ءداستۇرلى جولداۋدىڭ بيىلعى باسىمدىلىعى ەكونوميكالىق ماسەلەلەر ەكەنى كەزدەيسوق ەمەس. ويتكەنى ەلىمىزدىڭ ماتەريالدىق نەگىزدەرى پارمەندى دامۋ جولىنا تۇسە الماي كەلەدى جانە ونىڭ الەۋمەتتىك-ەكونوميكالىق قۇرىلىمى ءالى كۇنگە دەيىن تولىقتاي جاڭعىرا العان جوق. جىلۋ ستانسالارىنداعى جارىلىستار, توزىعى جەتكەن تەحنيكانىڭ جاڭالانباۋى, بيۋدجەتتىڭ ءتيىمسىز پايدالانۋى سياقتى دەرەكتەر جولداۋدا زاماناۋي كەزەڭنىڭ اششى شىندىعى رەتىندە جاريالاندى. بۇل جەردەگى سىني تالداۋدىڭ تۇپكى استارى ءبىزدىڭ قوعامدى وركەنيەتتى ەلدەردىڭ قاتارىنا قوسۋ يدەياسى جاتىر. سونىمەن قاتار مەملەكەت باسشىسى بۇرىنعى جىلدارى ءۇستىرت قانا اتالىپ وتەتىن سۋ پروبلەماسىنا جاڭاشا كوزقاراستى قالىپتاستىرىپ, سۋ ساياساتىن جۇرگىزۋدى ۇسىندى. بولاشاقتا ەلدەر اراسىندا سۋ ماسەلەسى مەملەكەتارالىق قاتىناستاردىڭ ماڭىزدى قىرىنا اينالاتىندىعى بيىلدىڭ وزىندە ەرەكشە سەزىلە باستادى.
پرەزيدەنت «ادىلەتتى قازاقستان» مەن «ادال ازامات» سياقتى ۇعىمداردىڭ قوعامىمىزدا باسىمدىق تانىتۋعا ءتيىس ەكەنىن ايتا كەلىپ, جاستار اراسىنداعى كرەاتيۆتىلىك, موبيلدىلىك, اشىق سۇحباتقا دايىندىق سياقتى قاسيەتتەردىڭ كەڭىنەن تارالۋىنا نازار اۋداردى. قازىرگى كەزەڭدە الدە دە شەشىمىن تاپپاي وتىرعان پروبلەمالاردىڭ قاتارىنا كاسىبي ءبىلىمنىڭ وندىرىسكە پايداسىن تيگىزە الماي كەلە جاتقانىن جاتقىزۋعا بولادى. جوعارى وقۋ ورىندارى مەن ءوندىرىس ورىندارى اراسىندا ءوزارا سەرىكتەستىككە نەگىزدەلگەن شىنايى, ادال جانە ءادىل قاتىناستار ورناماسا, قوعامداعى, ەكونوميكاداعى پارمەندى دامۋعا, جاڭعىرۋ مەن جاڭارۋلارعا قول جەتكىزە المايمىز. وسى سيپاتتاعى ساپالىق جانە ساندىق كورسەتكىش وقۋ ورنىنىڭ ماڭىزدىلىعى مەن قارجىلاندىرۋىن انىقتاۋعا ءتيىس. ءتۇرلى دەڭگەيدەگى باسشى مامانداردىڭ جەكە جاۋاپكەرشىلىكتەرىن ارتتىرماي, ايتقان ءسوزى سول ايتىلعان جەردە قالۋى دا مۇمكىن.
مەملەكەت باسشىسى «حالىق ۇنىنە قۇلاق اساتىن مەملەكەت» تۇجىرىمداماسىن ناقتى ىسكە اسىرۋىمىز كەرەك» دەگەندى بۇرىن دا ايتتى. بۇل قاعيدانى پرەزيدەنتتىڭ ءوزى عانا جۇزەگە اسىرمايدى. سوندىقتان ايماقتىق دەڭگەيدەگى وسى تەتىكتىڭ جۇمىس ىستەۋ قابىلەتى مەن ناتيجەلەرى ۇنەمى باقىلانىپ, ەسەپ بەرىلىپ وتىرىلۋعا ءتيىس. دەموكراتيانىڭ ايقىن كورىنىسى ايشىقتالا ءتۇسۋى قازىرگى كەزەڭدە وتە ماڭىزدى. سەبەبى, ءبىز «ادىلەتتى قازاقستان» مەن «ادال ازامات» ۇعىمدارىن ەرەكشە قۇندىلىقتار رەتىندە دارىپتەۋ ارقىلى عانا وركەنيەتتى ەلدىڭ قاتارىنا قوسىلا الامىز.
سەرىك نۇرمۇراتوۆ,
فيلوسوفيا, ساياساتتانۋ جانە ءدىنتانۋ ينستيتۋتى فيلوسوفيا ورتالىعىنىڭ ديرەكتورى
