«اقاڭنىڭ اتالعان قولجازباسى كىتاپحاناعا قالاي تۇسكەنى بەلگىسىز. 1940 جىلى «ارنايى ساقتاۋ قورىنا» تىركەلىپ, 1989 جىلى «سيرەك قورعا» اۋىستىرىلعان ەكەن. سودان بەرى سيرەك كىتاپتار مەن قولجازبالار قورىندا ساقتاۋلى تۇر. عالىمدار تاراپىنان قولجازباعا نازار اۋدارىلىپ, سوڭعى جىلدارى زەرتتەۋ جۇمىستارى جۇرگىزىلۋدە», دەيدى ۇلتتىق كىتاپحانا ديرەكتورى باقىتجامال وسپانوۆا.
قولجازبا سارى قاعازدان جاسالعان داپتەرگە جازىلعان. جازۋى ۇلكەن. ءار بەتىنە 14-15 جول جازۋ سىيعان. جادىگەردىڭ العاشقى پاراعىنىڭ شەكەسىنە توتە جازۋمەن «احمەت بايتۇرسىن ۇلى» دەپ اۆتوردىڭ ەسىمى جازىلسا, ودان كەيىن «شارۋالىق وزگەرىسى» دەپ ەڭبەكتىڭ اتى كورسەتىلگەن. ءاربىر تاراۋ اياقتالعان تۇستا اۆتور «ا.ب» دەپ توتە جازۋمەن قولتاڭباسىن قويىپ وتىرعان. بۇل جادىگەر ازىرگە ۇلت ۇستازى احمەت بايتۇرسىن ۇلىنىڭ ءوز قولىمەن جازعان جالعىز ەڭبەگى سانالىپ وتىر.
قولجازباسىنىڭ جەتى تاراۋى ءبۇتىن ساقتالعان. اقاڭنىڭ بۇل زەرتتەۋ جۇمىسى العاش «قازاق» گازەتىنىڭ 1915 جىلعى (№145, 146, 147, 148, 158, 161, 163) جانە 1916 جىلعى (№167) ساندارىندا جارىق كورىپتى. ال قولجازباعا كىرمەگەن تاعى ءبىر تاراۋدى زەرتتەۋشىلەر «قازاق» گازەتىنىڭ كەزەكتى ءبىر نومىرىنەن تاۋىپتى. وسىعان قاراعاندا, قولجازبا سەگىز تاراۋدان تۇرعان كورىنەدى.
بىراق «قازاق» گازەتىندە جاريالانعان جەتى تاراۋدا اۆتوردىڭ اتى جوق. «دەسەك تە, بۇل جازبانىڭ يەسى ا.بايتۇرسىن ۇلى ەكەنى انىق. اقاڭ بۇل ەڭبەكتى 1930 جىلدارى جازعان بولۋى مۇمكىن» دەيدى زەرتتەۋشىلەر.
جادىگەرمەن تانىسقان ا.بايتۇرسىن ۇلى مۋزەي-ءۇيىنىڭ مەڭگەرۋشىسى ادىلەت احمەت ۇلى: «اقاڭ بۇل ەڭبەگىندە «مادەنيەت قىرقالارى», «مادەنيەت توبەلەرى», «مادەنيەت جۇعىسى», «مادەنيەتتىڭ تاراعان جولى», «مادەنيەت بەسىگى» سىندى تاقىرىپتاردى قاۋزاعانى بايقالادى. سوعان قاراعاندا بۇل ەڭبەك وتكەن عاسىردىڭ باسىندا تاركىلەنىپ, كۇنى بۇگىنگە دەيىن تابىلماي كەلە جاتقان ا.بايتۇرسىن ۇلىنىڭ «مادەنيەت تاريحى» اتتى جازباسىنىڭ ءبىر ءبولىمى بولۋى دا مۇمكىن» دەيدى.
