مينيستر ديقانداردىڭ مۇڭىن تىڭدادى

سولتۇستىك وڭىرلەرىنىڭ اراسىنداعى كۇزگى-دالا جۇمىستارىنىڭ ەڭ تومەن قارقىنى وسى وبلىستا.  اۋا رايىنىڭ قولايسىزدىعىنا بايلانىستى بارلىعى 834,3 مىڭ گا استىق نەمەسە جالپى الاڭنىڭ 17% - ى جينالدى.

اۋىل شارۋاشىلىعى ءمينيسترى وبلىستىڭ ءۇش اۋدانىن ارالاپ,  اگروقۇرىلىمداردىڭ باسشىلارىمەن وزەكتى ماسەلەلەر تالقىلادى.  بيىلعى كۇزدەگى ەكى اپتادان اسا توقتاۋسىز جاۋعان  جاڭبىردىڭ سالدارىنان ديقاندار بيدايدى جيناي الماي وتىر. ديقاندار استىقتىڭ ساپاسىز بولىپ, كەلەسى جىلى تۇقىمسىز قالۋ قاۋپى دە جوق ەمەس دەيدى. ولاردى استىقتى كەپتىرۋ ءۇشىن الدەقايدا كوپ وتىن قاجەت ەتەتىن ەلەۆاتورلاردىڭ رەنتابەلدىلىگى دە الاڭداتادى. نەسيەلىك مىندەتتەمەلەر مەن سۋبسيديالار دا شارۋالار ءۇشىن ماڭىزدى ماسەلەنىڭ ءبىرى. ايداربەك ساپاروۆ  ديقانداردىڭ بارلىق ماسەلەلەرى جەدەل شەشىلەتىنىن ايتتى.

«مەملەكەت تاراپىنان قاجەتتى قولداۋ كورسەتىلەدى. بارلىق قارجى ينستيتۋتتارى نەسيەلىك مىندەتتەمەلەردى ۇزارتۋ مۇمكىندىگىن جەكە قاراستىرادى. استىقتى كەپتىرۋگە ارنالعان ديزەل وتىنىنىڭ باعاسى مەن قوسىمشا كولەمىنە كەلەتىن بولساق, باسقا مەملەكەتتىك ورگاندارمەن كەلىسۋ پروتسەسى اياقتالىپ جاتىر. ليتسەنزيالانعان استىق قابىلداۋ كاسىپورىندارى مەن كەپتىرگىشتەرى بار فەرمەرلەر ءۇشىن مىندەتتى تۇردە ارزانداتىلعان وتىن بەرىلەدى», دەدى  مينيستر.

شارۋالارمەن كەزدەسۋدە  اقمولا وبلىسىنىڭ اكىمى مارات احمەتجانوۆ بارلىق شارالار قابىلداناتىنىن,  وڭىردە ەگىن جيناۋ ناۋقانىن وتكىزۋ ماسەلەلەرى بويىنشا وبلىس اكىمىنىڭ ورىنباسارى باستاعان كوميسسيا قۇرىلعانىن مالىمدەدى.

«اقمولا وبلىسىنا ساپارى قارساڭىندا اۋىل شارۋاشىلىعى ءمينيسترى جەدەل شتاب وتىرىسىن وتكىزىپ, بىرقاتار تاپسىرما بەردى. ونىڭ ىشىندە استىق قابىلداۋ كاسىپورىندارىنىڭ قىزمەتتەرى باعاسىنىڭ ءوسۋىنسىز تاۋلىك بويى جۇمىس ىستەۋىن, استىقتىڭ ساندىق-ساپالىق سيپاتتامالارىن ەسەپكە الۋ ءۇشىن اۋماقتىق ينسپەكتسيالار مەن كارانتيندىك قىزمەتتەردىڭ تاۋلىك بويى جۇمىس ىستەۋىن قامتاماسىز ەتۋ بار. «قازاگروەكس» اق ازىق-ت ۇلىك كورپوراتسياسىنداعى قولدا بار استىق قورىن زەرتتەپ, ونىڭ تۇقىم ماتەريالى رەتىندە پايدالانۋعا جارامدىلىعىن تەكسەرەدى. 2024 جىلى سەبىلەتىن تۇقىمدار بولەك ساقتالادى. وبلىس اكىمدىكتەرى سۋبسيديا الۋعا كەلىپ تۇسكەن وتىنىشتەردى قاراۋ ءۇشىن قوسىمشا مامانداردى تارتادى. شارۋالار اراسىندا تۋىندايتىن سۇراقتار مەن ماسەلەلەردى جەدەل شەشۋ ءۇشىن اۋىل شارۋاشىلىعى ءمينيسترىنىڭ تاپسىرماسىمەن جۇمىس توبى قۇرىلىپ, قوستاناي وبلىسىنا باردى. كەيىن ۋاكىلەتتى ورگانداردىڭ وكىلدەرى سولتۇستىك قازاقستان مەن اقمولا وڭىرىنە بارۋعا ءتيىس.  اۋىل شارۋاشىلىعى مينيسترلىگى قابىلداپ جاتقان شارالار قولايسىز اۋا رايىنىڭ سالدارىن بارىنشا ازايتۋعا جانە قازاقستان شارۋالارىن قولداۋعا مۇمكىندىك بەرەدى. 9 قىركۇيەكتەگى جەدەل مالىمەتتەرگە سايكەس, رەسپۋبليكا بويىنشا بارلىعى 5 ملن گەكتار استىق جينالدى, بۇل جالپى ەگىس القابىنىڭ 29,2%-ىن قۇرايدى. ورتاشا ونىمدىلىگى 9,9 تس/گا بولعان كەزدە 5 ملن توننا استىق باستىرىلدى», دەلىنگەن حابارلامادا.