ۇكىمەت باسشىسى سۋ شارۋاشىلىعى, يرريگاتسيالىق جانە درەناجدىق جۇيەلەردى كۇردەلى جوندەۋ بويىنشا اتقارىلعان جۇمىستار تۋرالى ەسەپتى تىڭدادى. ءا.سمايىلوۆ قىرعىز تاراپىمەن بىرلەسىپ, ترانسشەكارالىق وزەندەر بويىنشا بولجالدى دەرەكتەرگە سايكەس 2024 جىلعى ۆەگەتاتسيالىق كەزەڭدى وتكىزۋ الگوريتمىن الدىن الا ازىرلەۋ قاجەتتىگىنە توقتالدى.
سونىمەن قاتار تاراز قالاسىندا كارىز-تازارتۋ قۇرىلىستارىن سالۋ جانە جىلۋ ماگيسترالدارىن قايتا جاڭارتۋ, تاراز, جاڭاتاس, قاراتاۋ جانە شۋ قالالارىنداعى كوپقاباتتى تۇرعىن ۇيلەردى كۇردەلى جوندەۋ, سونداي-اق قولدانىستاعى قازاندىقتاردى جاڭعىرتۋ جوبالارىنىڭ وزەكتى ماسەلەلەرى قارالدى.
سونداي-اق مويىنقۇم اۋدانىنداعى راداي جانە قارابوگەت كوپىرلەرىن, وتار-گۆاردەيسك اۋداندىق ماڭىزى بار اۆتوجولىنداعى تەمىرجول وتكەلى ارقىلى وتەتىن كوپىر سالۋ جوبالارى تۋرالى باياندامالار تىڭدالدى.
جيىنعا قاتىسۋشىلار ءبىلىم بەرۋ ينفراقۇرىلىمىن قولداۋ قورى ەسەبىنەن جاڭا مەكتەپتەر سالۋ جانە مەملەكەتتىك باعدارلاما اياسىندا نەگىزگى مەكتەپتەردى كەڭەيتۋ, تاراز قالاسىنداعى كوپسالالى اۋرۋحانا مەن پەريناتالدىق ورتالىقتىڭ قۇرىلىسىن, مەركى, تالاس جانە شۋ اۋداندارىنداعى ورتالىق اۋرۋحانالاردى كۇردەلى جوندەۋ, سونداي-اق بايزاق, جۋالى جانە قورداي اۋداندارىندا جاڭا مەديتسينالىق نىساندار اشۋ جونىندەگى شارالاردى تالقىلادى.
ءا.سمايىلوۆ وبلىس اكىمدىگى بارلىق باسىم جوبا بويىنشا قۇجاتتاما ازىرلەۋدى جانە ءتيىستى بيۋدجەتتىك وتىنىمدەردى بەرۋدى جەدەلدەتۋ قاجەتتىگىن اتاپ ءوتتى. بۇل رەتتە سۋ شارۋاشىلىعى قۇرىلىمدارىن كۇردەلى جوندەۋدەن وتكىزۋگە, سۋارۋ جەلىلەرىن قايتا جاڭارتۋعا, سۋ قويمالارىن سالۋعا جانە سۋ ۇنەمدەۋ تەحنولوگيالارىن ەنگىزۋگە باسا نازار اۋدارۋ قاجەت ەكەنىن ايتتى.
