وبلىس اكىمىنىڭ ورىنباسارى قاناتبەك مادىبەكتىڭ ايتۋىنشا, ەلوردا تورىندە وتكەن اۋىل شارۋاشىلىعى تاۋارلارى جارمەڭكەسىنە وبلىس ورتالىعى تاراز قالاسى مەن وڭىردەگى 10 اۋداننىڭ تاۋار وندىرۋشىلەرى بەلسەنە قاتىسىپ, 298,8 توننا اۋىل شارۋاشىلىعى ءونىمىن اكەلگەن.
«جىلداعىداي قالىپتىسقان ءداستۇر بويىنشا اتىراۋ وبلىسىنىڭ ازاماتتارىنان كەيىن جامبىلدىق اۋىل شارۋاشىلىعى تاۋار وندىرۋشىلەرى دە ەلورداعا ات باسىن بۇردى. جارمەڭكەگە وڭىردەگى بارلىق اۋداننىڭ قاتىسقانىن ايتا كەتكەن ءجون.
استاناداعى جارمەڭكەگە بارلىق شارۋالارمەن قاتار, 2019 جىلى باستالعان «جامبىل وبلىسى تۇرعىندارىنىڭ تۇرمىستىق تابىسىن جاقسارتۋ» قاناتقاقتى جوباسى اياسىندا قۇرىلعان اۋىل شارۋاشىلىعى تاۋار ءوندىرۋشى كووپەراتيۆتەرى مەن ءوز كاسىبىن اشقان جەكە كاسىپكەرلەر جۇمىلدىرىلدى. ولار جالپى سوماسى 168,6 ملن تەڭگەنى قۇرايتىن اۋىل شارۋاشىلىعى ءونىمىن اكەلگەن.
ناقتىراق ايتساق, 33 توننا ەت ونىمدەرى (جىلقى, سيىر, قوي ەتى), 3,2 توننا تاۋىق ەتى, 4,0 توننا شۇجىق, 14,0 توننا ءسۇت ونىمدەرى, 6 مىڭ دانا جۇمىرتقا, 1,0 توننا كونديتەرلىك ونىمدەر, 3,4 توننا ماكارون, 10,0 توننا بالىق, 5,0 توننا بال, 208 توننادان استام كوكونىس-باقشا جانە جەمىس-جيدەك ءونىمى استانالىقتارعا ءتيىمدى باعامەن وتكەرىلدى», دەيدى ق. مادىبەك.
اۋىل شارۋاشىلىعى تاۋار وندىرۋشىلەرىنىڭ جارمەڭكەسىنە ءوڭىر باسشىسى ەربول قاراشوكەەۆ ارنايى قاتىستى. جارمەڭكە بارىسىندا جامبىلدىق ونەرپازدار ەلوردالىق تۇرعىندارعا اننەن شاشۋ شاشىپ, كونتسەرتتىك باعدارلاماسىن ۇسىندى.
