15 قىركۇيەك كۇنى «قاللەكي تەاترىندا» ونەر مەيرامى. XXXIII تەاتر ماۋسىمىنىڭ جۇمىسىن باستاۋعا ساقاداي ساي ۇجىم جىلداعى ءداستۇر بويىنشا م.اۋەزوۆتىڭ «اباي» قويىلىمىن تەاترمەن ساعىنا قاۋىشقان كورەرمەنىنە تارتۋ ەتەدى.
قازاقستاننىڭ ەڭبەك سىڭىرگەن قايراتكەرى, رەجيسسەر الىمبەك ورازبەكوۆ ساحنالاعان «اباي» تراگەدياسىندا قوس ابايدىڭ بەينەسى كورسەتىلەدى. اعا اباي بەينەسىن – قازاقستاننىڭ حالىق ءارتىسى تىلەكتەس مەيراموۆ, اباي ءرولىن – قازاقستاننىڭ ەڭبەك سىڭىرگەن قايراتكەرى نۇركەن وتەۋىل سومدايدى.
قويىلىمعا جالپى 65 اكتەر قاتىسادى. قويۋشى سۋرەتشى – قانات ماقسۇتوۆ. حورمەيستەر – قازاقستاننىڭ ەڭبەك سىڭىرگەن قايراتكەرى امانتاي جۇماشەۆ.
«40 جاستان اسقان سوڭعى اباي بىزگە ءبىر اباي ەمەس, ەكى اباي بولىپ كەتەدى. بىرەۋى – ومىرگە ۇيلەسكىسى كەلمەي, زاماننان, ورتاسىنان وزىپ شىعىپ, سىنشى, ۇستاز, اقىلشى, اقىن-دانىشپان بولۋعا اينالعان اباي دا, ەكىنشىسى – كۇندەگى ءومىردىڭ بەتىمەن ەلدىڭ ءسوزىن ۇستاپ, بۇرىنعىشا پارتيا, تارتىستىڭ, بيلىك, اكىمشىلىكتىڭ جولىنداعى رۋ باسى, ەل مەڭگەرۋشى اباي», دەيدى ۇلى مۇحتار اۋەزوۆ.
عاسىرلار بويى قالىپتاسقان كەرتارتپا ادەت-عۇرىپ پەن مىلقاۋ كۇش, دۇلەي زاماندى ايىپتاپ وتكەن اباي ويى, اباي فيلوسوفياسى وركەندەپ, عالامدىق دەڭگەيگە جەتۋىنىڭ بارىسىنداعى وقيعالار ساحنادا ۇلى م.اۋەزوۆ دراماتۋرگياسىمەن وتكەن عاسىرعا جول تارتقانىمەن, بۇگىنگى كورەرمەن ءۇشىن دە كوكەيكەستىلىگىن جوعالتقان جوق.
ماۋسىماشار قويىلىم سونىمەن قاتار قىركۇيەك ايىنىڭ 19-24 كۇندەرى ارالىعىندا قاراعاندى قالاسىندا قاليبەك قۋانىشباەۆتىڭ 130 جىلدىعىنا ارنالعان «سىن – شىن بولسىن» رەسپۋبليكالىق تەاتر فەستيۆالى اياسىندا قاراعاندىلىق كورەرمەن نازارىنا ۇسىنىلادى. ايتۋلى فەستيۆال شىمىلدىعى قاللەكي تەاترىنىڭ «اباي» قويىلىمىنىڭ ارنايى كورسەتىلىمىمەن اشىلادى.
سەبەبى ونەر ۇجىمى ەسىمىن ەنشىلەگەن تەاتر ونەرىنىڭ كوريفەيى قاليبەك قۋانىشباەۆ سومداعان شوقتىعى بيىك ءرول – ءدال وسى اباي ءرولى بولدى. زامانداستارى قاللەكي اتاپ كەتكەن ايگىلى ءارتىستىڭ ايتۋلى ءرولىن تۋىندى اۆتورى, جازۋشى مۇحتار اۋەزوۆتىڭ ءوزى جوعارى باعالاعان. 1993 جىلى بەلگىلى تەاتر سىنشىسى اشىربەك سىعايدىڭ ۇسىنىسىمەن قاليبەك قۋانىشباەۆتىڭ 100 جىلدىعى قۇرمەتىنە وراي ەلوردالىق تەاترعا «قاليبەك قۋانىشباەۆ» ەسىمى بەرىلدى.
تەاتر جاڭالىعى مۇنىمەن تاۋسىلمايدى. 25-30 قىركۇيەك ارالىعىندا ونەر ۇجىمى ماسكەۋلىك جاس رەجيسسەر گۇلناز بالپەيىسوۆانىڭ رەجيسسەرلىك قولتاڭباسىندا قويىلعان ع.مۇسىرەپوۆتىڭ «بايان سۇلۋ – قوزى كورپەش» مۋزىكالىق دراماسىمەن بىشكەك قالاسىندا وتەتىن كسرو حالىق ءارتىسى باكەن قىدىكەەۆانىڭ 100 جىلدىعىنا ارنالعان «ART-ORDO – 2023» IX حالىقارالىق تەاتر فەستيۆالىنە قاتىسادى.
ودان بولەك, قازان ايىنىڭ 9-15 كۇندەرى ارالىعىندا پەتروپاۆل قالاسىندا ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ۇيىمداستىرۋىمەن جانە سولتۇستىك قازاقستان وبلىسى اكىمدىگىنىڭ قولداۋىمەن قازاقستان دراما تەاترلارىنىڭ XXIX رەسپۋبليكالىق فەستيۆالi وتەدى. فەستيۆال مەملەكەت جانە قوعام قايراتكەرi تەمiربەك جۇرگەنوۆتiڭ 125 جىلدىعىن مەرەكەلەۋ اياسىندا وتكiزiلەدi.
سونىمەن قاتار جاڭا ماۋسىمنىڭ العاشقى ايلارىندا كورەرمەن نازارىنا «قىز جىبەك», «پاتشا كوڭىلىم, نە دەيسىڭ؟» قويىلىمدارىنىڭ پرەمەراسى ۇسىنىلادى. ج.شايحيسلام ۇلىنىڭ «قىز جىبەك» قويىلىمىن حالىقارالىق تەاتر فەستيۆالدەرىنىڭ لاۋرەاتى, جاس رەجيسسەر الىبەك ومىربەك ۇلى, ال ق.جيەنبايدىڭ «پاتشا كوڭىلىم, نە دەيسىڭ؟» كومەدياسىن رەجيسسەر, قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ ساحنالايدى.
