كىتاپ مەرەكەسى بيىل دا دۇبىرلەپ, جالعاسىن تاپتى. مادەنيەت جانە اقپارات مينيسترلىگىنىڭ قولداۋىمەن ۇلتتىق اكادەميالىق كىتاپحانادا «KitapTime – 2023» ءىى جالپى رەسپۋبليكالىق كىتاپ فەستيۆالى ءوتتى. جوبا ۇيىمداستىرۋشىلارىنىڭ ايتۋىنشا, اتالعان ءىس-شارا – كىتاپ وقۋدى كەڭىنەن ناسيحاتتاۋ, ينتەللەكتۋالدى جاستاردى ىنتالاندىرۋ, مادەني قۇندىلىقتارىمىزدى حالىققا جەتكىزۋ ماقساتىندا وتكىزىلىپ وتىر. سونداي-اق كىتاپ مەرەكەسى رەسپۋبليكانىڭ كوپشىلىك كىتاپحانالارىنىڭ قولداۋىمەن ەلىمىزدىڭ ءار وڭىرىندە ءبىر ۋاقىتتا قاتار تويلاندى.
فەستيۆالدىڭ العاشقى بولىگىندە «رۋحانيات جولى» فلەشموبى مەن كەلۋشىلەر ءۇشىن كورمە-جارمەڭكە ۇيىمداستىرىلدى. جارمەڭكەگە «ەلدورادو», «Steppe&World», «اباي», «پايدالى كىتاپ», «Fox books»,
«Kitapal» كىتاپتار ءۇيى, «وتباسى حرەستوماتياسى», «مازمۇنداما», «Qasym», «Qyr balasy, «QAZBILIM» باسپالارى, «سەنىمەن بولاشاق», «Marfu Press» باسپا ۇيلەرى مەن رەسپۋبليكالىق اتا-انالار قوعامدىق بىرلەستىگىنىڭ كىتاپتارى قويىلدى. استاناداعى ءۇندىستان, تۇرىكمەنستان, وزبەكستان, ازەربايجان, بەلارۋس, مىسىر ەلشىلىكتەرى ۇلتتىق پاۆيلوندارىن قۇرىپ, ءوز كىتاپتارى مەن تانىمال شىعارمالارىن تانىستىردى.
سونىمەن قاتار «Art-vision» قولونەر شەبەرلەرى مەن سۋرەتشىلەردىڭ پاۆيلونى, bookcrossing, «Photo zone», بالالار شىعارماشىلىعىنا ارنالعان الاڭدا ەرتەگىلەر قويىلىمى, شەبەرلىك ساعاتتارى, ينتەراكتيۆتى, ۇلتتىق ويىندار, بالالار ادەبيەتىنىڭ كەيىپكەرلەرىنىڭ شەرۋى جينالعاندارعا جاعىمدى كوڭىل كۇي سىيلادى.
فەستيۆالدىڭ اشىلۋىنا مادەنيەت جانە اقپارات مينيسترلىگىنىڭ ارحيۆ, قۇجاتتاما جانە كىتاپ ءىسى كوميتەتىنىڭ توراعاسى قۋات بوراش, جازۋشى, مەملەكەتتىك سىيلىقتىڭ لاۋرەاتى الىبەك اسقار, پارلامەنت سەناتىنىڭ دەپۋتاتى نۇرتورە ءجۇسىپ, پارلامەنت ءماجىلىسىنىڭ دەپۋتاتى جۇلدىز سۇلەيمەنوۆا, وزگە دە زيالى قاۋىم وكىلدەرى قاتىستى.
مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ توراعاسى قۋات بوراش بۇگىنگى فەستيۆالدىڭ مادەني-رۋحاني ماڭىزىنا توقتالىپ, بارلىق وڭىردە جالعاساتىنىن جەتكىزدى.
«جالپى, مينيسترلىك تاراپىنان بۇل باعىتتا كوپتەگەن جۇمىس جۇرگىزىلىپ جاتىر. قازىرگى ۋاقىتتا «وقيتىن ۇلت» جوباسى اياسىندا 2025 جىلعا دەيىن ەلدەگى وقىرماندار سانىن 40 پايىزعا دەيىن كوتەرسەك دەگەن جوسپار بار. بۇل قولدان جاسالاتىن ناۋقان ەمەس, وسىنداي كوپشىلىككە ارنالعان ءىس-شارالار ارقىلى جۇرگىزىلەدى. «ۇلتتىق ەلەكتروندى كىتاپحانا» نەگىزىندە رەسپۋبليكا بويىنشا بىرىڭعاي بارلىق جەردە ىسكە اسىرىلاتىن جاڭا اقپاراتتىق جۇيە جاساۋ جوسپارلانىپ وتىر. ول ىسكە اسسا, كەز كەلگەن كىتاپحانادا وتىرىپ, ەلدىڭ بارلىق وڭىرىندەگى كىتاپحانالار قولجەتىمدى بولىپ, وقىرمان قالاعان كىتابىن الىپ وقي الادى. بۇل باعىتتا باسپاگەرلەر قاۋىمىمەن, كىتاپحانالارمەن كەلىسسوز جۇرگىزىپ جاتىرمىز. بۇل دا قازىرگى زامان تالابىنا ساي جاسالاتىن جوبا دەپ ويلايمىز», دەدى قۋات بوراش.
ۇلتتىق اكادەميالىق كىتاپحاناسىنىڭ ديرەكتورى عازيزا قۇدايبەرگەنقىزى كەيىنگى 5 جىلدا وقىرمان كىتاپحاناعا ءجيى كەلەتىنىن, كەيدە ءتىپتى ورىن بولمايتىنىن ايتتى.
ء«بىزدىڭ كىتاپحاناعا كۇنىنە 500-800 ادام كەلەدى. جالپى, 1,5 ميلليون كىتاپ قورىمىز بار. ەلەكتروندىق پورتالدا 70 مىڭعا جۋىق كىتاپ بار, ولار ءارتۇرلى الەمدىك بازالاردان قولجەتىمدى. قازىر قازاق ادەبيەتى دە, شەتەل ادەبيەتى دە سۇرانىسقا يە. بۇگىنگى وقىرمان, اسىرەسە تانىمدىق, موتيۆاتسيالىق, پسيحولوگيالىق, فيلوسوفيالىق كىتاپتاردى ءجيى وقيتىنىن بايقايمىز», دەيدى ول. سونداي-اق IT تەحنولوگيا, ديزاين جانە ساۋلەت سالاسىنداعى كىتاپتار دا ءجيى سۇرالادى ەكەن.
«بىراق ءبارىبىر ءبىرىنشى ورىندا كوركەم ادەبيەت تۇرادى – اباي, مۇحتار اۋەزوۆ, بەيىمبەت مايلين, جۇسىپبەك ايماۋىتوۆ, دۋلات يسابەكوۆ, بەكسۇلتان نۇرجەكەەۆ, شەرحان مۇرتازا, مۇحتار ماعاۋين, شىڭعىس ايتماتوۆ, ال شەتەلدىك اۆتورلاردان – تولستوي, چەحوۆ, دوستوەۆسكي, رەمارك, زوليا كوپ وقىلادى. وعان قوسا جاڭا اۆتورلار مەن پروزاشىلار – باقىتگۇل سارمەكوۆا, الىشەر راحات, جادىرا شامۇراتوۆا, قانات تىلەۋحان, ماقسات مالىك جاقسى تانىلىپ كەلەدى. ءىلياس وماروۆ اتتى جاس تالانتىمىز ورىس تىلىندە جازادى جانە وتە بەلسەندى جۇمىس ىستەيدى. قازىرگى ماركەتينگ زامانىندا اۆتورلار قوعامعا وزدەرى شىعۋى كەرەك. «مەن كىتاپ جازدىم, ەندى وزدەرىڭ ساتىڭدار» دەپ مەملەكەتكە قاراپ وتىراتىن ۋاقىت ەمەس. قازىر ادەبي اگەنتتەر قاجەت. سوندىقتان اۆتورلار كىتاپتاردىڭ ساتىلعانىن كۇتىپ وتىرماي, الەمنىڭ, جاستاردىڭ نە وقىپ جاتقانىن زەرتتەۋى كەرەك. مىسالى, جاس جەتكىنشەكتەر كوميكستى كوپ وقيدى, ولارعا زاماناۋي الەم تۋرالى قىسقا اڭگىمەلەر كەرەك», دەيدى عازيزا قۇدايبەرگەنقىزى.
«جۇلدىزبەن كىتاپحاناعا جول» جوباسىندا تانىمال اكتەرلەر مەن تەلەجۇرگىزۋشىلەر كىتاپحاناعا كەلۋشىلەردى تىركەدى. سونداي-اق قازاق تىلىندە كوپشىلىك الدىندا ەركىن ءارى تارتىمدى سويلەۋ, حاريزمانى كۇشەيتۋ, باسقارۋ پسيحولوگياسى سىندى شەبەرلىك سىنىپتارى ۇيىمداستىرىلدى. «القا» ادەبي-مادەني كلۋبى «قۋىسكەۋدە» كىتابىنىڭ تۇساۋكەسەرىن وتكىزدى. بيىلعى فەستيۆالدىڭ ەرەكشەلىگى, كەشكىلىك فەستيۆالگە جينالعاندار «كىتاپحانا ءتۇنى» مادەني ءىس-شاراسىنىڭ كۋاسى بولدى. «كىتاپحانا تۇنىندە» بيزنەس-كوۋچينگ, «Musikal party» كلاسسيكالىق مۋزىكا كەشى, «Quiz» ينتەللەكتۋالدىق الاڭى, پوەزيا كەشى, استانانىڭ تۇنگى اسپانىن تەلەسكوپپەن تاماشالاۋ, تۇنگى كاراوكە, انتيكافە «Book & سoffee» سىندى ءتۇرلى قىزىقتى, جان-جاقتى ءىس-شارالار ۇيىمداستىرىلدى. ءبىر قۋانتارلىعى, ءدال وسى كۇنى 5 000-عا جۋىق ادام كىتاپحاناعا اياق باسىپ, كىتاپ مەرەكەسىنە قاتىستى. ەلىمىزدىڭ ءار ايماق, اۋىلىندا قاتار وتكەن كىتاپ فەستيۆالدەرىنىڭ دە بيىلعى قارقىندى جۇمىسى كوڭىل قۋانتادى. تۇركىستان وبلىسىنىڭ وزىندە ءبىر مەزەتتە 396 كىتاپحانانىڭ وسى جوباعا اتسالىسۋى رۋحاني كىتاپ مەرەكەسىنىڭ ماڭىزىن ارتتىرا تۇسكەندەي.
