فوتو: instagram/bekzhan_turys
جاقىندا الماتىداعى ونەر ورداسى مۇحتار اۋەزوۆ اتىنداعى قازاق ۇلتتىق دراما تەاترىنىڭ 98-ماۋسىمى اشىلدى. تەاتردىڭ ارداگەر اكتەرى جاڭا قويىلىمنىڭ قىزۋ دايىندىعىنا بايلانىستى الەۋمەتتىك جەلىدەن قول ءۇزىپ قالىپ, دومبىراعا بايلانىستى جات اعىمنىڭ جەتەگىندە كەتكەندەردىڭ ايتقانىن ەندى عانا ەستىگەنىن ايتتى.
«قولىنان دومبىرا تاستاماعان قازاقتىڭ ءبىرى رەتىندە بۇعان بەيجاي قاراي المايمىن. 70 جىل ورىستىڭ بودانىندا وتىرعاندا ءوز ۇلتىمنىڭ اۋزىمەن «قازاقتىڭ دومبىراسى - ارام» دەگەندى ەشكىم ايتقىزباپ ەدى. ۇمىتپاسام, «تەرمە» دەيتىن حابار دا ءجۇردى ەفيردە. ال تاۋەلسىزدىك العان سوڭ بىزگە نە كورىندى, اعايىن؟ تۇسىنگىم-اق كەلەدى, بىراق… ءدىننىڭ اتىن جامىلىپ ۇلتتىق قۇندىلىقتارىمىزعا ءتيىسۋ قايدان شىقتى؟ قاي كەزدە بەلەڭ الدى بۇل؟
دىنگە جاپقىمىز كەلەدى, انىعىندا, ۇلتىنىڭ قاستەرلى مۇراسىنان بەزگەن ءھام تەرىس اعىمنىڭ جەتەگىنە ەرگەن «شىرىگەن جۇمىرتقا» بولعانداردىڭ تۇسىنىگى بۇل. ايتپەسە كەز كەلگەن حالىقتىڭ ءداستۇرلى مادەنيەتى مەن ءدىني تانىمى ءوز ۇلتى ءۇشىن قاسيەتتى سانالاتىنىن بىلمەي مە بۇكىل قازاق؟ دومبىرا - قازاقتىڭ جانى, بابادان قالعان باعزى مۇرا. بىراق كونە زاماننان بەرى قازاقتىڭ جۇرەك قىلىن, دالانىڭ تەرەڭ تاريحى مەن سان عاسىرلىق شەجىرەسىن شەرتىپ كەلە جاتقان ۇلتتىق اسپاپتى قازاقتان ايىرۋ باستالعان سياقتى», دەپ جازدى بەكجان تۇرىس Facebook پاراقشاسىندا.
ونىڭ ايتۋىنشا, بۇل شۋدى الدەكىمدەر ادەيى ۇيىمداستىرعان بولۋى مۇمكىن. ءبىر مەزگىلدە بىرىنەن سوڭ ءبىرى ءبىر سارىندا ايتىپ جاتقان سوزدەر ونى وسىنداي ويعا جەتەلەپتى.
«دومبىرانى «حارام» دەپ جۇرگەن جات اعىمداعىلاردىڭ ارەكەتىنە تىيىم سالىنۋى كەرەك, ۋاقىتى كەلدى. تۇتاس ۇلت بولىپ ۇلتتىق اسپابىمىز - قاسيەتتى دومبىرادان قازاقتى بەزدىرگىسى كەلەتىندەرگە جاۋاپ رەتىندە قولىنان دومبىراسى تۇسپەگەن ءداستۇرلى ءانشى-كۇيشىلەردەن باستاپ, بار قازاقتىڭ الەۋمەتتىك جەلىدە تەك دومبىرا جايلى ارنايى پوست جاريالاپ وتىرۋىن وتىنەم. قاعىنان جەرىگەندەردىڭ تەرىس ناسيحاتىنا, وزگە اعىمعا كىرىپ ءداستۇر-سالتىمىز بەن ۇلتتىق مادەنيەتىمىزگە قارسى شابۋىل جاسايتىندارعا ارنايى زاڭ قابىلدانىپ, بەلگىلى ءبىر شارا قولدانعانشا بۇل چەللەندج ۇزىلمەسە دەيمىن. ءار قازاق ارنايى پوست جازباسا دا, دومبىرامەن ايتىلعان ءان نەمەسە كۇيدى پاراقشاسىنا كۇندە جاريالاپ وتىرۋعا ءتيىس. ۇسىنىس-وتىنىشىمە نەمقۇرايدى قارامايدى دەپ سەنەم. قازاقتى ءداستۇر-سالتىنان, ۇلتتىق مۋزىكاسىنان ايىرىپ, ۇلت رەتىندە جويعىسى كەلەتىن ارامپيعىلداردىڭ ارەكەتىنە جول جوق. وسىنى تۇسىنەتىن كەز جەتتى. ءسۇرىنىپ كەتپە, قازاق بالاسى, ءسۇرىنىپ كەتپە!» دەلىنگەن جازبادا.
