فوتو: اشىق دەرەككوز
«الداعى جىلۋ ماۋسىمىنىڭ ءۇزىلىسسىز ءوتۋىن قامتاماسىز ەتۋ ماقساتىندا مينيسترلىك كوممۋنالدىق, الەۋمەتتىك جانە تۇرعىن ءۇي نىساندارىنىڭ دايىندىعىن سونداي-اق ءبىلىم بەرۋ نىساندارىنىڭ دايىندىعىن باقىلاۋعا الدى. وقۋ جىلى باستالعانعا دەيىن, ياعني 1 قىركۇيەككە دەيىن بارلىق ءبىلىم بەرۋ نىساندارى جىلىتۋ ماۋسىمىنا دايىن بولۋى كەرەك ەدى. وبلىس اكىمدىكتەرى تاراتقان اقپاراتقا سايكەس, بۇگىندە ءبىلىم بەرۋ نىساندارىنىڭ دايىندىعى 99,6 پايىزدى قۇراپ وتىر», دەدى قانات شارلاپاەۆ ۇكىمەت وتىرىسىندا.
جاريالانعان مالىمەتتەرگە سايكەس, 8 وبلىستاعى 42 ءبىلىم بەرۋ نىسانىندا ءالى دە جۇمىس جۇرگىزىلىپ جاتىر. ونىڭ ىشىندە 24 نىسان كۇردەلى جوندەۋدەن ءوتتى. قالعان نىساندار بويىنشا جىلۋ جۇيەلەرىن جوندەۋ جۇمىستارى اياقتالعان جوق.
دەنساۋلىق ساقتاۋ نىساندارى بويىنشا دايىندىق 98,9 پايىزدى قۇرادى (جوسپار – 5607, ناقتى – 5545). 9 وبلىستاعى 62 ۋچاسكەدە جۇمىس جالعاسىپ جاتىر. جىلىتۋ ماۋسىمىنا دايىن ەمەس نىسانداردىڭ كوبى اباي وبلىسىندا (28), اقتوبە (12) جانە اتىراۋ (6) وبلىستارىندا بايقالادى.
«تۇرعىن ءۇي كەشەنىنە كەلەتىن بولساق, 47 مىڭ تۇرعىن ۇيدە دايىندىق جۇمىستارى اياقتالدى. بۇل جۇرگىزىلگەن جۇمىستىڭ 94 پايىزىن قۇرايدى (جوسپار – 50 085). 3 مىڭعا جۋىق تۇرعىن ءۇي (2993) كۇزگى-قىسقى كەزەڭگە ءالى دايىن ەمەس. دايىندىقتىڭ تومەن كورسەتكىشى ماڭعىستاۋ وبلىسىندا (891 تۇرعىن ءۇي), شىمكەنت (478 تۇرعىن ءۇي) جانە الماتى (331 تۇرعىن ءۇي) قالالارىندا بايقالادى», دەدى قانات شارلاپاەۆ.
مينيستر بيىلعى جىلدىڭ قىركۇيەك ايىنىڭ سوڭىنا دەيىن ينجەنەرلىك ينفراقۇرىلىمدى جوندەۋ جۇمىستارىن اياقتاۋ قاجەتتىگىن اتاپ ءوتتى. جالپى رەسپۋبليكا بويىنشا بارلىق قارجىلاندىرۋ كوزدەرىن پايدالانا وتىرىپ, 573 شاقىرىم جىلۋ جەلىلەرىن جوندەۋ جوسپارلانعان. بۇگىنگى تاڭدا 498 شاقىرىم نەمەسە جوسپاردىڭ 86,8 پايىزى ورىندالدى.
وسى جىلى 133 شاقىرىم جىلۋ جەلىلەرىن قايتا جاڭارتۋعا رەسپۋبليكالىق بيۋدجەتتەن 109,5 ملرد تەڭگە ءبولىندى (ونىڭ ىشىندە نىسانالى ترانسفەرتتەر – 72,4 ملرد تەڭگە, ۇكىمەت رەزەرۆى – 36,2 ملرد تەڭگە, بيۋدجەتتىك نەسيە – 0,9 ملرد تەڭگە).
«بۇگىنگى كۇنى جۇمىس 78 پايىزعا ورىندالدى, ياعني 103 شاقىرىم جىلۋ جەلىلەرى تارتىلدى. بىرقاتار وڭىردە جوندەۋ جۇمىستارىنىڭ قارقىنى تومەن جانە ۋاقىتىندا اياقتالماي قالاتىن 10 پروبلەمالىق اۋماق بار. ماڭعىستاۋ وبلىسىنا 2 جوبانى جۇزەگە اسىرۋعا 3,5 ملرد تەڭگە ءبولىندى (1 جوبا ىسكە اسىرىلۋدا). بۇگىنگى تاڭدا 5,1 شاقىرىمدىق جوسپارمەن 100 مەتر عانا توسەلدى. قۇبىر ونىمدەرىنىڭ قاجەتتى كولەمى جوق (جەتكىزۋ مەرزىمى 20 قىركۇيەك). سولتۇستىك قازاقستان وبلىسىندا دا جاعداي وسىنداي, پەتروپاۆل قالاسىندا 1 جوبا (وتپەلى) بويىنشا 1,3 كم جوسپارمەن 200 مەتر توسەلدى (جەتكىزۋ مەرزىمى 30 قىركۇيەك). سونىمەن قاتار شىعىس قازاقستان, قاراعاندى جانە قىزىلوردا وبلىستارىندا 2 جوبا, سونداي-اق شىمكەنتتە ءبىر جوبا بويىنشا ورىندالۋ 70 پايىزدان تومەن», دەپ ءتۇسىندىردى ق.شارلاپاەۆ.
سونداي-اق ونەركاسىپ جانە قۇرىلىس ءمينيسترى جوعارىدا اتالعان جوبالار بويىنشا جوندەۋ جۇمىستارىنىڭ ۋاقتىلى اياقتالماي قالۋ قاۋپى جوعارى ەكەنىن ايتتى. وسىعان بايلانىستى جەرگىلىكتى اتقارۋشى ورگاندار جوبالاردى اياقتاۋ ءۇشىن جەدەل تۇردە ءتيىمدى شارالار قابىلداۋى قاجەت.
