بىلتىر دا بەس ادام سۋعا باتىپ كەتىپ ەدى. ولاردىڭ تورتەۋى سۋعا تۇسۋگە رۇقسات ەتىلمەگەن جەردە كوز جۇمسا, بىرەۋى بالىق اۋلاۋعا شىققاندا قاۋىپتى جەردى ەسكەرمەگەن. ال 2021 جىلى 22 ادام اجال قۇشتى.
وبلىستىق توتەنشە جاعدايلار دەپارتامەنتىنىڭ ازاماتتىق قورعانىس باسقارماسى باستىعىنىڭ مىندەتىن اتقارۋشى, مايور قۋات ماحمەتوۆتىڭ مالىمدەۋىنشە, قۇتقارۋشىلار بيىل 2115 رەت شۇعىل شاقىرۋ مەن باقىلاۋعا شىققان. «بىلتىر 2071 دابىل تۇسكەن بولسا, بيىل بۇل سان 44-كە ارتقان. بارلىق دابىلدىڭ ىشىندە سۋدىڭ استىنان ىزدەۋ جۇمىستارى – 5, سۋعا باتۋدان قۇتقارۋ – 28, قاۋىپتى سۋ قويمالارىن باقىلاۋ مەن قاداعالاۋعا 2082 رەت باردىق. قىزمەتكەرلەرىمىزدىڭ جەدەل ءىس-قيمىلدارىنىڭ ارقاسىندا 39 ادام قۇتقارىلدى. ونىڭ ۇشەۋى – بالا. جالپى, وبلىستا كەيىنگى التى جىلدا 201 ادام سۋعا باتىپ بارا جاتقان جەردەن قۇتقارىلدى», دەدى ول.
قۇتقارۋشىلار حالىقتى قاۋىپتەن ساقتاندىرۋعا دا كوپ كوڭىل ءبولىپ وتىر. باق ارقىلى باسقارما قىزمەتكەرلەرى 84 رەت بريفينگ ۇيىمداستىرىپ, تۇرعىنداردى سۋعا ءتۇسۋ كەزىندە ساق بولۋعا, تەك بەلگىلەنگەن جەرلەردە عانا سۋعا تۇسۋگە شاقىرعان. سونىڭ ىشىندە بالىقشىلارعا ارنايى توقتالىپ, كوكتەمگى جانە كۇزگى, قىسقى ماۋسىمداردا مۇزدىڭ جۇقالاعىنا ۇنەمى نازار اۋدارۋدى ەسكە سالىپ وتىرعان. ءباسپاسوز قۇرالدارىندا 119 ەسكەرتۋ ماقالاسى جاريالاعان. توتەنشەلىكتەر 4835 رەيد پەن باقىلاۋعا شىققان.
بۇدان بولەك, سۋعا تۇسەتىن ايماقتاردا 199 ەسكەرتۋ ءىلىنىپ, قاۋىپتىڭ الدىن الۋ ماقساتىندا رەيدتەر جۇرگىزىلگەن. سۋعا تۇسۋگە ىڭعايلى بولسا دا اياققا ورالاتىن بالدىرى كوپ, قايراڭداعى تاسى قاۋىپتى جەرلەرگە 4255 تىيىم سالۋ بەلگىسى ورناتىلعان. بىراق وكىنىشكە قاراي, كەي ازاماتتار مۇنداي ەسكەرتۋلەردى دە ەلەمەي, سۋعا تۇسۋگە تىيىم سالىنعان ايماقتارعا دەمالىسقا شىققان. جالپى, قۇزىرلى ورگاننىڭ ەسكەرتۋلەرىنە ەلەڭ ەتپەگەندەرگە اكىمشىلىك قۇقىق بۇزۋشىلىق تۋرالى كودەكستىڭ 440-بابى – «قوعامدىق جەرلەردە ءتارتىپ بۇزۋعا» سايكەس ايىپپۇل سالىنادى.
قۋات ماحمەتوۆ ادامدار ەڭ الدىمەن جەكە قاۋىپسىزدىگىن ويلاعاندا عانا قايعىلى جاعدايلاردىڭ از بولاتىنىن اتاپ ءوتتى. «وكىنىشكە قاراي, ءوڭىردىڭ كوپ تۇرعىنى اپاتتىڭ اياق استىنان ەكەنىن ۇمىت قالدىرادى. ەسكەرتۋلەر مەن ەرەجەلەرگە ەلەڭ ەتپەيدى. قاۋىپتى جاعداي تەك باسقا بىرەۋلەردىڭ باسىنا عانا كەلەتىن سياقتى كورەدى. بىراق «ساقتانساڭ – ساقتايدى» دەگەندى اركىم ەسىنەن شىعارماۋى كەرەك», دەدى ول.
سولتۇستىك قازاقستان وبلىسى
