جالپى, قوعام العا جىلجۋ ءۇشىن وعان قوزعاۋ سالاتىن كۇش كەرەك. جولداۋ سول كۇشتىڭ ءرولىن اتقارىپ, جاڭا باعدارلاماعا جول اشىپ, بولاشاققا باعىت-باعدار بەرەدى. تەك ونى ءتيىمدى پايدالانۋ اركىمنىڭ ىسكەرلىك قابىلەتىنە بايلانىستى. مەملەكەت باسشىسى, ماسەلەن, ۇلتتىق بيزنەستىڭ الەۋەتىن ارتتىرۋ كەرەك دەگەندى وسىمەن بىرنەشە رەت ايتتى. شىن مانىندە, بۇگىنگى قوعام ءۇشىن بيزنەستىڭ الەۋەتىن ارتتىرۋدىڭ ماڭىزى زور. ونىڭ قاجەتتىلىگىن بىلەمىز. بىراق سونى قالاي جۇزەگە اسىرۋ كەرەك دەگەنگە كەلگەندە تاعى دا اياعىنا جەم تۇسكەن اتتاي كىبىرتىكتەپ قالامىز. سەبەبى بۇرىنعى جۇيەگە ابدەن قالىپتاسىپ قالعان ەسكى كادرلارمەن جاڭا جۇيە قۇرۋ مۇمكىن ەمەس. پرەزيدەنت كادر ساياساتى ماسەلەسىن دە ورىندى قوزعادى. مىنە, وسى ايتىلعان ماسەلەلەر قالاي جۇزەگە اسادى ەكەن دەپ قاراپ وتىرماي, ونىڭ ەرتەرەك ءىس جۇزىنە اسا بەرۋىنە بارشامىز ءبىر كىسىدەي اتسالىسساق الىنبايتىن اسۋ, باعىندىرمايتىن بەلەس بولمايدى.
سونداي-اق بۇل جولداۋدى ماقتاشىلاردىڭ پايداسىنا شەشىلدى دەسەك بولادى. داربازا–ماقتاارال تەمىرجولىن سالۋ – كوپتەن بەرى ايتىلىپ جۇرگەن ماسەلە. پرەزيدەنت جولداۋىندا بۇل ماسەلەگە دە نازار اۋدارىلدى.
سۋ رەسۋرستارى جانە يرريگاتسيا مينيسترلىگىن قۇرۋ جونىندەگى شەشىمى ايرىقشا قولداۋعا تۇرارلىق. ويتكەنى سۋدى تىرشىلىك كوزى دەيتىن بولساق, سوڭعى كەزدەرى بۇل ماسەلە كۇن تارتىبىندە وتكىر تۇر. تىرشىلىك كوزىن ءتيىمدى پايدالانۋدىڭ ماڭىزى زور. مەن ءوزىم اۋىل شارۋاشىلىعى مامانى بولعاندىقتان, جولداۋداعى يگى باستامالاردى رەت-رەتىمەن سارالاپ كورەيىن.
ءبىرىنشى, بىزگە كەلەتىن اعىن سۋ 3 مەملەكەتتەن ءوتىپ كەلەتىنىن ەسكەرسەك, سۋ رەسۋرستارى جانە يرريگاتسيا مينيسترلىگى اۋاداي قاجەت. سۋسىز ءونىم دە, ءومىر دە جوق. تەك كورشىلەرمەن ۇتىلمايتىن مامىلەگە كەلىپ, ديپلوماتيالىق كەلىسسوزدەردى بايىپتى جۇرگىزگەن ءجون. بۇل سالانىڭ ءمينيسترى ءبىرىنشى كەزەكتە ديپلومات بولۋى كەرەك. ىشكى جاعدايدى رەتتەپ, سالا ماماندارى ارقىلى ارنالاردى, ارىق-اتىزداردى, قاتاڭ باقىلاۋدا ۇستاۋى كەرەك.
ەكىنشى, داربازا–ماقتاارال تەمىرجولى. تۇركىستان وبلىسىنىڭ قيىرداعى ءمىرزاشول ايماعىنداعى «اق التىندى» ماقتاارال اۋدانىنا تەمىرجولدىڭ بارۋى تەك قارىم-قاتىناس ءۇشىن عانا ەمەس, شەكارادا قالىپ قويعان اۋىل-ايماقتار ءۇشىن دە, ەلىمىزدى كوكونىسپەن قامتاماسىز ەتىپ وتىرعان ايماقتار ءۇشىن دە ستراتەگيالىق تۇرعىدان وتە ماڭىزدى. ءارى ارزانداۋ بولار ەدى. «كەڭەسىپ پىشكەن تون كەلتە بولماسا كەرەك»...
ءۇشىنشى, وتاندىق ءونىم وندىرۋشىلەردى قولداۋ. وسى ماسەلەمەن ەكى مىڭىنشى جىلدان بەرى اينالىسىپ كەلەمىز. نەشە ءتۇرلى قيتۇرقى ارەكەتتەردىڭ كۋاسىمىز. بىرىنشىدەن, ساتىپ الۋشىلاردىڭ «بەرسەڭ دە بەر بەس تەڭگە, بەرمەسەڭ دە بەر بەس تەڭگە» دەگەن قىلىعى ديقانداردى قاجىتىپ ءبىتتى. ءونىم وندىرۋشىلەر ءونىمى پىسكەن سوڭ سولاردىڭ ايتقان باعاسىنا وتكىزۋگە ءماجبۇر. ەگىستىگىڭدى سۋاراتىن اعىن سۋ وتە قىمبات. امال جوق, ايتقان اقشاسىن تولەپ الاسىڭ. مونوپولياعا قارسى اگەنتتىك قىزمەتكەرلەرى بۇل تۇرعىدا بەيتاراپ قالىپ ۇستانادى, «سەن تيمەسەڭ, مەن تيمەن» دەيدى. سوندا ديقانداردىڭ قۇقىعىن كىم قورعايدى؟ ەندى جولداۋداعى «وتاندىق ءونىم وندىرۋشىلەردى قولداۋ» باعدارلاماسىن وقىپ, ءبىزدىڭ دە كۇنىمىز تۋدى دەپ قۋانىپ وتىرمىز.
تۇرعانبەك قاناەۆ,
«اقوردا» شارۋا
قوجالىعىنىڭ توراعاسى
تۇركىستان وبلىسى,
شاردارا اۋدانى
