العاشقى كەزەڭدە جەرلەستەرىمىز مىسىر قۇراماسىنان 3:1 ەسەبىمەن باسىم ءتۇستى. بۇل كەزدەسۋدە ءبيبىسارا اساۋباەۆا مەن مەرۋەرت كامالەدينوۆا جەڭىسكە جەتسە, كسەنيا بالاباەۆا مەن الۋا نۇرمانوۆا تەڭ ۇپايعا قول جەتكىزدى. ەكىنشى اينالىمدا ءۇندىستاننىڭ شاحماتشىلارىمەن شەبەرلىك بايقاستى. «ويلىلار ويىنىن» ويلاپ تاپقان مەملەكەت وكىلدەرىنە قارسى باسەكەدە بۇرىمدىلارىمىز شەبەرلىكتىڭ شىنايى ۇلگىسىن كورسەتتى. العاشقى ءۇش كەزدەسۋ تەڭ اياقتالدى. ەندىگى ءۇمىت ءتورتىنشى تاقتادا ويناعان ءامينا قايىربەكوۆادا ەدى. قازاقتىڭ قارشاداي قىزى ەل سەنىمىن اقتادى. ول شري ساۆيتۋدان ايلاسىن اسىرىپ, قازاقستانعا جەڭىس سىيلادى – 2,5:1,5.
فرانتسيا قۇراماسىنا قارسى وتكەن ءۇشىنشى كەزەڭدە كوماندانىڭ ليدەرى اسۋباەۆا قارسىلاسىمەن ۇپاي بولىسكەنىمەن, كامالەدينوۆا مەن قايىربەكوۆا باسەكەلەستەرىنەن باسىم ءتۇستى. ال اسەل سەرىكباي جەڭىلىس تاپتى. قورىتىندى ەسەپ – 2,5:1,5. ودان كەيىن وتانداستارىمىز ءدال وسىنداي ەسەپپەن ۋكراينانى قاپى قالدىردى. بۇل جولى ءبيبىسارا مەن الۋا جەڭىس تويىن تويلاسا, مەرۋەرت ناتاليا بۋكسامەن تەڭ وينادى. توپتىق ءتۋرنيردىڭ سوڭعى تۋرىندا قازاقستان مەن گرۋزيا تەڭ ءتۇستى.
ءسويتىپ, قاتارىنان ءتورت كەزدەسۋدە جەڭىسكە جەتىپ, تاعى ءبىر باسەكەدە تەڭ ويناعان وتانداستارىمىز قورىتىندى ەسەپتە 9 ۇپاي جيناپ, ءوز توبىندا ءبىرىنشى ورىندى يەلەندى. ەكىنشى ورىندى گرۋزيا ەنشىلەدى. قاپ تاۋىنان كەلگەن قىزداردىڭ قورجىنىندا 7 ۇپاي بار. ءۇشىنشى جانە ءتورتىنشى ورىنداردى فرانتسيا مەن ۋكراينا ءوزارا ءبولىستى – 5 ۇپايدان. ءۇندىستان ءتورت ۇپايعا قول جەتكىزسە, مىسىرعا سوقىر ۇپاي دا بۇيىرمادى. كەلەسى توپتا اقش پەن پولشا مارەگە بىردەي جەتتى. بۇل كوماندالار 7 ۇپايعا يەلىك ەتتى. باستى قارسىلاستارىنان ءبىر ۇپاي كەم جيناعان قىتاي ءۇشىنشى ورىندى يەلەندى. ءتورت ۇپايى بار گەرمانيا ءتورتىنشى ساتىعا تۇراقتادى.
شيرەك فينالدا ءبىزدىڭ بۇرىمدىلار گەرمانياعا قارسى وينادى. نەمىس شاحماتشىلارى قانشا تىرىسقانىمەن, قازاق قىزدارىنىڭ قارقىنىنا شىدامادى. ءبيبىسارا, الۋا جانە ءامينا قارسىلاستارىن قاپى قالدىرسا, مەرۋەرت جەڭىلىس تاپتى. ناتيجەسىندە 3:1 ەسەبىمەن باسىمدىق تانىتقان قازاقستان قۇراماسى جارتىلاي فينالعا جولداما الدى. بۇل مەجەدە جەرلەستەرىمىز فرانتسيامەن شەبەرلىك بايقاسادى.
