مىنەزدى جۋرناليست جۇماتاي سابىرجان ۇلىن كوزىقاراقتى وقىرمان جاقسى بىلەدى. امانگەلدى اۋداندىق «تىڭ شۇعىلاسى» گازەتىنەن باستالعان قالامگەردىڭ ەڭبەك جولى, الدىمەن تورعاي وبلىستىق «تورعاي تاڭى», كەيىن اقمولا وبلىستىق «ارقا اجارى» گازەتىندە جالعاستى. اسىرەسە ونىڭ ەسىمى رەسپۋبليكالىق «انا ءتىلى» گازەتىندە ىستەگەن جىلدارى ءدۇيىم ەلگە جاقسى تانىلدى. سان ءتۇرلى وزەكتى ماسەلەنى قوزعاعان پروبلەمالىق ماقالالارى مەن ەتنوگرافيالىق ەتيۋدتەرىن, ويماقتاي عانا بولسا دا اتانداي اۋىر جۇك ارتقان اقپاراتتارىن وقىرماندار ىزدەپ وقىدى. قوعامداعى كەلەڭسىز كورىنىستەردى اششى مىسقىلمەن تۇيرەپ, ەزۋگە كۇلكى ۇيىرگەن ساتيرالىق شىعارمالارىن دا جۇرتشىلىق جىلى قابىلدادى. قارىمدى قالامگەردىڭ كوزى تىرىسىندە «كارى سايتان», «وكپەلەسەڭ, ءوزىڭ ءبىل» اتتى جيناقتارى جارىق كورگەن. كەيىن جاريالانباعان دۇنيەلەرى «مەن تانىعان شىندىق» دەگەن اتپەن كىتاپ بولىپ شىقتى.
شالعاي اۋىلعا شىراي بەرگەن جيىننىڭ اشىلۋىندا امانگەلدى اۋدانىنىڭ اكىمى تالعات كاربوزوۆ شىنشىل قالام يەسىنىڭ ءومىر جولى مەن ەڭبەكتەرىنە توقتالىپ, ءىس-شارا ماڭىزىن اتاپ ءوتتى.
– بۇگىن قابىرعا اۋىلى ءۇشىن تاريحي ءسات دەۋگە بولادى. ويتكەنى بۇعان دەيىن بۇل مەكتەپ ن.كرۋپسكايا ەسىمىمەن اتالعان ەدى. ەندى وعان جەرلەس قالامگەردىڭ ەسىمى بەرىلىپ وتىر. بۇعان قۋانىشتىمىز. وسى ءبىلىم ۇياسىنان ەلىمىزگە بەلگىلى قانشاما ازامات تۇلەپ ۇشتى. سونىڭ ءبىرى – جۇماتاي سابىرجان ۇلى. اقيقاتتى ار تۇتقان تۇلعانىڭ قازاق جۋرناليستيكاسىندا ءوز ورنى عانا بار ەمەس, سونىڭ دامۋىنا قوسقان ۇلەسى دە مول. ءبىز سونى ماقتان تۇتامىز. قابىرعا اۋىلى – اۋدانداعى شالعاي ەلدىمەكەندەردىڭ ءبىرى بولسا دا, بولاشاعى زور. بىلتىر اۋىلعا تازا اۋىز سۋ تارتىلىپ, ۇيالى بايلانىس جەلىسى ورناتىلدى. ەندى كوتەرمە جولعا كۇردەلى جوندەۋ جۇرگىزۋ ماسەلەسىن شەشۋ كوزدەلىپ وتىر. اۋىل مەكتەبى دە نازاردان تىس قالعان ەمەس. جىل سايىن جوندەۋ جۇمىستارى جۇرگىزىلەدى. سوندىقتان اياۋلى اعامىزدىڭ ەسىمىن يەلەنگەن مەكتەپ ۇجىمىنا زور تابىس تىلەپ, جينالعان قاۋىمعا ريزاشىلىعىمدى بىلدىرەمىن, – دەدى اۋدان اكىمى.
مازمۇندى ءىس-شاراعا استانادان كەلگەن قالامگەردىڭ زايىبى, جۋرناليست ءامينا مۇرجۇسىپقىزى, بالالارى – سايات, گۇلنۇر, بۇرىن بىرگە قىزمەت ىستەگەن ارىپتەستەرى – سەيفوللا شايىنعازى, جومارت نۇرمان جانە حاميتبەك ماحمۇتوۆ, باقىتبەك بايتەمىروۆ سەكىلدى ازاماتتارمەن بىرگە باۋىرلارى جومارت, ناعاشىباي جانە ءالىمجان سابىرجان ۇلى قاتىسىپ, شىندىقتى تۋ ەتكەن ازامات تۋرالى تاعىلىمدى ەستەلىكتەر ايتتى. جۇماتاي اعامىزدىڭ جارى ءامينا اپايعا سىي-قۇرمەت كورسەتىلدى. ودان كەيىن جيىن مەكتەپ وقۋشىلارى مەن اۋدان ونەرپازدارى دايىنداعان كونتسەرتكە ۇلاسىپ, سپورتتىق ءىس-شارالارعا جالعاستى. كەلگەن قوناقتار مەكتەپ اۋلاسىنا اعاش ەكتى.
ءىس-شارا سوڭىندا جۇماتاي سابىرجان ۇلىنىڭ رۋحىنا ارناپ اس بەرىلىپ, دۇعا باعىشتالدى.
