فوتو: استانا قالاسىنىڭ اكىمدىگى
ەل تاۋەلسىزدىگىنىڭ تاريحىندا تۇڭعىش رەت شاحماتتان الەم چەمپيوناتىنىڭ كۇمىس جۇلدەگەرىن استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, باسقارماعا قاراستى سپورتتى وليمپيادالىق ەمەس تۇرلەرى بويىنشا دامىتۋ ديرەكتسياسى جانە №7 بالالار مەن جاسوسپىرىمدەر سپورت مەكتەبىنىڭ باسشىلىقتارى كۇتىپ الدى. سونداي-اق شاحماتشى قىزداردىڭ اتا-انالارى, جاقىندارى مەن دوستارى دا بولدى.
«بار كۇشىمىزدى سالدىق. جارىس وتە تارتىسى ءوتتى. ءبىرىنشى ورىنعا تالاستىق, الايدا گرۋزيا قۇراماسىنا جول بەرىپ كۇمىس جۇلدەگەر اتاندىق. قازاقستان تاريحىندا تۇڭعىش رەت الەم چەمپيوناتىندا ەكىنشى ورىنعا يە بولدىق. وتە قۋانىشتىمىز. قازاق ەلى قۋاندى دەپ ويلايمىن, وزىمىزدە دە قاتتى قۋانىپ تۇرمىز», دەيدى الەم چەمپيوناتىنىڭ كۇمىس جۇلدەگەرى ءامينا قايىربەكوۆا.
ايتا كەتۋ كەرەك, فينالدا قازاق قىزدارى گرۋزيا قۇراماسىنا جول بەردى. اقتىق كەزەڭنىڭ العاشقى ماتچىندا قازاقستان – 1,5-2,5, ەكىنشى ماتچىندا – 0,5-3,5 ەسەبىمەن جەڭىلىپ قالعان بولاتىن.
ۇلتتىق قۇراما ساپىندا ءبيبىسارا اساۋباەۆا, كسەنيا بالاباەۆا, الۋا نۇرمانوۆا اسەل سەرىكباي جانە قوس استانالىق شاحماتشى – مەرۋەرت كاماليدەنوۆا مەن ءامينا قايىربەكوۆا ونەر كورسەتتى.
ال قولا مەدالدى فرانتسيا قۇراماسى يەلەندى. ولار ءۇشىنشى ورىن ءۇشىن ويىندا اقش شاحماتشىلارىنان ايلاسىن اسىردى.
ەسكە سالساق, شاحماتتان 2023 جىلعى كوماندالىق الەم چەمپيوناتى پولشانىڭ بىدگوشش قالاسىندا ءوتتى. وندا 12 كوماندا باق سىنادى. تۋرنير 2007 جىلدان بەرى ۇيىمداستىرىلىپ كەلەدى. بىراق قازاقستان بۇعان دەيىن شيرەك فينالدان ءارى اسىپ كورگەن ەمەس.
