جاڭالىققا جانى قۇشتار قازاق حالقى جاڭا تەحنولوگيا داۋىرىنە توزىعىمەن ەمەس, وزىعىمەن ەنۋگە نيەتتى. تۇپتەپ كەلگەندە, ەشبىر شيكىزات, قازبا بايلىعى اقىل-وي جەتىستىگىن الماستىرا المايدى. تسيفرلاندىرۋ مەن يننوۆاتسياعا, جاساندى ينتەللەكتىگە كوڭىل ءبولۋ – مىنە, ءبىزدىڭ ەرەكشە ءمان بەرەتىن دۇنيەمىز! الپاۋىت ەلدەر مۇنى باياعىدا ءتۇسىنىپ, وسى يدەيانى ۇلتتىق قۇندىلىق, مەملەكەت ساياساتىنىڭ اجىراماس بولىگى دەپ جاريالاپ تا قويدى. بۇگىنگى تاڭدا تسيفرلاندىرۋ قوعامنىڭ بارلىق قۇرىلىمىن قامتىعان. وعان قۇجات اينالىمى تولىعىمەن ەلەكتروندى فورماتقا كوشكەن ءبىزدىڭ ۇلتتىق ۋنيۆەرسيتەت تە ناقتى مىسال بولا الادى.
بيىلعى جولداۋدا ەرەكشە نازار اۋدارىلعان ماسەلەنىڭ ءبىرى – ءبىلىم بەرۋ جۇيەسى. ء«ار بالانىڭ باقىتتى بالالىق شاعى بولۋى كەرەك» دەدى مەملەكەت باسشىسى. ول ءۇشىن بالالاردىڭ قاۋىپسىزدىگىن, ساپالى ءبىلىم الۋىن قامتاماسىز ەتۋ قاجەت. جوعارى ءبىلىم بەرۋ جۇيەسى نارىقتىق ەكونوميكانى, جۇمىس بەرۋشىلەردىڭ مۇددەلەرى مەن قاجەتتىلىكتەرىن ەسكەرە وتىرىپ, قايتا قۇرىلۋعا ءتيىس. بۇل ءسوزسىز ەڭبەك نارىعىنا, ۋنيۆەرسيتەت تۇلەكتەرىنىڭ جۇمىسقا ورنالاسۋىنا اسەر ەتەدى.
قازىر بارلىق سالادا تىڭ مىندەتتەر مەن جاڭا تالاپتار قويىلىپ وتىر. زامان كوشىنە ىلەسىپ, العا ۇمتىلۋ ءۇشىن سانانىڭ اشىقتىعىن قامتاماسىز ەتۋ قاجەت. بۇل ماسەلەنىڭ شەشىمىن ابايدىڭ «تولىق ادام» تۇجىرىمداماسىنان تابامىز. «اقىل, قايرات, جۇرەكتى بىردەي ۇستا, سوندا تولىق بولاسىڭ ەلدەن بولەك» دەپ دانا اقىننىڭ ءوزى ايتقانداي, جاستارىمىزدى ءبىلىمدى, وزىنە سەنىمدى, ىزگىلىك پەن جاقسىلىققا ۇمتىلاتىن ادام رەتىندە تاربيەلەۋ – وسى كۇننىڭ اسىل مۇراتى. سوندىقتان ابايدىڭ سوزدەرى – ادىلەتتى قازاقستان قۇرۋعا ۇمتىلعان ەل ءۇشىن ارقاشان جول كورسەتۋشى تەمىرقازىق.
مەملەكەت باسشىسى قاسىم-جومارت توقاەۆ جولداۋدا اتاپ كورسەتكەن «ادال ازامات» ۇعىمى دا – ادىلەتتى قازاقستاننىڭ ارقاۋى. ال ەل دامۋىنا سەرپىن بەرەتىن قۇجاتتىڭ وزەگى ەڭ الدىمەن ادامي كاپيتال ەكەنىن ەستەن شىعارماعانىمىز ابزال.
ەرلان سىدىقوۆ,
ل.ن.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ رەكتورى
