ءىس-شارانى جۇرگىزىپ وتىرعان مەملەكەتتىك سىيلىقتىڭ لاۋرەاتى, بەلگىلى جۋرناليست ساۋىتبەك ابدراحمانوۆ شارحان قازىعۇلدىڭ رومانىن وتاندىق كوركەم شىعارماداعى جاڭاشىلدىق رەتىندە جوعارى باعالادى. اتاپ ايتقاندا, شىعارماداعى لوكاتسيا بايلىعىنا توقتالىپ, ءابدىجامىل نۇرپەيىسوۆتىڭ «قان مەن تەرىندەگىدەي» تىرشىلىك نەگىزى سۋدان باستاپ, قازاقستان دالاسىنان وربىگەن وقيعا اۋعانستان, ودان قۇرلىق اسىپ امەريكادا جالعاسىپ, تۋعان ەلگە ورالعان قازاقتىڭ جان ازابى مەن تاعدىر-تالايى ارقىلى جازۋشى حح-ءححى عاسىرداعى ءۇش بۋىن وكىلىنىڭ ۋاقىت كەڭىستىگىن قامتىعان. «رومان الەۋمەتتىك فيلوسوفيالىق شىعارماعا كەلىڭكىرەيدى. ەڭ باستى نارسە, تۋىندى قازاقتىڭ رۋحىن كوتەرەدى», دەدى ساۋىتبەك ابدراحمانوۆ.
«شىعارمانىڭ اتاۋى ايتىپ تۇرعانداي, ادام بالاسىن تولعاندىراتىن ماڭگىلىك سۇراقتار جان ازابىنان تۋادى. تۋعان توپىراعى ارالعا 37 جىلدان سوڭ ورالعان ءابۋ كۇرەسكەر رۋحىنىڭ ارقاسىندا ازامات بولىپ ءوسىپ-جەتىلگەنىن كورگەن اكەسى ەردەننىڭ قايسار دا اسقاق بەينەسى سۇيسىندىرەدى. جان تولعانىسىنان تۋىندايتىن سۇراقتاردىڭ جاۋابىن وسى اكەلى-بالالى جاندار تاعدىرىنان, ءومىردىڭ ءمانىن جۇرەك, سانامەن تۇيسىنگەن ارەكەت-تانىمىنان تانۋعا بولادى», دەدى قوعام قايراتكەرى, قالامگەر ءمادي ايىمبەتوۆ.
جازۋشى-دراماتۋرگ روزا مۇقانوۆا «كۇلپەت» رومانى قازاق قوعامىندا ايتۋلى وقيعالاردىڭ بىرەگەيى بولعانى راس. ەشكىمدى قايتالامايدى. جانىن جەگەن كەيىپكەر ارپالىسى, ول ارپالىس كۇيزەلىسكە ەمەس, ەركىندىككە, ادام جانىنىڭ ازاتتىعىنا ۇمتىلدىرادى» دەپ اۆتوردىڭ بىردەن رومان جازىپ شىققان باتىلدىعىن ۇلگى ەتتى.
«كۇلپەت» كىتابىنا رەداكتورلىق ەتكەن فيلولوگيا عىلىمدارىنىڭ دوكتورى, اكادەميك شەرۋباي قۇرمانباي ۇلى, سەنات دەپۋتاتى نۇرتورە ءجۇسىپ, ءماجىلىس دەپۋتاتى ەرمۇرات باپي, ادەبيەت سىنشىسى امانگەلدى كەڭشىلىك ۇلى شىعارمانىڭ ءار قىرىنا توقتالىپ, سۇبەلى پىكىر ايتتى.
«مەنىڭ ويىمشا, ءالى دە تەرەڭدەتە تۇسەتىن تۇستار بار. ماسەلەن, ءابۋ مەن اسەل ەكەۋى اراسىنداعى ماحابباتتى تەرەڭدەتە ءتۇسۋ كەرەك. تاقىرىپ تىڭ, قازاق ادەبيەتى ءۇشىن جاڭا تاقىرىپ. اۆتور سيتۋاتسيا تۋدىرا بىلگەن. ارتىقشىلىقتارىمەن قاتار, ءالى دە بولسا شيراتاتىن جەرلەرى بار», دەدى سىنشى امانگەلدى كەڭشىلىك ۇلى.
