ماسەلەن, تامىز ايىندا وتكىزىلگەن ساۋالدامانىڭ قورىتىندىسى بويىنشا قازاقستان ۇلتتىق قۇراماسى مەن «ورداباسى» كومانداسىنىڭ كاپيتانى اسحات تاعىبەرگەن ەلىمىزدىڭ ۇزدىك ويىنشىسى دەپ تانىلدى.
اسحات تامىز ايىندا «ورداباسى» كلۋبى ساپىندا ءتورت ويىندا الاڭعا شىعىپ, ءبىر مارتە مەرگەندىگىمەن كوزگە تۇسسە, ارىپتەستەرىنە ەكى رەت ناتيجەلى پاس اسىرعان. جالقى گولىن ول 19-تۋر وياسىندا قىزىلوردادا وتكەن «قايسار» – «ورداباسى» اراسىنداعى ماتچتا سوققان بولاتىن. ءبىر ايتا كەتەرلىگى, تاعىبەرگەن – «قايسار» فۋتبول كلۋبىنىڭ تاربيەلەنۋشىسى. وسىنداي ناتيجەلى ويىنىمەن اسحات ءوزىنىڭ كومانداسىنا تۋرنير كەستەسىندە كوش باستاۋعا كومەكتەسىپ ءجۇر.
ۇلتتىق قۇراما مەن «ورداباسىنىڭ» كوشباسشىسى بيىلعى ماۋسىمدا وسىمەن قاتارىنان ەكىنشى, جالپى ءۇشىنشى مارتە ايدىڭ ۇزدىك فۋتبولشىسى اتانىپ وتىر. ول بۇعان شىلدە جانە مامىر ايلارىندا ماماندار تاراپىنان ەل چەمپيوناتىنىڭ ۇزدىك ويىنشىسى دەپ تانىلعان ەدى.
ساۋالدامانىڭ ەكىنشى ورىنىنا «ماقتاارال» كلۋبىنىڭ شابۋىلشىسى توقتار جاڭعىلىشباي جايعاسقان. ول تامىز ايىندا ءۇش ويىن وتكىزىپ, ءبىر گول جانە ءبىر ناتيجەلى پاسپەن ەرەكشەلەندى. ۇزدىك ۇشتىكتى «اتىراۋدىڭ» شابۋىلشىسى ەۆگەني كوزلوۆ تۇيىندەدى. كوزلوۆ وتكەن ايداعى ءتورت ويىندا «اقسۋ» مەن «كاسپي» كوماندالارىنىڭ قاقپالارىنا ەكى گول سوقتى.
ال تامىز ايىنىڭ ۇزدىك باپكەرى رەتىندە چەمپيوناتتاعى ارىپتەستەرىنىڭ قولداۋىنا يە بولعان «ماقتاارال» كومانداسىنىڭ جانە قازاقستان جاستار قۇراماسىنىڭ باس باپكەرى قايرات نۇرداۋلەتوۆ تانىلدى.
ق.نۇرداۋلەتوۆتىڭ باسشىلىعىمەن «ماقتاارال» كومانداسى تامىز ايىندا «جەتىسۋ» (1:0) مەن «شاحتەر» (3:1) كوماندالارىمەن ويىندا جەڭىسكە جەتىپ, مۇمكىن بولعان التى ۇپايدى يەلەنىپ, شاشپاي-توكپەي قورجىندارىنا سالدى. وسى ناتيجەلەردىڭ ارقاسىندا تۇركىستان وبلىسىنىڭ ۇجىمى تۋرنير كەستەسىندەگى جاعدايىن جاقسارتىپ, قاۋىپتى ايماقتان شىعا ءبىلدى. قازىرگى تاڭدا «ماقتاارال» ۇزدىكتەر قاتارىندا 20 ويىننان كەيىن 21 ۇپايمەن 11-ورىندا كەلەدى. سونداي-اق ولاردىڭ ەنشىسىندە ءالى وينالماعان ءبىر ماتچ بار.
مامىر ايىنىڭ سوڭىنا قاراي كوماندانىڭ تىزگىنىن قايرات نۇرداۋلەتوۆ ۇستاعالى بەرى «ماقتاارال» بۇگىنگە دەيىن ىشكى چەمپيوناتتا 10 ويىن وتكىزىپ, سونىڭ تەڭ جارتىسىندا جەڭىسكە جەتكەن. تاعى ءۇش ويىندا قارسىلاستارىمەن تەڭ تۇسسە, نەبارى ەكى ماتچتا عانا جەڭىلىستىڭ كەرمەك ءدامىن تاتقان. «ماقتاارالدىڭ» ەل چەمپيوناتىندا 1 شىلدە كۇنى 14-تۋر اياسىندا سىرت الاڭدا «اقتوبەمەن» (1:0) وتكەن ويىندا جەڭىلگەنىن دە ايتا كەتكەن ءجون.
ساۋالدامادا ەكىنشى جانە ءۇشىنشى ورىنداردى «ورداباسىنىڭ» باپكەرى الەكساندر سەدنەۆ پەن «قىزىلجاردىڭ» باپكەرى ءالي اليەۆ ءوزارا ءبولىستى. وتكەن ايدا «ورداباسى» كلۋبى ءتورت ماتچتىڭ ەكەۋىندە قارسىلاستارىنان باسىم تۇسسە, ءبىر كەزدەسۋدە تەڭ ويناپ, بىرەۋىندە جەڭىلىپ قالدى. ال «قىزىلجار» كومانداسى ءتورت باسەكەنىڭ ەكەۋىندە جەڭىسكە جەتىپ, ەكەۋىندە تەڭ ناتيجە تىركەدى.
23-24 قىركۇيەك (سەنبى, جەكسەنبى) كۇندەرى ەل چەمپيوناتىنىڭ كەزەكتى تۋر ويىندارى وتەدى. اتاپ ايتقاندا, ححIII تۋردا «ورداباسى» – «استانا», «توبىل» – «جەتىسۋ», «قايرات» – «شاحتەر», «قايسار» – «كاسپي», «ماقتاارال» – «اقسۋ», «وقجەتپەس» – «اتىراۋ» جانە «قىزىلجار» – «اقتوبە» كوماندالارى كەزدەسەدى.
