سونىمەن بيىلعى باس جۇلدە ازەربايجان استاناسى – باكۋدەن كەلگەن ماحير تاگيزادەگە بۇيىردى. وعان قوسا بۇل ونەرپاز «قازاقستان كومپوزيتورلارىنىڭ تۋىندىسىن شەبەر ورىنداعانى ءۇشىن» دەپ اتالاتىن ارناۋلى سىيلىققا دا يە بولعانىن ايتا كەتۋ كەرەك.
كونكۋرستىڭ قازىلار القاسىنىڭ ءتورايىمى, كسرو جانە قازاقستاننىڭ حالىق ءارتىسى, سوتسياليستىك ەڭبەك ەرى, كسرو جانە قازاقستاننىڭ مەملەكەتتىك سىيلىقتارىنىڭ لاۋرەاتى, قازاق كلاسسيكالىق ونەرىنىڭ بۇلبۇلى بيبىگۇل تولەگەنوۆا سالتاناتتى ماراپاتتاۋ راسىمىندە: «بايقاۋىمىزدىڭ بارشا قاتىسۋشىسىن, جاس ورىنداۋشىلاردى شىن جۇرەكتەن قۇتتىقتاي وتىرىپ, قولداۋ بىلدىرگەن مادەنيەت جانە اقپارات مينيسترلىگىنە, الماتى اكىمدىگىنە, «Samruk-Kazyna Trust» الەۋمەتتىك جوبالاردى دامىتۋ قورىنا, اباي اتىنداعى قازاق ۇلتتىق وپەرا جانە بالەت تەاترى مەن بارلىق دەمەۋشىلەرىمىزگە العىس بىلدىرەمىن! ولاردىڭ قولداۋىنىڭ ارقاسىندا كونكۋرس ويداعىداي ءوتتى.
بيبىگۇل تولەگەنوۆانىڭ حالىقارالىق ۆوكاليستەر كونكۋرسى مەنىڭ جەكە كونكۋرسىم ەمەس, بۇل – ەل مادەنيەتىنىڭ يگىلىگى. بۇل بايقاۋ ورتالىق ازيا ەلدەرىندەگى كلاسسيكالىق ونەردەگى جالعىز جوبا بولعاندىقتان ءبىزدىڭ كونكۋرسقا قاتىسۋ ءۇشىن الىس جانە جاقىن شەتەلدەردەن كوپتەگەن تالانت يەلەرى كەلىپ, كاسىبي وپەرا جانە كونتسەرتتىك كامەرالىق انشىلەر جينالادى. بۇل ءبىز ءۇشىن جەتىستىك, قۋانىش. بيىلعى كونكۋرس ادەتتەگىدەي جوعارى دەڭگەيدە ءوتتى. كونكۋرستا جاڭا تالانتتار تابىلىپ, كلاسسيكالىق ونەردىڭ جاس قارلىعاشتارى قانات قاقتى. ءدال وسى كونكۋرستىڭ لاۋرەاتتارى الەمدىك ساحناعا شىعىپ, ەلىمىزدىڭ اتىن شىعارادى»,
دەدى.
وسىمەن ون ەكىنشى رەت وتكەن حالىقارالىق بايقاۋدىڭ گران-پري جۇلدەسىن جەڭىپ العان ماحير تاگيزادە جۋرناليستەرگە بەرگەن سۇحباتىندا: «قۋانىشىم قوينىما سىيماي تۇر, وسى كونكۋرسقا ءۇش رەت قاتىسقىم كەلسە دە ءساتى تۇسپەگەن ەدى. ەندى, مىنە, قاتىسىپ قانا قويماي, جەڭىمپاز اتاندىم. مەن ءوز ەلىمدەگى جانە باسقا دا كوپتەگەن حالىقارالىق كونكۋرسقا قاتىسقانمىن. بۇل جولى الماتىدا, بيبىگۇل احمەتقىزىنىڭ وتانىندا وتكەن بايقاۋعا قاتىسقانىما وتە قۋانىشتىمىن. قازاقستاندى ەكىنشى ءۇيىم دەپ سانايمىن. كونكۋرس تالابى بويىنشا ءبىز قازاق رومانسىن ورىندادىق, ودان وزگە ءوزىمنىڭ جەكە قالاۋىم بويىنشا فينالدا «اباي» وپەراسىنان اريا ورىندادىم. قازاقتىڭ كلاسسيكالىق شىعارمالارىن شىرقاۋ جانىمدى راحاتقا بولەيدى», دەدى.
گالا-كونتسەرتتە اباي اتىنداعى قازاق ۇلتتىق وپەرا جانە بالەت تەاترىنىڭ سيمفونيالىق وركەسترىنىڭ سۇيەمەلدەۋىمەن (ديريجەرى ە.احمەدياروۆ) كونكۋرس لاۋرەاتتارى ەڭ تانىمال كلاسسيكالىق اندەردى ورىندادى.
2001 جىلدان بەرى وتكىزىلىپ كەلە جاتقان حالىقارالىق بايقاۋعا بيىل 70-تەن اسا ۇمىتكەردەن ءوتىنىش كەلىپ تۇسسە, ونىڭ 66-سى قاتىسىپ, 11 ەلدەن جاس تالانتتار باقتارىن سىنادى. قازاقستان, رەسەي, قحر, چەحيا, ليۋكسەمبۋرگ, يتاليادان الەمدىك وپەرا ونەرىنىڭ مايتالماندارىنان قۇرالعان جوعارى دەڭگەيدەگى كاسىبي حالىقارالىق قازىلار القاسى قاتىسۋشىلاردىڭ ونەرىنە باعا بەردى.
سونىمەن ءبىرىنشى ورىنعا استانالىقتار ازيزا وماروۆا مەن ابىلاي بەكەن (قازاقستان) لايىقتى دەپ تانىلسا, ەكىنشى جۇلدەلى ورىندى نۇرعالىم امانباي (قازاقستان), اتاش كاراەۆ (ازەربايجان), ليانتسزە حاو (قىتاي) الدى. ءۇشىنشى ورىنعا اياجان قۋانىشاليەۆا (قازاقستان), ديار نۇرسۇلتانوۆ (قازاقستان), ماقسات ساماتوۆ (قازاقستان), گالينا تسولاكيان (ارمەنيا) يە بولدى.
بيبىگۇل تولەگەنوۆا رەپەرتۋارىنداعى قازاقستان كومپوزيتورلارىنىڭ اندەرىن ۇزدىك ورىنداعانى ءۇشىن ايبەك حايرۋللا (قازاقستان) ارناۋلى سىيلىقپەن ماراپاتتالسا, ماريامگۇل تولەگەنوۆا اتىنداعى ء«ۇمىت» سىيلىعىن جويان يۋ (قىتاي) الىپ كەتتى.
كونكۋرستىڭ ۇزدىك كونتسەرتمەيستەرى رەتىندە ۆيكتوريا يۆانوۆا (رەسەي) مەن ءزارۋ جازىقباەۆا (قازاقستان) قۇرمەتتەن قۇر الاقان قالعان جوق.
الماتى
