– Digital مەديا بۇگىندە نەگىزگى اقپارات كوزى جانە قوعامدىق-ساياسي باعىتتى قالىپتاستىراتىن پلاتفورماعا اينالدى دەسەك تە بولادى. ستاتيستيكالىق دەرەكتەر نە دەيدى؟
ءدىلمۇرات راحىموۆ,
«International Media Service» باسقارۋشى ديرەكتورى:
– ءار ەلدىڭ جارناما نارىعى ءارتۇرلى. سەبەبى حالىق سانى, ەكونوميكاسى, تاعى باسقا كورسەتكىشتەرى بىردەي ەمەس. بولاشاقتا يندۋستريا ادامى رەتىندە ءبىز جارنامادا ەسەپتەۋ جۇيەسى بولۋ كەرەك ەكەنىن بىلەمىز. ورتالىق ازيا جارناما قاۋىمداستىعىنىڭ قازاقستان مەن كورشىلەس ەلدەردىڭ جارناما نارىعىن زەرتتەۋ جوباسى بار. وعان تاجىكستان, وزبەكستان, قىرعىزستاننان ساراپشى مامانداردى تارتتىق. قازاقستاندا دا وسى ەلدەرگە قاتىستى وزىندىك ساراپتاما توبى بار. ءبىراز زەرتتەۋ جاسالدى. قازىر ەل نارىعىنداعى كونتەنتتىڭ 48 پايىزىن كوڭىل كوتەرەتىن سەريالدار قۇرايدى. 2015-2022 جىلدار اراسىن باعدارلاساق, تەلەۆيدەنيەگە دەگەن سۇرانىس 34%-عا ازايعان. دەمەك ءبىز ەلىمىزدەگى ءار ءۇشىنشى تەلەكورەرمەندى جوعالتتىق. بۇل, ارينە وتە كوپ. بىراق وسى كەزەڭدە تەلەۆيدەنيە اقپاراتتى ۇسىنۋ قۇرىلىمىن وزگەرتتى. وسىدان 10 جىل بۇرىن دا شەتەلدىك كونتەنت تانىمالدىلىق رەيتينگىندە ءبىرىنشى ورىندا تۇرعان. بىراق بۇگىندە ەلىمىزدەگى دەموگرافيالىق جاعدايدىڭ وزگەرۋىنە بايلانىستى قازاقى ساپالى كونتەنتكە سۇرانىس ارتتى. سايكەسىنشە ءبىزدىڭ تەلەۆيدەنيە قازاق تىلىندەگى باعدارلامالاردى كوبىرەك جاساپ, ءوز اۋديتورياسىنىڭ مۇددەسىنە ساي كوشۋدە. ياعني مەديا سالاسىندا ورنى بار اۋقىمدى حولدينگتەر تسيفرلانۋ ارقىلى 48%-دىڭ بەلگىلى ءبىر بولىگىن يەمدەنىپ وتىر.
ابىلايحان كامالادين,
«QM Metacommunication company», «Qamalladin foundation» نەگىزىن قالاۋشى:
– ەلىمىزدە مەديا سالاسى قارقىندى دامىپ كەلەدى. Əلەۋمەتتىك جەلىلەردە بلوگ جۇرگىزىپ, حالىقتى اقپاراتپەن قۇلاقتاندىراتىن بلوگەرلەردىڭ دە سانى ارتتى. وسى ورايدا ەلىمىزدەگى جارناما نارىعىنا توقتالا كەتكەنىمىز ءجون. سەبەبى ءدəستۇرلى مەدياعا مەملەكەت قارجى بولەدى, ال جەكە تۇلعالار قاراجاتتى YouTube, TikTok, Instagram əلەۋمەتتىك جەلىلەرىندەگى پاراقشالارىنداعى جارنامادان تابادى. وسىنىڭ ارقاسىندا ول ءوزىن ءوزى قارجىلاندىرادى. حالىققا ءتۇرلى اقپارات, پايدالى كەڭەس, ساياحاتتاۋ سىندى بەينەبايانداردى ۇسىنا الادى. سوندىقتان دا جاڭا زاڭدا جارنامانى تاڭبالاپ وتىرۋعا ەرەكشە مəن بەرۋ قاجەت. جەكە بلوگىن جۇرگىزەتىن ادامداردىڭ تابىسىنا زيان تيمەۋى قاجەت. Əلەۋمەتتىك جەلىلەردە اقپارات تاراتاتىن, بلوگ جۇرگىزەتىندەردىڭ قاتارى كوبەيگەن سايىن ءدəستۇرلى مەدياعا بəسەكەلەستىك تۋعىزىپ, مەديا سالاسىن قارقىندى تۇردە دامىتىپ وتىر. قازىرگى ۋاقىتتا ادامداردىڭ كوپشىلىگى تەلەديدار كورۋدەن قالىپ بارادى. ءبىر ورىندا تاپجىلماي تەلەديدار كورۋ ىڭعايسىز بولعاندىقتان, كوپشىلىگى YouTube ارقىلى قاجەتتى دۇنيەلەرىن قاراي سالعاندى قالايدى. نəتيجەسىندە, əلەۋمەتتىك جەلىدە جۇمىس ىستەيتىندەردىڭ قارالىمى ارتىپ, كورەرمەنى كوبەيىپ كەلەدى. سوندىقتان وسى سالاعا اسا مəن بەرۋ قاجەت.
تيمۋر ابدۋللين,
«Repost.uz» سايتىنىڭ نەگىزىن قالاۋشىلاردىڭ ءبىرى جانە جەتەكشىسى:
– ءبىز العاش جۇمىسىمىزدى الەۋمەتتىك جەلىلەردە قارقىندى دامىتتىق. وقىرماننىڭ قىزىعۋشىلىعىن وزىمىزگە اۋدارۋعا مۇمكىندىك بەردىك. وسىلايشا, «Repost.uz» سايتىن دامىتۋدى قولعا الدىق. كەيىنگى بىرنەشە جىلدا ماتەريالداردى بەرۋ فورماتتارىندا بەلسەندى تاجىريبە جاسادىق, وقىرمانىمىزدى ءبىر ارناعا شوعىرلاندىردىق. اقپاراتتى ساياسي باعىتتا بەرىپ قانا قويماي, ءتۇرلى باعىتتى قامتۋدى قولعا الدىق. ماسەلەن, شوۋ-بيزنەس, دەنساۋلىق, اۆتوموبيل الەمى, تەحنولوگيا, سپورت تۋرالى اقپاراتتاردىڭ ەڭ ماڭىزدىسىن تاڭداپ, ءار بولىككە بولدىك. وقىرمان كارانتين كەزىندە ترافيك بويىنشا شامامەن 50%-عا ءوستى. وسى ءوسىمدى ءالى كۇنگە دەيىن ساقتاپ, وقىرمان سانىن ارتتىرۋدى قولعا الدىق. وسى رەتتە ايتا كەتەرلىگى, الەۋمەتتىك جەلى وقىرماننىڭ سانىن ارتتىرۋعا تاپتىرماس الاڭ ەكەندىگىن ەستە ساقتاۋ قاجەت.
– اقپاراتتىق قاۋىپسىزدىكتى كۇشەيتۋ تۇرعىسىنان كوپ جۇمىس ىستەلدى. زاڭ وزگەردى, تالاپ كۇشەيدى, ال مەديادا بۇل وزگەرىستەر سەزىلە مە؟
ەلديار كەنەنساروۆ,
«Eki bala» جانە «Asia Mix» تيك-توك جوبالارىنىڭ اۆتورى:
– ەلىمىزدەگى مەديا جىل ساناپ دامىپ, جاڭا سيپات الىپ كەلەدى. ينفودەميا جاعدايىنداعى اقپاراتتى تۇتىنۋشى حالىقتىڭ مەدياعا دەگەن سەنىمنىڭ جوعالۋى مەديا قىزمەتكەرلەرىنىڭ ءبارىن الاڭداتادى.
ابىلايحان كامالادين,
«QM Metacommunication company», «Qamalladin foundation» نەگىزىن قالاۋشى:
– ەلىمىزدە قازىر 900 بلوگەر بار جانە ولاردىڭ بارلىعى اقپاراتتى جارناما رەتىندە بەلگىلەۋى كەرەك. ءبىز قازىر نەو-بانكينگكە بەت الدىق. مىسال كەلتىرسەك, كەي بلوگەرلەر «G-park» كومپانياسى سالعان تۇرعىن ۇيلەردى جارنامالاعان. ال ول ۇيلەر بويىنشا قازىر سالىمشىلار بلوگەرلەرگە ارىز نەمەسە ءتۇرلى پىكىر جازىپ جاتىر. ول ادام دەپۋتات بولدى, ءبىز نە ىستەۋىمىز كەرەك؟ ءبىز كرەاتيۆتى سالاداعى ادامدارمىز, باق نەمەسە جۋرناليست ەمەسپىز. ەگەر اقشا الاتىن بارلىق جازباعا ارنايى بەلگى قوياتىن بولساق, وندا ماركەتينگ, پيار, كرەاتيۆ ۇعىمى جوعالادى.
ايدوس سارىم,
ءماجىلىس دەپۋتاتى:
– جاڭا مەديانى زاڭ بويىنشا رەتتەۋدە زاڭنامامىز ۋاقىتتان قالىپ كەلەدى. ءبىز بۇگىندە باعىت-باعدارىمىزدى بۇرا وتىرعان اقش, ەۋروپانىڭ دامىعان ەلدەرىنە قارايتىن بولساق, ارتتا قالعانىمىزدى كورۋ قيىن ەمەس. بۇل ەڭ بىرىنشىدەن, نورماتيۆتىك-قۇقىقتىق بازاعا قاتىستى. ەكىنشى جاعىنان اركىم ءوزىن ءوزى رەتتەۋگە كوشۋى كەرەك. جارناماعا اقشا تولەنەتىنى بەلگىلى. نەگە قانداي دا ءبىر ەرەكشەلىك نەمەسە ارتىقشىلىق بەرۋ كەرەك؟ قىلمىستىڭ 40 پايىزى كيبەرسالادا, ونلاين سايتتارمەن بايلانىستى پلاتفورمالاردا جاسالادى. شارتتى تۇردە ادام ەتكە تاپسىرىس بەردى دەپ قاراستىرايىق, بىراق ول شىن مانىندە باسقا زات الادى. ينتەرنەتكە كەلەتىن بولساق, بۇعان شارتتى تۇردە دۇكەن ديرەكتورى جاۋاپتى, ول ونىمدەردىڭ قولدانۋ مەرزىمى ءوتىپ كەتپەۋىن قاداعالاۋى كەرەك. مەديا ساۋاتتىلىقتىڭ جاۋاپكەرشىلىگى تۋرالى ماسەلە دە تۋىندايدى. بۇعان ەشقانداي كەدەرگى جوق, جاڭا زاڭنىڭ جالعىز تالابى – كەز كەلگەن باسقا بيزنەس ءتۇرى سياقتى ونى زاڭدى تۇردە جاساۋ. جەكە كاسىپ اشۋ, ودان سالىق تولەۋ.
2025 جىلدان باستاپ بۇكىل وتانداسىمىز جالپىعا ورتاق دەكلاراتسيا تاپسىرادى, ياعني ءبىز تابىسىمىزدى دا, شىعىنىمىزدى دا دەكلاراتسيا ارقىلى كورسەتەمىز. ەگەر سىزدە قىمبات ءۇي, كولىك, باسقا دا دۇنيە-بايلىق پايدا بولسا, ونى قانداي اقشاعا الدىڭىز دەپ سۇرايدى. ەگەر جاراتقان اقشاڭىز تابىسىڭىزدان اسىپ كەتسە, وندا بۇل قارجىنىڭ قايدان كەلگەنىن دالەلدەۋىڭىز كەرەك. وسىنداي زاڭ تالاپتارى جاڭا مەدياداعى جارناما ماسەلەسىندە دە بىزگە ءوز-ءوزىمىزدى رەتتەۋگە الىپ كەلەدى. ەڭ باستىسى اشىقتىق كەرەك. ءبىر مىسال كەلتىرەيىن, جۋىردا مەگان ماركل ينستاگرامدا ءوز اككاۋنتىن اشىپ, ءار پوست ءۇشىن 1 ملن دوللار الاتىنىن اشىق جاريالادى.
مەملەكەت تاراپىنان ەشكىمگە تىيىم سالۋ, جولىنا كەدەرگى بولۋ دەگەن ماقسات جوق. ءوز الەۋمەتتىك جەلى پاراقشاسىندا جۇمىسىن جۇرگىزىپ, جارناما قابىلدايتىن ادام ازىق-ت ۇلىك دۇكەنى, شاشتاراز سەكىلدى جەكە كاسىپكەر رەتىندە ەڭبەك ەتەدى.
پەريزات مىرزاحمەت,
تەلەپروديۋسەر, جۋرناليست:
– ءبىز قازىر سالىستىرمالى تۇردە ادامنىڭ دەنساۋلىعىنا قاۋىپسىز, نۇقسان كەلمەيتىن قوعامدا ءومىر ءسۇرىپ جاتىرمىز. ياعني ماسلوۋ پيراميداسىنىڭ ەڭ جوعارى ساتىسىندامىز. دەمەك ءوزىمىزدىڭ بارلىق قاجەتتىلىگىمىزدى وتەدىك. تاسادا قالعان جالعىز دۇنيە – ەتيكا. ءبىز جەكە شەكارامىزدى, مەملەكەتتىڭ شەكاراسىن قورعادىق. بىراق ادامنىڭ پسيحولوگياسى, ادامنىڭ قۇقىعى ءالى دە قورعالعان جوق. قوعامدا ەتيكالىق شابۋىلدارعا تۇسەتىن الەۋمەتتىك ءالسىز توپتار بار. ولاردى قورعاۋ ءۇشىن ءبارىبىر ەتيكالىق كودەكس كەرەك. الەمدە: «سەنىڭ ەركىندىگىڭ باسقا ادامنىڭ ەركىندىگى باستالعان جەردە بىتەدى» دەگەن زاڭدىلىق بار. بۇل ۇلكەن ءبىر زاڭدى قۇجاتتىڭ اياسىندا قامتاماسىز ەتىلۋى قاجەت. بىراق مۇنىڭ دا وزىندىك كەرى تۇسى جوق ەمەس. ەگەر ءبىز مەملەكەتتىڭ اۋزىنا «بيلىك, سەن بىزگە ەتيكالىق نورمانى قابىلداپ بەرمەسەڭ, بولمايدى. ءبىز ونى ءوزىمىز ىستەي المايمىز» دەسەك, ولار قازىر تەك ازاماتتىق ۇستانىمىن بىلدىرەتىن ادامداردىڭ اۋزىن جاباتىن قۇجاتقا اينالۋى مۇمكىن. زاڭ نەگىزى قوعامنان شىعىپ, قوعامعا قىزمەت ەتە ءبىلۋى كەرەك. ياعني قوعام ءوزى ۇسىنۋى كەرەك.
بۇگىنگى احۋالدى زەردەلەسەك, قوعامنىڭ ءوزى ەتيكالىق نورمانى سۇراپ وتىر. وسى تۇرعىدا عانا بەكىتىلگەن قانداي دا ءبىر قۇجات قاجەت. ويتكەنى بىزدەگى الەۋمەتتىك جەلىدەگى داۋدىڭ ءوز سحەماسى بار. كەز كەلگەن ماسەلە «ۇكىمەت قايدا قاراپ وتىر؟» دەگەن «سلوگانمەن» اياقتالادى. الايدا ۇكىمەتتە بەلگىلى ءبىر جاعدايدا جاۋاپكەرشىلىككە تارتاتىن ەشقانداي قۇجات جوق. سوندىقتان بۇل قوعامدىق جارا بولىپ تۇر. بۇعان قوسا «تاپسىرىس سۇرانىستان تۋادى» دەگەن نارىق قاعيداسى بار. الەۋمەتتىك جەلىدەگى سەكسولوگتەر تاقىرىبى – وسىنىڭ دالەلى. حالىق سۇرانىسىنان تۋىنداپ وتىر. وسىلاردىڭ بارلىعىن باعامداي وتىرىپ, ءبىر نورما قالىپتاستىرۋ – قوعام رەتىندەگى مىندەتىمىز.
– قازاق مەدياسى قازىر وقىرمان-تىڭدارمان-كورەرمەن سۇرانىسىنا قاراي جۇمىس ىستەپ وتىر ما؟ قازىرگى مەديا نارىق قانداي دەڭگەيدە؟
ءدىلمۇرات راحىموۆ,
«International Media Service» باسقارۋشى ديرەكتورى:
– وتانداستارىمىز الەۋمەتتىك جەلىگە, ينتەرنەتتەگى نەشە ءتۇرلى اقپاراتقا قاراعاندا تەلەۆيزيا ونىمدەرىنە كوبىرەك سەنەدى. دەمەك ەلىمىزدە جارناما نارىعىندا تەلەارنالار كوش باستاپ تۇر. سوندىقتان جارناما بەرۋشىلەردىڭ كوبى ءالى كۇنگە دەيىن ارنالاردى تاڭدايدى.
اباي سەيفۋللا ۇلى,
«Abay Live»YouTube ارناسىنىڭ اۆتورى, جۋرناليست:
– ستاتيستيكالىق دەرەكتەردەن جىل سايىن تەلەارنا كورەرمەنىنىڭ پايىزدىق ۇلەسى تومەندەپ كەلە جاتقانىن كورەمىز. سول سەبەپتى ەلىمىزدە YouTube پلاتفورماسىنا كوبىرەك كوڭىل ءبولىنىپ جاتىر. سوندىقتان دا پودكاست, سۇحبات, ساراپتامالىق باعدارلامالار, سەريال تۇسىرەتىن YouTube جەكە ارنالارى كوبەيدى. مەن ءوزىم ساياسي-قوعامدىق كونتەنت تۇسىرەمىن. بۇل سالانىڭ بولاشاعى بار. سەبەبى جارنامالىق ينتەگراتسيالار قازاقتىلدى كونتەنتتەگىلەرگە دە كەلىپ جاتىر. الەۋمەتتىك جەلىلەردەگى پلاتفورمالار دا ەركىن, تاۋەلسىز كونتەنتتەردى اۋقىمدى تۇردە جاساۋعا بولادى. بىراق YouTube-قا كادىمگى تەلەارناداعى سەكىلدى ارنايى كوماندامەن كەلۋ ماقساتىڭىزدىڭ تەزىرەك ورىندالۋىنا كومەكتەسەدى. مىسالى, ءبىز كونتەنت ءتۇسىرۋ ءۇشىن كەمىندە ءۇش كامەرا قويامىز. وعان ەڭ سوڭعى مودەلدەگى كامەرالاردى قولدانامىز جانە YouTube-قا 4ك فورماتىندا تۇسىرەمىز. داۋىسقا دا ءمان بەرىلەدى. ويتكەنى قازىرگى جاستار YouTube-تاعى دۇنيەلەردى قۇلاققاپپەن كوشەدە كەتىپ بارا جاتىپ نەمەسە ءبىر شارۋاسىن رەتتەپ ءجۇرىپ تىڭدايدى. وسى ساتتە ونىڭ دىبىسى ناشار بولسا, كونتەنت قانشا قىزىقتى بولسا دا تىڭدالماۋى مۇمكىن.
ەلديار كەنەنساروۆ,
«Eki bala» جانە «Asia Mix» تيك-توك جوبالارىنىڭ اۆتورى:
– كەز كەلگەن الەۋمەتتىك مەديا ماركەتينگتىك ناۋقاننىڭ نەگىزى – ساپالى كونتەنت. ءسىز الەۋمەتتىك جەلىلەردە جاريالاعان جازبالار كومپانياڭىزدىڭ ماقساتتارىن تىكەلەي كورسەتەدى. وسىلايشا, جوعارى ساپالى مازمۇن سىزگە سەنىمدى, شىنايى جانە ماقساتتى اۋديتوريا ءۇشىن تارتىمدى بەدەلىن قۇرۋعا كومەكتەسەدى.
مارات ورالعازين,
ستسەناريست, تەلەجۇرگىزۋشى, «B.A.S. PRODUCTION» پروديۋسەرى:
– قازىر قازاق تىلىندەگى كونتەنتتىڭ كورەرمەنى كوپ. ماسەلەن, ءبىزدىڭ YouTube ارنادا 1,9 ملن جازىلۋشى بار. تەك ءبىر ماسەلە, قازاقشا كونتەنتكە جارناما بەرۋشىلەر كوپ كەلە بەرمەيدى. ماسەلەن, ءورىستىلدى بلوگەرلەر «Samsung», اۆتوكولىكتەردى جارنامالاپ جۇرسە, قازاق تىلىندەگى بلوگەرلەر پيتستسا, دونەرلەرمەن شەكتەلەدى. ياعني جارناما بەرۋشىلەردىڭ باسىم بولىگىندە قازاقتىلدى اۋديتوريانىڭ ساتىپ الۋ مۇمكىندىگى تومەن دەگەن جاڭساق پىكىر بار. بۇل دا تاپتاۋرىن بولعان تۇسىنىك. بىراق ومىردە كەز كەلگەن كولىك سالوندارىندا, ءىرى تەحنيكا دۇكەندەرىندە قاراكوز قازاقتار كوپ جۇرەدى.
جازيرا بايدالى,
«Sayahat Time» ارناسىنىڭ بلوگەرى:
– «Sayahat Time» جوباسى – ەرنار ەكەۋمىزدىڭ جوبامىز. بىزدە كوماندا جوق. جۇمىستىڭ 95 پايىزىن جولداسىم ەرنارعا جۇكتەلگەن. ستسەناريىن قۇراستىرادى, ءماتىنىن جازادى, مونتاجدايدى, تاعى سول سياقتى. تەك 4 تەحنيكا ارقىلى ۆيدەو ءتۇسىرىپ, ستەنداپ جاساپ كونتەنت جاساپ ءجۇرمىز. دىبىسى ساپالى شىعۋى ءۇشىن ۇيدە دىبىستايمىز. بارعان مەملەكەتتەرىمىزدە جەرگىلىكتى تۇرعىنداردان العان سۇحباتىمىزدى قولىمىزدان كەلگەنشە ءوزىمىز ازىرلەيمىز, بولماسا تانىس دوستارىمىزدان كومەك سۇراۋ ارقىلى جاسايمىز. سودان بولار بىزدەگى شىعىن تەك بيلەتكە, قوناقۇيگە جانە تاماقتانۋعا كەتەدى. ءبىر عانا سەرىكتەسىمىز بار. ول – «Air Astana» كومپانياسى. ءبىزدىڭ وزبەكستان, ءۇندىستان, گۇرجىستان, تايلاند ەلدەرىنە بارۋ-قايتۋ بيلەتتەرىمىزدى قامتاماسىز ەتتى. بەس جىل بۇرىن اشىلعان ارنا ەندى عانا تابىس تابا باستادى. قازىر جارناما بەرۋشىلەر بار. الداعى ۋاقىتتا ولار كوبەيەدى. ءبىزدىڭ كورسەتكىشتەرىمىز ءورىستىلدى بلوگەرلەرمەن سالىستىرعاندا كوبىنە بىردەي نەمەسە ءسال جەتىسپەيدى. YouTube ۇسىنعان مونەتيزاتسياعا سەنىپ وتىرمايمىز. تاڭعى 9-دان كەشكى 6-عا دەيىن ءوز جۇمىسىمىزدى ىستەپ, ءوز ەڭبەكاقىمىزعا شەتەلگە شىعىپ, بلوگ ءتۇسىرىپ ءجۇرمىز. ويتكەنى YouTube تۇراقتىلىقتى جاقسى كورەدى. سوندىقتان مۇنىمەن توقتاماي كونتەنتتى كۇتىپ وتىرعان ادامدارعا ۇسىنعىمىز كەلەدى.
ەرنار المابەك,
«Sayahat Time» ارناسىنىڭ بلوگەرى:
– ءبىزدىڭ YouTube ارنامىز قالىپتاسىپ قالعان بىرنەشە تاپتاۋرىندى بۇزدى. بىرىنشىدەن, قازاق اۋديتورياسى تەك شوۋ-بيزنەس پەن وسەك-اياڭ عانا تۇتىنادى دەگەن. ويتكەنى ءبىز ۇسىنعان كونتەنتتىڭ ورتاشا قارالىمى – 200 مىڭ ادام. حالىق تانىمدىق كونتەنتكە شولدەپ وتىر. ياعني تانىمدىق جوبالار ارقىلى كورەرمەن جيناۋعا بولادى. ەكىنشىدەن, قازاقشا جوبالاردىڭ اۋديتورياسى از دەگەن. قازاقشا جوبالاردى تەك قازاقستان ەمەس, وزبەكستان, قىرعىزستان حالقى دا كورەدى. وعان ءبىزدىڭ «Sayahat Time» YouTube ارناسىنىڭ ستاتيستيكاسى دالەل. قازاقستان – 72 , وزبەكستان – 13,8, رەسەي – 8,5, قىرعىزستان – 2,6, وڭتۇستىك كورەيا – 0,2 پايىز. دەمەك ءبىزدىڭ اۋديتوريا – كەمى 60 ميلليون ادام! قازىرگى قازاقشا جوبالاردىڭ كوبى ەنتۋزيازممەن جاسالىپ جاتىر. بىزدە ساپالى قازاقشا كونتەنت بار.
اباي سەيفۋللا ۇلى,
«Abay Live»YouTube ارناسىنىڭ اۆتورى, جۋرناليست:
– YouTube پلاتفورماسىندا قاي تاقىرىپتى, قاي باعىتتى تاڭداساڭ دا ءوز كورەرمەنىڭدى تابۋعا بولادى. وسى رەتتە, بالالار كونتەنتىنە اسا ۇلكەن ءمان بەرۋىمىز كەرەك. ويتكەنى مەملەكەتتىك تەلەارنالاردىڭ كونتەنتى بالالارعا ازدىق ەتەدى. بالاقايلاردىڭ ءتىلى قازاقشا شىعۋى ءۇشىن وسى اۋديتورياعا انيماتسيالىق بولسىن, تانىمدىق بولسىن, كونتەنتتەردى كوبىرەك جاساساق, ءبىز بۇدان ۇتىلمايمىز. قارجىلىق, يدەولوگيالىق تۇرعىدان دا پايدالى بولماق. سول سەبەپتى قازىر قولىنان مەديا كونتەنت جاساي الاتىن ازاماتتار وسى سەگمەنتكە وتە ۇلكەن ءمان بەرۋى قاجەت. تاعى ءبىر ايتا كەتەرلىگى قازىر عىلىمي جانە تاريحي كونتەنتكە دە سۇرانىس وتە كوپ.
دوڭگەلەك ۇستەلدى جۇرگىزگەن
زەيىن ەرعالي,
«Egemen Qazaqstan»
