وقىرمانعا جول تارتقان جاڭا كىتاپتا پاراساتتى ءپۋبليتسيستىڭ ءومىرىنىڭ سوڭعى جىلدارىندا مەرزىمدى باسپاسوزدە قازاق جانە ورىس تىلىندە جارىق كورگەن ماقالالارى, سۇحباتتارى, وي-تولعامدارى, پىكىرلەرى توپتاستىرىلعان. اسىرەسە تاۋەلسىزدىگىمىزدىڭ ءۇشىنشى ون جىلدىعىندا ورىن العان ساياسي-رۋحاني ماسەلەلەر تۋرالى جازبالار كوتەرگەن جۇگىنىڭ اۋقىمدىلىعىمەن, تەرەڭ ساراپتامالىعىمەن, باستىسى وقىرماندى وقۋعا جەتەلەپ وتىراتىن كوركەم تىلىمەن باۋراپ اكەتەدى. سونداي-اق اۆتور ادام بويىنداعى ىزگىلىك, يگىلىك, ادالدىق, ار تازالىعى, يماندىلىق سياقتى قۇندىلىقتاردى قوعاممەن بايلانىستىرىپ, سالماقتى وي تولعايدى.
مازمۇندى ءىس-شارادا الدىمەن ءسوز العان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ عىلىم, كوممەرتسيالاندىرۋ جانە ينتەرناتسيونالداندىرۋ جونىندەگى پرورەكتورى جاننا قۇرمانعاليەۆا 2000-جىلدارى كەنجەبولات جولدىبايمەن مادەنيەت, اقپارات جانە قوعامدىق كەلىسىم مينيسترلىگىندە بىرگە قىزمەت اتقارعان جىلدارى جاقىن تانىس بولىپ, ول كىسىنىڭ ادالدىقتى ار تۇتقان ءادىل ازامات بولعانىن ايتتى.
ودان كەيىن پارلامەنت سەناتىنىڭ دەپۋتاتى, قازاقستان باس رەداكتورلار كلۋبىنىڭ پرەزيدەنتى بيبىگۇل جەكسەنباي بەلگىلى قالامگەردىڭ اتالعان كلۋبتى باسقارعان جىلدارداعى ەڭبەگىنە ايرىقشا توقتالدى.
– كەنجەبولات اعامەن باس رەداكتورلار كلۋبىنىڭ جۇمىسى بارىسىندا تانىسىپ, 2013-2014 جىلدارى ول كىسىمەن بەلسەندى جۇمىس ىستەدىم. كەز كەلگەن قوعامنىڭ دامۋىنا ازاماتتىق قوعامنىڭ دامۋى ەرەكشە اسەر ەتەدى. ەلىمىزدەگى ازاماتتىق ينستيتۋتتىڭ قالىپتاسۋىنا اعامىزدىڭ دا قوسقان ۇلەسى زور. باس رەداكتورلار كلۋبىن باسقارعان جىلدارى وسى باعىتتاعى بىرقاتار يگىلىكتى شارالارعا باستاماشى بولدى. سونىڭ ىشىندە بۇقارالىق اقپارات قۇرالدارى تۋرالى زاڭعا وزگەرىستەر ەنگىزۋگە بايلانىستى وتكىر پىكىر ايتىپ, باتىل ويلارىن جازدى. سونىمەن قاتار قوعامداعى وزەكتى ماسەلەلەردى كلۋب اتىنان بولسىن, ءوز اتىنان بولسىن تەرەڭنەن قوزعاپ, ونى قازاق وقىرماندارىنا عانا ەمەس, ورىس اۋديتورياسىنا دا جەتكىزدى, دەدى سەناتور.
مەملەكەت جانە قوعام قايراتكەرى مۇحامبەت كوپەەۆ زامانداسى ك.جولدىبايدىڭ ونىڭ ۇلىتاۋ ءوڭىرىنىڭ عانا ەمەس, بارشا ەل ماقتانىش تۇتاتىن ازامات دارەجەسىنە كوتەرىلگەنىن ءسوز ەتتى. «قالامگەردىڭ جاڭا كىتابىن الىپ, وقىپ شىقتىم. مۇندا ول وتكەن زامان مەن بۇگىنگى ۋاقىتتى ءسوز ەتىپ قانا قويماي بولاشاقتا قانداي بولامىز دەگەن ساۋالدارعا دا جاۋاپ بەرۋگە تىرىسقان. تۇلعالار تۋرالى ايتقان وي-تولعامدارى دا ەرەكشە. حالقىمىزدا «ارتىندا بالاسى قالسا كوزى قالدى دە, ءسوزى قالسا, ءوزى قالدى دە», دەگەن عيبراتتى ءسوز بار. وسى ءتامسىلدى ويعا الساق, كەنجەبولات تا ءدال بۇگىن ورتامىزدا وتىرعانداي اسەر بەرەدى», دەدى ول.
ال اكادەميك, «قازاق گازەتتەرى» سەرىكتەستىگىنىڭ ديرەكتورى ديحان قامزابەك ۇلى:
– بۇگىنگى ءىس-شارا ءوتىپ وتىرعان اقسەلەۋ سەيدىمبەك زالىمەن قاتارلاس مۇحامەدجان قاراتاەۆتىڭ, رابيعا سىزدىقوۆانىڭ, تۇرسىنبەك كاكىشەۆتىڭ, سەرىك قيراباەۆتىڭ جانە تاعى باسقا دا تۇلعالاردىڭ ەڭبەكتەرى – ەۋرازيا ۋنيۆەرسيتەتى كىتاپحاناسىنىڭ ۇستىندارى سەكىلدى. سول قاتاردا مارقۇم كەنجەبولات جولدىبايدىڭ دا بۇعان دەيىنگى جيناقتارى مەن بۇگىنگى تۇساۋى كەسىلگەن كىتابى دا وقىرمانعا جەتكەلى وتىر. ول كىسى «جاقسى ادام» دەگەن مازمۇندى ەڭبەكپەن جاسادى. تەحنار ادامنىڭ گۋمانيتارلىق سالانىڭ جۇگىن ارقالاۋى وڭاي ەمەس. ونىڭ بويىنداعى زيالىلىق – قاسيەتتى ۇلىتاۋ مەن اتا-باباسىنىڭ قانىنان دارىعان دەپ ويلايمىن. الاش ارداقتىلارى ءبىرى – ينجەنەر, ءبىرى – دارىگەر بولسا دا ۇلت قامى ءۇشىن جان ايانباي قىزمەت ىستەپ, ەل رۋحانياتىنا ولشەۋسىز ەڭبەك ءسىڭىردى. بۇل كىسى دە سول الاش زيالىلارىنا ۇقساپ, ءوز مازمۇنىنا ساي ەڭبەك ەتتى, – دەدى.
تاعىلىمدى شارا بارىسىندا قالامگەردىڭ جاڭا كىتابىنىڭ تۇساۋى كەسىلدى. ۇلىتاۋ وبلىسىنىڭ اكىمى بەرىك ابدىعالي ۇلىنىڭ ارنايى جىبەرگەن قۇتتىقتاۋىن باس رەداكتورلار كلۋبىنىڭ مۇشەسى قانات اۋەسباي وقىپ بەردى. پارلامەنت سەناتىنىڭ دەپۋتاتى نۇرتورە ءجۇسىپ بەينەبايلانىس ارقىلى شىعىپ, ەستەلىك ايتتى. سونداي-اق بەلگىلى عالىمدار سەرىك نەگيموۆ, قايرات ساق, قايراتكەر سەرىك تىلەۋباەۆ, قالامگەرلەر جولتاي ءالماش ۇلى, اكىم ىسقاق, ءدىن قايراتكەرى ياحيا يسمايلوۆ اياۋلى ازاماتتىڭ ادامي بولمىسىن ەسكە الىپ, ەڭبەكتەرى تۋرالى پاراساتتى وي ءوربىتتى.
