فوتو: prosports.kz
كەشتىڭ باستى باسەكەسى جارتىلاي جەڭىل سالماقتاعى قارشىعا داۋىتبەك پەن ديەگو برانداو اراسىندا ءوتتى. 29 جاستاعى وتانداسىمىز 14 رەت وكتاگونعا شىعىپ, 11 رەت جەڭىسكە جەتكەن. 10 كەزدەسۋىن مەرزىمىنەن بۇرىن اياقتاعان. ديەگونىڭ جاسى 36-دا. برازيليانىڭ فورتالەزا قالاسىنىڭ تۋماسى 46 جەكپە-جەك وتكىزىپ, 26-سىندا باسىمدىق تانىتىپتى. 21 قارسىلاسىن ەسىنەن تاندىرعان. 2012 مەن 2016 جىلدار ارالىعىندا ول UFC-دە ونەر كورسەتتى. الەمنىڭ ەڭ بەلدى پروموۋشەنى ۇيىمداستىرعان تۋرنيرلەردە برانداو اتاعى جەر جارعان كونور ماكگرەگور مەن داستين پورە سىندى ساڭلاقتارمەن جۇدىرىقتاسقان. ودان بولەك, ءتۇرلى جارىستا ۆەنەر گاليەۆ, مارات بالاەۆ, الەكسەي پولپۋدنيكوۆ, بيبەرت تۋمەنوۆ جانە تاعى باسقا تانىمال فايتەرلەرمەن كۇش سىناستى.
قارسىلاسىنىڭ اتاق-داڭقىنان ەش قايمىقپاعان قازاقتىڭ قايسار ۇلى استاناداعى تۋرنيردە برازيليالىق سپورتشىنى ۇرىپ جىعىپ, «الاش پرايدتىڭ» چەمپيوندىق بەلبەۋىن يەلەندى.
