سۋرەتتەردى تۇسىرگەن ەرلان ومار
اتالعان شارانى ۋنيۆەرسيتەت پرورەكتورى جاننا قۇرمانعاليەۆا قۇتتىقتاۋ سوزىمەن اشىپ, ۇلكەن ءىس-شارالار وتكىزىلىپ تۇراتىن ەۇۋ ەلورداداعى رۋحاني ورتالىق ەكەنىن ايتا كەلە, بۇگىن ۋنيۆەرسيتەتتە ەرەكشە شارا ءوتىپ جاتقانىن تىلگە تيەك ەتتى.
«كەنجەبولات ءجولدىباي ومىربويى ىشكى ساياسات سالاسىندا, اقپارات سالاسىندا قىزمەت ەتتى. كىتاپتى شىعارعان اعامىزدىڭ وتباسىنا ۋنيۆەرسيتەت اتىنان ۇلكەن ريزاشىلىعىمىزدى بىلدىرەمىز. اعامىز ادال ازامات ەدى, سول كىسى سەكىلدى ادال ازاماتتار ەلىمىزدە كوپ بولسىن», دەدى جاننا دۋلاتقىزى.
كىتاپتىڭ تانىستىرىلىمىن ۇيىمداستىرۋعا قولداۋ بىلدىرگەن باس رەداكتورلار كلۋبىنىڭ پرەزيدەنتى, پارلامەنت سەناتىنىڭ دەپۋتاتى, ۇلتتىق قۇرىلتاي توراعاسىنىڭ ورىنباسارى, جۋرناليست بيبىگۇل جەكسەنباي: «كەنجەبولات ماحمۇت ۇلىمەن 2014 جىلدان باستاپ ەتەنە جۇمىس ىستەدىك. ەلىمىزدە ازاماتتىق ينستيتۋتتىڭ قالىپتاسۋىنا ك.ماحمۇت ۇلىنىڭ زور ىقپالى بولدى. كەز-كەلگەن قوعامنىڭ دامۋىنا ازاماتتىق قوعامنىڭ دامۋى ۇلكەن اسەر ەتەدى. وسى باعىتتاعى ەڭ العاشقى قادامدار باس رەداكتورلار كلۋبىنان ەرەكشە كورىنە باستادى. ول كىسى رەداكتورلار كلۋبىن باسقارعان كەزەڭدە كوپتەگەن يگى باستامالاردى كوتەردى. باق تۋرالى زاڭدارداعى وزگەرىستەردىڭ ومىرگە كەلۋىنە سەپتىگى ءتيىپ, وتكىر پىكىرلەر مەن ويلاردى ايتا ءبىلدى. قوعامداعى وزەكتى ماسەلەلەردى كلۋبتىڭ اتىنان دا, ءوزىنىڭ جەكە اتىنان دا ەركىن ايتتى. ورىس ءتىلدى اۋديتورياعا دا ءوز ويلارىن جەتكىزە الدى. حالىقارالىق شارالاردى ۇيىمداستىرۋعا بەلسەنە ارالاستى, ءارتۇرلى ەلشىلىكتەرمەن جۇمىس ىستەۋگە, كونفەرەنتسيالاردىڭ ۇيىمداستىرىلۋىنا اتسالىستى. كىتاپتا ۇلكەن ويلار بار, جۋرناليستيكادا وقيتىن ستۋدەنتتەرگە زور مۇمكىندىكتەر اشىلادى دەپ ويلايمىن», دەدى.
ەۇۋ-ءنىڭ جۋرناليستيكا جانە ساياساتتانۋ فاكۋلتەتىنىڭ دەكانى, پروفەسسور, بەلگىلى الاشتانۋشى عالىم قايرات ءومىرباي ۇلى باس رەداكتورلار كلۋبى مەن ەۇۋ-ءنىڭ جۋرناليستيكا جانە ساياساتتانۋ فاكۋلتەتتەرى اراسىندا تىعىز بايلانىستى العاش ورناتقان ك.ماحمۇت ۇلى ەكەنىن اتاپ ءوتتى. «عىلىمي كىتاپحانادان اقسەلەۋ سەيدىمبەك زالىن قالاپ الدىق, ەكەۋى رۋحتاس, ءبىرىن-ءبىرى تولىقتىراتىن تۇلعالار. مارقۇم ارتىنا «ولمەيتۇعىن ءسوز قالدىردى», دەدى الاشتانۋشى عالىم.
جيىندا پارلامەنت سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى, بەلگىلى جۋرناليست, مەملەكەت جانە قوعام قايراتكەرى نۇرتورە ءجۇسىپتىڭ ۆيدەو – لەبىزى تىڭدالدى.
«اركىمنىڭ جولى – ءارتۇرلى ساپار» كىتابىنىڭ تانىستىرىلىمىنا كەنجەبولات جولدىبايدىڭ تۋعان جەرى ۇلىتاۋ وبلىسىنىڭ اكىمى ارنايى حات جولداپ, لەبىزىن ءبىلدىردى. سونىمەن قاتار ۇلىتاۋدان جۋرناليست, « ۇلىتاۋ» تەلەراديوكومپانياسىنىڭ كرەاتيۆتى ديرەكتورى, وبلىستىق ءماسليحاتتىڭ دەپۋتاتى بازاركۇل سەيىتجانقىزى ارنايى كەلىپ قاتىستى.
باسقوسۋدا ەكس-سەناتور مۇحامبەت كوپەي, فيلولوگيا عىلىمدارىنىڭ دوكتورى, پروفەسسور سەرىك نەگيموۆ, قر ۇعا اكادەميگى, فيلولوگيا عىلىمدارىنىڭ دوكتورى, پروفەسسور, «قازاق گازەتتەرى» جشس باس ديرەكتورى ديحان قامزابەك ۇلى, جازۋشى-دراماتۋرگ, قوعام قايراتكەرى جولتاي ءالماش ۇلى, پارلامەنتتىڭ ەكس-دەپۋتاتى اكىم ىسقاق, قوعام قايراتكەرى, ۇلىتاۋ اۋدانىنىڭ قۇرمەتتى ازاماتى سەرىك تىلەۋباەۆ, ءدىنتانۋشى ياحيا قاجى يسمايلوۆ, «كازكونتەنت» اق باسقارۋشى ديرەكتورى ماحات سادىق, قازاقستاننىڭ ەڭبەك سىڭىرگەن قايراتكەرى, باس رەداكتورلار كلۋبىنىڭ مۇشەسى, عالىم شاحماران سەيىلوۆ ءسوز سويلەپ, كەنجەبولات جولدىبايدىڭ اتالعان كىتابى تۋرالى ويلارىن ورتاعا سالدى.
ك.جولدىبايدىڭ كىتابىنىڭ شىعۋىنا جانە ونىڭ تانىستىرىلىمىنىڭ وتۋىنە سەبەپشى بولعان كەنجەبولات ماحمۇت ۇلىنىڭ جۇبايى توكەن قورعانبەكوۆا باسقوسۋعا قاتىسۋشىلارعا العىسىن ءبىلدىرىپ, اتالعان كىتاپتى مۋزەي, كىتاپحانالارعا تاپسىرعانىن ايتتى.
