سۋرەتتى تۇسىرگەن – ەرلان ومار, «ەQ»
رەسپۋبليكالىق «Egemen Qazaqstan» گازەتىنىڭ رەداكتسياسىنا ارنايى كەلگەن مارتەبەلى مەيمان يران مەن قازاقستان اراسىنداعى بايلانىستىڭ تاريحى تەرەڭدە جاتقانىن ايتتى. ءارى قازىر سول بايلانىستىڭ الەۋەتىن تولىق پايدالانا الماي وتىرعانىمىزعا قىنجىلىس ءبىلدىردى.
«وتىز جىل ىشىندەگى ديپلوماتيالىق بايلانىستار بارىسىندا ءبىزدىڭ ەلدەر اراسىندا ەشقانداي تۇيتكىلدى ماسەلەلەر بولعان ەمەس. ونىڭ ۇستىنە ەكى مەملەكەت كاسپي تەڭىزى ارقىلى شەكارالاسىپ جاتىر. مادەنيەتىمىزدە دە ورتاق دۇنيەلەر كوپ. سوندىقتان يران مەن قازاقستان اراسىنداعى بايلانىستى بارىنشا جاقسارتۋعا بەيىلدىمىز. دوستىعىمىز بەن باۋىرلاستىعىمىز تەرەڭگە بويلاسا دا, قازىر سول الەۋەتىمىزدى تولىق پايدالانا الماي وتىرعانىمىز وكىنىشتى. ماسەلەن, يراندىقتار باسقا ەلدەرمەن سالىستىرعاندا قازاقستانعا وتە سيرەك كەلەدى. سول سەكىلدى قازاقستان تۇرعىندارى دا ءبىزدىڭ ەلگە از قاتىنايدى. ايتالىق, الىس-بەرىسىمىز بەن بارىس-كەلىسىمىز اسا مىقتى بولماسا دا, الىستاعى ماجارستاندا 2 مىڭنان استام يراندىق ستۋدەنت ءبىلىم الادى. ال ىرگەمىزدە تۇرعان قازاقستاندا وقىپ جاتقان يراندىق ستۋدەنتتەر 20 شاقتى عانا. سوندىقتان ەلدەرىمىزدى بۇقارالىق اقپارات قۇرالدارى ارقىلى ناسيحاتتاپ, ءوزارا بايلانىستى نىعايتۋعا كۇش سالساق دەيمىز. بۇل جەردە باسىلىمداردىڭ ءرولى وتە زور», دەدى ءالي اكبار دجوۋكار.
ءوز كەزەگىندە ديحان قامزابەك ۇلى «قازاق گازەتتەرىنىڭ» بۇگىنگى جاي-كۇيىمەن تانىستىرىپ, تاريحى تامىرلاس قوس مەملەكەت اراسىنداعى ىنتىماقتاستىقتى جاڭا دەڭگەيگە كوتەرۋگە ۇلەس قوسۋعا دايىن ەكەنىن جەتكىزدى.
«قازاقستان مەن يران اراسىنداعى بايلانىستىڭ قازىرگىدەن دە جاقسارا, جاندانا تۇسكەنىن قۇپتايمىز. كۇنى كەشە عانا اقش-تا ءبىزدىڭ ەلدەردىڭ باسشىلارى كەزدەستى. مۇنى جاقسىلىققا بالاپ وتىرمىز. ونىڭ ۇستىنە ەلىمىزدەگى باس گازەتتىڭ رەداكتسياسىنا ارنايى كەلىپ, وسى كەزدەسۋگە ءوزىڭىزدىڭ باستاماشى بولعانىڭىزعا ريزامىز. جالپى, ءبىزدىڭ سەرىكتەستىككە قاراستى باسىلىمداردا شىعىس وركەنيەتىنە, ونىڭ ىشىندە يران مادەنيەتىنە قاتىستى تۇششىمدى ماقالالار ءجيى جاريالانىپ تۇرادى. الداعى ۋاقىتتا دا وسى باعىتتا سەريالىق ماقالالار ۇسىنۋدى جوسپارلاپ وتىرمىز. يگى باستاماعا سىزدەر دە اتسالىسساڭىزدار دەگەن تىلەگىمىز بار. ويتكەنى وقىرمان قاۋىم قازىرگى جاڭارعان يراننىڭ جاعدايىمەن جاقىن تانىسقىسى كەلەدى. سول سەكىلدى سىزدەر ارقىلى ءبىز دە ءوز ەلىمىزدى يراندىقتارعا ناسيحاتتاساق دەگەن تىلەگىمىز بار. تۇپتەپ كەلگەندە, مۇنىڭ ءبارى حالىقتار اراسىنداعى سەنىمدى كۇشەيتەدى», دەدى ديحان قامزابەك ۇلى.
جىلى راۋىشتە وربىگەن كەزدەسۋ بارىسىندا تاراپتار بۇقارالىق اقپارات قۇرالدارى سالاسىنداعى بايلانىستى ودان ءارى نىعايتۋ تۋرالى كەلىسىمگە كەلدى.
