ىستانبۇلدا وتكەن IASA-ICTMD بىرلەسكەن فورۋمىندا ىنتىماقتاستىقتى دامىتۋ ماسەلەسىنە كەڭىرەك ءۇڭىلىپ, جاھاندىق وزگەرىستەر جاعدايىندا اۋديوۆيزۋالدى مادەني مۇرانى ساقتاۋ جانە قورعاۋ سالاسىندا سەرىكتەستىك بايلانىستى نىعايتا وتىرا ونىڭ ء(داستۇرلى مۋزىكا) الەۋەتى مەن تاريحي ماتەريالداردى قۇجاتتاۋ جانە مۇراعاتتاۋ سالاسىندا ءتيىمدى باسقارۋ تەتىكتەرى تالقىلاندى. «تۇركيا مەن تۇركى الەمىندەگى مۇراعاتتىق زەرتتەۋلەر مەن اۋديوۆيزۋالدى مۇراعاتتاردىڭ وتكەنى مەن بولاشاعى» تاقىرىبىن فورۋمنىڭ باستى باعىتى رەتىندە قاراستىردى.
فورۋمدا ىستانبۇل ۋنيۆەرسيتەتىنىڭ رەكتورى, پروفەسسور وسمان بيۋلەنت زۋلفيكار, ICTM پرەزيدەنتى سۆانيبور پەتتان, IASA پرەزيدەنتى ترە بەرني, تۇركسويدىڭ بۇرىنعى باس حاتشىسى دۇيسەن قاسەيىنوۆ ءسوز سويلەدى. حالىقارالىق IASA-ICTM فورۋمىنا الەمنىڭ 50 ەلىنەن 400-دەن استام زەرتتەۋشى عالىمدار, عىلىمي ورتالىقتار مەن دىبىستىق مۇراعات باسشىلارى, تانىمال ءداستۇرلى ورىنداۋشىلار مەن بي ۇجىمدارى قاتىستى. فورۋم باعدارلاماسى اياسىندا دوڭگەلەك ۇستەلدەر مەن پىكىرتالاستار, ۆوركشوپتار مەن شەبەرلىك ساعاتتارىن قوسا قامتىدى.
حالىقارالىق دىبىستىق جانە اۋديوۆيزۋالدى مۇراعاتتار قاۋىمداستىعى (IASA) — الەمدىك دىبىستىق جانە اۋديوۆيزۋالدى مۇرانى ۇزاق مەرزىمدى قورعاۋ, قول جەتكىزۋ جانە ساقتاۋ ستاندارتتارىن بەلگىلەيتىن كاسىبي قاۋىمداستىق.
حالىقارالىق ءداستۇرلى مۋزىكا جانە بي كەڭەسى (ICTMD) — يۋنەسكو-مەن رەسمي كونسۋلتاتيۆتىك قارىم-قاتىناستا بولاتىن ۇكىمەتتىك ەمەس عىلىمي ۇيىم, ونىڭ ماقساتى بارلىق ەلدەردىڭ ءداستۇرلى مۋزىكاسى مەن بيلەرىن ودان ءارى زەرتتەۋ, تاجىريبە الماسۋ, قۇجاتتاۋ, ساقتاۋ جانە ناسيحاتتاۋ بولىپ تابىلادى.
IASA-ICTMD فورۋمىنىڭ اياسىندا تۇركى الەمىنىڭ كورنەكتى مۋزىكانتتارى مەن بيشىلەرىنىڭ كونتسەرتى وتكىزىلىپ, كورمەلەر ۇيىمداستىرىلدى. كونتسەرتكە تۇركى ەلدەرىنىڭ بەلگىلى ارتىستەرى - روزا امانوۆا (قىرعىزستان), راۋشان ورازباەۆا, ەرلان رىسقالي, قايرات ايتباەۆ, ەرنار ءومىرالى (قازاقستان), مۋگام ءانسامبلى – سابينا ارابلي, راشاد يبراگيموۆ, سياۆۋش كاريموۆ, تابريز يۋسۋبوۆ (ازەربايجان), سونداي-اق تۇركيانىڭ مادەنيەت جانە تۋريزم مينيسترلىگىنىڭ مەملەكەتتىك حالىق بي ءانسامبلى مەن «Irfan ve Meydan meşkleri» توبى (تۇركيا) ونەر كورسەتتى.
2008-2022 جىلدار ارالىعىندا حالىقارالىق تۇركسوي ۇيىمىنىڭ باس حاتشىسى قىزمەتىن اتقارعان پروفەسسور دۇيسەن قاسەيىنوۆ ءوز سوزىندە: «تۇركى الەمىنە كىرەتىن باۋىرلاس حالىقتار ءۇشىن كوكەيكەستى ماسەلەلەردىڭ ىشىندەگى ەڭ ماڭىزدىسى ورتاق ءداستۇرلى مادەني مۇرانى قورعاۋ جانە ساقتاۋ بولىپ تابىلادى. تامىرى ءبىر ورتاق ءداستۇرلى مادەنيەتىمىزدىڭ قادىرىن ۇعىنىپ, زەرتتەپ, زەردەلەپ, وسكەلەڭ ۇرپاققا ساف كۇيىندە اماناتتاپ, اسىل مۇرامىزدى بولاشاق يگىلىگىنە جاراتۋ وتە ماڭىزدى. بۇل ماسەلەلەر وڭ شەشىمىن تاپسا تۇركى بالاسىنىڭ ونەرى مەن مادەنيەتىنىڭ بولاشاعىنىڭ جارقىن بولارى اقيقات», دەپ تۇيىندەدى.
