قور باسشىسى بۇعان دەيىن دە وڭىرگە ات باسىن تىرەپ, جاڭا وبلىسقا قور تاراپىنان قانداي كومەك كورسەتۋ كەرەك ەكەنىن پىسىقتاپ كەتكەن ەدى. ەندى مىنە ەكىنشى مارتە كەلگەن ساپارى بارىسىندا ول «قازاقستان حالقىنا» قورىنىڭ وبلىس اۋماعىندا جۇزەگە اسىرعان جۇمىستارىنا توقتالىپ جانە جوسپارلانعان جوبالاردى تانىستىردى.
شىنىندا دا قوردىڭ ايماققا تيگىزىپ جاتقان كومەگى كوپ. مىسالى, وڭىرلىك مەديتسينالىق مەكەمەلەردى وفتالمولوگيالىق جابدىقتارمەن قامتاماسىز ەتۋ اياسىندا جەزقازعان قالاسىنىڭ كوپسالالى اۋرۋحاناسىنا جالپى سوماسى 4 ملن تەڭگەگە دياگنوستيكالىق لينزالار مەن وفتالموسكوپتار ساتىپ الىنعان ەدى. ەندى الداعى ۋاقىتتا بالالار نەيروحيرۋرگيالىق قىزمەتىن دامىتۋ ماقساتىندا وبلىستىق كوپبەيىندى اۋرۋحاناسىنا 32 ملن تەڭگە مولشەرىندە زاماناۋي مەديتسينالىق قۇرال-جابدىقتار جەتكىزىلمەك.
حالىقتىڭ بەلگىلى ءبىر بولىگىن الەۋمەتتىك قولداۋ تۇرعىسىندا دا قوردىڭ جاردەمىن سەزىنىپ جاتقان جاندار جەتكىلىكتى. ايتالىق, وسىعان دەيىن قور قاراجاتىنا قۇنى 17,2 ملن تەڭگە تۇراتىن 3 يننوۆاتسيالىق پروتەز بەرىلگەن ەدى. الداعى ۋاقىتتا قور وبلىستا جەزقازعان قالاسىنىڭ «قارلىعاش» سوماتيكالىق ءساناتوريىنىڭ جانە جاڭاارقا اۋدانىنىڭ ورتالىق اۋداندىق اۋرۋحاناسىنىڭ نەگىزىندە 2 وڭالتۋ ورتالىعىن اشىپ بەرۋدى جوسپارلاپ وتىر. مۇنداي كومەك وبلىستاعى دەنساۋلىق ساقتاۋ ماسەلەلەرىنە قاتىستى تۇيىندەردى ءبىرشاما تارقاتاتىنى ءسوزسىز.
قوردىڭ كومەگى ارقىلى ۇلىتاۋ وبلىسىندا 8 مەكتەپتە جالپى سوماسى 28,8 ملن تەڭگەگە روبوتوتەحنيكا كابينەتتەرى اشىلىپ, روبوتوتەحنيكانى زەردەلەۋگە ارنالعان باعدارلامالىق-اپپاراتتىق كەشەنمەن جابدىقتالدى. مەكتەپتەرگە كومەك كورسەتۋدىڭ ەكىنشى كەزەڭىندە «بولاشاق ينجەنەرلەر مونوقالالاردا» باعدارلاماسى بويىنشا 45 ملن تەڭگەگە 10 مەكتەپ جابدىقتالادى.
حالىقتىڭ الەۋمەتتىك وسال توپتارىنىڭ ستۋدەنتتەرىنە ايتارلىقتاي قولداۋ كورسەتىلدى. ءو.ا.بايقوڭىروۆ اتىنداعى جەزقازعان ۋنيۆەرسيتەتىنىڭ 19 ستۋدەنتى قوردىڭ ءبىلىم بەرۋ گرانتىنىڭ يەگەرى اتانعان.
– ءبىز قوردىڭ مۇمكىندىگىن ۇلىتاۋ وبلىسىنداعى وزەكتى ماسەلەلەرگە باعىتتاۋ ارقىلى ايماقتىڭ دامۋىنا ءوز ۇلەسىمىزدى قوسۋدى ماقسات ەتىپ وتىرمىز. دەمەك, وبلىس پەن «قازاقستان حالقىنا» قورى اراسىنداعى بايلانىس نىعايا تۇسەدى, – دەدى بولات بيداحمەت ۇلى.
ۇلىتاۋ وبلىسى
