاتار قىركۇيەك ايىنىڭ سوڭىندا اپامىزدىڭ 100 جىلدىعىن ۇلكەن حالىقارالىق فەستيۆالمەن جابۋ جوسپارلانعان. قازىر سوعان قىزۋ دايىندىق ۇستىندەمىز. الىس-جاقىن شەتەلدەن 5 تەاتر جانە ەلىمىزدەن 6 تەاتر قاتىسادى. وسى ارقىلى بيكەن ريموۆا ەسىمىن لايىقتى دەڭگەيدە ۇلىقتاساق دەيمىز, –دەپ ءسوزىن قورىتىندىلادى تەاتر ديرەكتورى ەرلىك تىلەۋقۇل ۇلى.
ءيا, عاسىر تويى عالامدىق دەڭگەيدە تويلانۋعا ءتيىس اكتريسانىڭ ءبىرى بيكەن ريموۆا دەسەك, وعان ەشكىم قارسى داۋ ايتا قويماس. ساحنا مەن ەكراندا ولمەس بەينەلەر تۋدىرىپ, ۇلتتىق ونەرىمىزگە قالتقىسىز قىزمەت ەتكەن ساحنا ساڭلاعىنىڭ ەسىمى ماڭگى جاسايدى.
