سۋرەتتى تۇسىرگەن – جانگەلدى ابدىعالىم
بۇل جولى شيپاجايدىڭ شاراپاتىن 48 ارداگەر كورەدى. ون كۇن ەم-دومدارىن الىپ, وي تىنىقتىرىپ تازا اۋادا سەرۋەندەيدى. وبلىستىق ارداگەرلەر كەڭەسى ارداگەرلەردى تەك قاراعاندىدان عانا ەمەس, اۋدان-اۋىلدان ىرىكتەپ الدىرىپتى. اسىرەسە, الەۋمەتتىك جاعدايىنا قاراي تاڭداپتى.
– اۋەلى وسىنداي شاراعا تىكەلەي باستاماشى بولعان وبلىس اكىمى ەرماعانبەت بولەكپاەۆقا, اتسالىسقان وبلىس اكىمىنىڭ ورىنباسارى باۋىرجان اسانوۆقا, بىزبەنەن ءبىر اي تىعىز جۇمىس جاساعان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى اسەم جۇنىسپەكوۆاعا العىس ايتا كەتكەنىم ءجون بولار. ءبىزدىڭ ۇيىم 1987 جىلدىڭ اقپان ايىندا قۇرىلدى, بيىل 36 جىل تولىپ وتىر. وسى ۋاقىت ارالىعىندا ارداگەرلەرىمىزدىڭ شيپاجايدا تەگىن دەمالۋىنا العاش رەت جولداما بەرىلدى. مۇمكىنشىلىك بولسا, تاعى دا جالعاسادى. ءار اۋدان, قالادا ارداگەرلەر ۇيىمى بار. سولارعا تاپسىرما بەرگەنبىز. «ۇلكەن كىسىلەردى ىرىكتەپ بەرىڭىزدەر, جاعدايىنا قاراڭىزدار» دەپ. سودان 48 ارداگەردى اق جول تىلەپ, شىعارىپ سالدىق, دەيدى وبلىستىق ارداگەرلەر كەڭەسىنىڭ توراعاسى ورالدى تورەعوجين.
شيپاجايعا جول تارتقانداردىڭ اراسىندا بۇقار جىراۋ اۋدانىنىڭ قۇرمەتتى ازاماتى, تىل ارداگەرى قاناعات جۇماش ۇلى دا بار. قاناعات اقساقال ارداگەرلەر ۇيىمىنىڭ مۇنداي قامقورلىعىنا ءدان ريزا.
– بۇقار جىراۋ اۋدانىنان ەكى ارداگەر كەلدىك. اللا قالاسا, ون كۇن دەمالامىز. بالقاش كولىنىڭ جاعاسىنداعى پريوزەرسك شاھارىنا العاش رەت بارا جاتىرمىن. وتە قۋانىشتىمىز. باسقا ءوڭىردىڭ اقساقالدارىمەن تانىسىپ, اڭگىمەلەسىپ, سەرگىپ قايتامىز. جاسىراتىنى جوق, ارامىزدا جالعىز قالعان ەگدە جاستاعىلار بار. اسىرەسە, سول كىسىلەرگە ۇلكەن كومەك بولدى. تىل ارداگەرلەرى جىل سايىن ازايىپ بارادى. ۇلكەندى قۇرمەتتەگەننىڭ جولى ارقاشان اشىق بولادى. سول سەبەپتى, وسىنداي مۇمكىندىك تۋدىرعان وبلىس اكىمدىگىنە جانە ارداگەرلەر ۇيىمىنا ايتار العىسىمىز كوپ, – دەيدى جاسى 88-دەگى قاريا قاناعات جۇماش ۇلى.
وبلىستا 200 مىڭنان استام زەينەتكەر بار. 3 مىڭنان اسا تىل ەڭبەككەرى تىركەلگەن. جاستارى 80-90 جاس ارالىعىندا. وكىنىشكە قاراي, سوعىس ارداگەرلەرى جوقتىڭ قاسى دەسەك تە بولادى. 13-ءى عانا قالىپتى. توعىزى – قاراعاندىدا, ۇشەۋى – تەمىرتاۋدا, بىرەۋى – وساكاروۆ اۋدانىندا.
سونىمەن, 48 ارداگەر مىنگەن اۆتوبۋس جول-پاترۋلدىك پوليتسيا قىزمەتىنىڭ باستاۋىمەن جولعا شىقتى. وڭ ساپار تىلەپ, شىعارىپ سالعان قاۋىم قادىرلى قارتتارىمىزعا مۇنداي قامقورلىق ءالى دە جالعاسىن تابادى دەپ تارقاستى.
قاراعاندى وبلىسى
