فوتو: ەرلان ومار\EQ
ستۋدەنتتەر الدىمەن «Egemen Qazaqstan» گازەتىنىڭ رەداكتسياسىن ارالاپ, گازەت جۋرناليستەرىنىڭ جۇمىسىمەن تانىستى. «قازاق گازەتتەرى» جشس باس ديرەكتورىنىڭ ورىنباسارى قامبار احمەت قۇرامىنا بىرنەشە باسىلىم كىرەتىن مەديا سەرىكتەستىكتىڭ جۇمىسى تۋرالى ماعلۇمات بەردى.
سونداي-اق كەزدەسۋگە «Egemen Qazaqstan» گازەتىنىڭ باس رەداكتورى عابيت ىسكەندەر ۇلى, باس رەداكتوردىڭ ورىنباسارلارى تالعات باتىرحان مەن بانۋ ءادىلجان, ينتەرنەت-رەداكتسيا جەتەكشىسى قۋات اۋەسباي قاتىستى.
باسقوسۋ بارىسىندا عابيت ىسكەندەر ۇلى مەن تالعات باتىرحان بۇرىن اسكەري جۋرناليستيكا سالاسىندا ازدى-كوپتى قالام تەربەگەندىكتەرىن ايتا كەلە, سول كەزدەردەگى ەستەلىكتەرىن اڭگىمەلەپ بەردى. ستۋدەنتتەر بولسا, وزدەرىن قىزىقتىرعان ساۋالدارعا جاۋاپ الىپ, كاسىبي مامانداردىڭ كەڭەسىن تىڭدادى. گازەت قىزمەتكەرلەرى جوعارى وقۋ ورىندارىندا سالالىق جۋرناليستيكاعا, ونىڭ ىشىندە اسكەري جۋرناليستيكاعا ءمان بەرىلىپ جاتقانىنا ريزاشىلىق ءبىلدىرىپ, بۇل باعىتتا ءبىلىم الىپ جاتقان ستۋدەنتتەرگە ساتتىلىك تىلەدى.
اسكەري كافەدرا وقىتۋشىسى, بەلگىلى جۋرناليست ابۋباكىر سمايىلوۆتىڭ ايتۋىنشا, اسكەري جۋرناليستيكا بولىمىنە قابىلدانعان قىز-جىگىتتەر تەك جۋرناليستيكا فاكۋلتەتىنىڭ عانا ەمەس, ءارتۇرلى فاكۋلتەتتىڭ ستۋدەنتتەرى ەكەن. 2 كۋرسقا كوشكەن ولار - اسكەري جۋرناليستيكا ءبولىمىنىڭ العاشقى توبى. بيىل تاعى ءبىر توپ 1 كۋرسقا قابىلدانعان. ستۋدەنتتەر اسكەري تاريح, ونىڭ ىشىندە اسكەري جۋرناليستيكا تاريحى جايلى وقىعان, ەندى «اقپاراتتىق سوعىس», ءجۋرناليستىڭ قۇقىعى سىندى تاقىرىپتاردى وقىپ جاتىر. ولار كەلەشەكتە لەيتەنانت شەنىن الىپ, زاپاستاعى وفيتسەر بولىپ شىعادى, جازۋعا دا ماشىقتانىپ, اسكەري گازەتتەرگە, باعدارلامالارعا جۇمىسقا تۇرا الادى.
ابۋباكىر سمايىلوۆ كەزدەسۋ سوڭىندا «قازاق گازەتتەرى» ۇجىمىنا العىس ايتىپ, «الداعى ۋاقىتتا گازەت رەداكتسياسىمەن ىنتىماقتاستىق جالعاسا بەرسىن» دەپ تىلەك ءبىلدىردى.
«كەزدەسۋ بىزگە وتە پايدالى بولدى دەگەن ويدامىز, جۋرناليستيكا شەبەرلەرىنىڭ قالاي جۇمىس ىستەيتىنىن كورۋ - ۇلكەن تاجىريبە, كوپ نارسە ۇيرەنۋ كەرەكتىگىن تۇسىندىك, الداعى ۋاقىتتا اقپارات جازۋ ارقىلى تاجىريبەمىزدى شىڭدايمىز», دەپ ستۋدەنتتەر كەزدەسۋدەن العان اسەرىن ءبولىستى.
