گيننەستىڭ رەكوردتار كىتابىنا بۇعان دەيىن دە ەكى رەت ەنگەن يلليۋزيونيست جەڭىس ايتجانوۆ وسىدان ەكى جىل بۇرىن ساۋساقتارىنىڭ اراسىندا ءبىر تيىندى توقتاۋسىز 55 سەكۋند ىشىندە 55 رەت اينالدىرىپ, ەلدى تاڭعالدىرعان ەدى. وسى جازدا ءتورت تيىندى ساۋساقتارىنىڭ اراسىندا 14 رەت 60 سەكۋند ىشىندە شىر اينالدىرسا, ونى الەمنىڭ مەن دەگەن يلليۋزيونيستەرى دە قايتالاي الماي وتىر. سول جولى سيقىرشى تيىنعا قاتىستى تريۋگىن شىڭداپ, ءۇشىنشى رەكوردىنا دايىندالىپ جۇرگەنىن جەتكىزگەن بولاتىن.
الايدا بۇل جولى جەڭىس ايتجانوۆ مۇلدە جاڭا قىرىنان تانىلدى. قالا كۇنى قارساڭىندا گيننەس رەكوردتار كىتابىنىڭ وكىلدەرى شاقىرىپ, وتانداسىمىزدىڭ جاڭا رەكوردىن رەسمي تۇردە تىركەدى. ەندىگى جەتىستىكتىڭ تيىندار مەن تسيرك تريۋكتەرىنە ەشقانداي قاتىسى جوق.
سيقىرشى الماتىنىڭ تۋعان كۇنىنە 5040 رۋبيك كۋبيكتەن تۇراتىن الىپ موزايكا قۇراستىردى. قالا كۇنىنە ارنالعان قايتالانباس كومپوزيتسيادا «قازاقستان» قوناقۇيى بەينەلەنگەن.
«مۇنداي موزايكانىڭ يدەياسى مەن سيۋجەتى ءبىر جارىم جىل بۇرىن ويىما كەلدى. ءبىز ءوز كوماندامىزبەن بۇل باستامانىڭ تۇجىرىمى قانداي بولادى, الىپ موزايكا ءۇشىن قالامىزدىڭ قانداي كورىكتى جەرىن تاڭداي الامىز دەگەن ساۋالدار توڭىرەگىندە ۇزاق ويلاستىق. مەنىڭشە, ءبىزدىڭ بۇل جۇمىسىمىز الماتىلىقتارعا ۇنادى. الماتىنى ارالاۋعا كەلگەن قالا قوناقتارى سۋرەتكە تۇسەتىن كورىكتى مەكەن بولۋعا سۇرانىپ تۇر», دەيدى جەڭىس ايتجانوۆ.
قازىردىڭ وزىندە موزايكالىق پولوتنو وڭتۇستىك استانا تۇرعىندارىنا ۇنايتىنى بايقالادى. ونىڭ ايعاعى رەكوردشى جىگىت مىڭ سان العىس پەن قۇتتىقتاۋلارعا بولەنىپ وتىر.
تاڭعاجايىپتارعا سەنەتىن سيقىرشى رەپەرتۋارىنداعى فوكۋستارىنىڭ جارتىسىنىڭ اۆتورى ءوزى بولعاندىقتان, ەل دە ونىڭ ونەرىن شىنايى دەپ ەسەپتەيدى.
الماتى
